1 Onghee hano otu nokudiinina edi twe di uda tuhe di pitilile. 2 Osheshi ondjovo ei oya popififwa ovaengeli eshi ya li ya pama, netauluko keshe nokuhadulika keshe okwa mona ehandukilo la yuka, 3 hano fye ohatu i ngahelipi onhapo, ngeenge hatu dini exupifo linene li fike apa, la udifwa tete kOmwene ndele la pamekwa kwaava ve li uda, ndele tave li fikifa kufye, 4 eshi Kalunga yo a hepaulula pamwe navo nomadidiliko noikumwifalonga noilonganghono i lili neeshali dOmhepo Iyapuki pahalo laye.
Aishe oi li mepangelo laKristus
5 Osheshi ounyuni ou tau uya, ou hatu u tongo, ine u tula mepangelo lovaengeli. 6 Ndele umwe a hepaulula monhele imwe ndele ta ti:
“Omunhu omushike, eshi ho mu dimbulukwa,
nomona womunhu eshi ho mu file oshisho?
7 Okafimbo kaxupi we mu ninipikile,
e dulike kovaengeli,
nowe mu dika oshinge nefimano
ndele we mu pa epangelo kombada yoilonga yomake oye.
8 Oinima aishe owe i tula koshi yeemhadi daye.”
Osheshi eshi e mu tulila aishe mepangelo laye, ina fiya po nande shimwe inashi findilwa koshi yaye. Ndelenee paife katu wete natango nokutya, aishe oya findilwa mo. 9 Ndelenee ou a ninipikilwa okafimbo kanini e dulike kovaengeli, Jesus, otu mu wete a dikwa oshinge nefimano omolwouyehame wokufya, opo a lole efyo ponhele yaaveshe okefilonghenda laKalunga.
A finda efyo
10 Osheshi sha wapalela ou, aishe i li omolwaye naaishe ya dja muye, mOmwene wexupifo lavo, e mu lenge mouyehame, a kale a wana nokutwala ovana vahapu moshinge. 11 Osheshi ou ta yapula naava va yapulwa, aveshe ova dja muumwe, onghee ita fi ohoni oku va ifana ovamwaxe, 12 eshi ta ti:
“Edina loye onda hala oku li shiivifila vakwetu
nomokati keongalo ohandi ku imbile ehambelelo.”
13 Navali:
“Elineekelo lange ohandi li tula muye,”
nadimwe vali:
“Tala, aame nounona ava Kalunga e va pa nge.”
14 Hano ngaashi ounona va ninga ombelela nohonde, naye yo okwa kwatafana navo opanghedi tuu oyo imwe, opo a hanaune po nefyo laye ou a kala e nepangelo lefyo nokutya, Satana, 15 ye opo a mangulule aveshe ava va li moupika woumbada wefyo mokukalamwenyo kwavo akushe. 16 Osheshi havaengeli te va tambula, ndelenee ta tambula oludalo laAbraham. 17 Onghee hano Ye okwa li e nokufaafana novamwaxe moinima aishe, opo a ninge omupristeli omukulunhu omunamutimanghenda nomudiinini moilonga yaye yopuKalunga, Ye a longele ovanhu edimepo lomatimba. 18 Osheshi Oye mwene, eshi a yehamekwa nokwa hongaulwa, ota dulu okukwafa ava tava hongaulwa.
© Oshikwanyama Bible Revised © Bible Society of Namibia, 2008, 2012.
