Oshivilo shaPaasa pefimbo laJosia
1 Konima yoinima ei Josia okwa dana muJerusalem oshivilo shaPaasa okufimanekifa Omwene. Ndele va dipaa odi yaPaasa mefiku etimulongo netine mohani yotete. 2 Nokwa tula ovapristeli moilonga yavo ndele te va nyatipaleke okulonga mongulu yOmwene. 3 Nokwa lombwela Ovalevi ava va longa Ovaisraeli aveshe ndele ovo va li ve liyapulila Omwene: “Tuleni oshikefa shiyapuki mongulu oyo Salomo yaDavid, ohamba yaIsrael, e i tunga. Itamu pumbwa vali oku shi humbata komapepe. Longeleni paife Omwene Kalunga keni novanhu vaye Ovaisraeli. 4 Ndele kaleni mwe lilongekida pamapata eni paengudu deni ngaashi David, ohamba yaIsrael, ya pangela omhangela nopalombwelo lomona waye Salomo: 5 indeni mo mu kale ofika motembeli paengudu domapata ovamwaxo, ovakweni, nokutya opamalufo omatanga omapata Ovalevi. 6 Ndele dipaeni odi yaPaasa mu liyapule, ndele i longekidileni oovakweni mu longe pandjovo yOmwene, e i lombwela Moses.”
7 Ndele Josia okwa yandja kovanhu vomoshiwana oimuna: oudjona veedi noukombwena, aveshe ovo omayambo aPaasa, kwaaveshe ava va li po, ve fike pomayovi omilongo nhatu, neengobe deemhedi omayovi atatu. Odo adishe oda li dohamba. 8 Nomalenga yo a yandja kovanhu, kovapristeli nokOvalevi. Hilkia naSakaria naJehiel, ovakulunhu vongulu yaKalunga, ova yandja kovapristeli omayambo aPaasa eedi omayovi avali nomafele ahamano neengobe deemhedi omafele atatu. 9 Ndele Konanja novamwaina Shemaia naNetanel naHasabja naJeiel naJosabad, ovakulunhu vOvalevi va yandja omayambo aPaasa eedi omayovi atano, neengobe deemhedi omafele atano.
10 Elongelokalunga ola ningwa ngaha: ovapristeli va kala ofika ponhele yavo, nOvalevi paengudu davo palombwelo lohamba. 11 Opo nee va dipaa odi yaPaasa, novapristeli va tambula ohonde momake Ovalevi ndele ve i tilashi. Ndelenee Ovalevi va yuva 12 ndele va tukula mo osho shokexwikiloyambo, ve shi yandje kovanhu vomoshiwana pamaumbo avo, ve shi yambele Omwene, ngaashi pa shangwa membo laMoses. Nosho yo va ninga neengobe. 13 Ndele va yofa odi yaPaasa komundilo pamapukululo, ndelenee eeshali diyapuki ve di teleka meembiya nomoiyuma nomomatiti, ndele ve di twaalela diva kovanhu aveshe. 14 Konima ve i lilongekidila yo nove i longekidila ovapristeli, osheshi ovapristeli, oludalo laAron, va li moilonga fiyo oufiku okuyamba exwikiloyambo nomakaadi. Onghee hano Ovalevi ve i lilongekidila ndele va longekidila yo ovapristeli, oludalo laAron. 15 Novaimbi, vomoludalo laAsaf, va li ponhele yavo palombwelo laDavid nolaAsaf nolaHeman nolaJedutun, omumonikokule wohamba, nosho yo ovanangeli vopoivelo poshivelo keshe. Vo inava pumbwa okudja po nokweefa oshilonga shavo, osheshi Ovalevi vakwao ve i va longekidila.
16 Osho ngaha hano elongelokalunga alishe la ningwa mefiku tuu olo, noshivilo shaPaasa nokuyamba omaxwikiloyambo koaltari yOmwene pashipango shohamba Josia. 17 Novana vaIsrael ovo va li po, va dana Opaasa pefimbo olo, nosho yo oshivilo shomingome dihe nonhafi, omafiku aheyali. 18 Opaasa ya fa oyo inai danwa muIsrael okudja komafiku omuxunganeki Samuel, osheshi ohamba nande imwe yOvaisraeli inai dana Opaasa ya tya ngaha ngaashi oyo ya danwa kuJosia novapristeli nOvalevi nOvajuda aveshe nOvaisraeli ovo va li po noonakukala muJerusalem. 19 Opaasa ei oya dana momudo omutimulongo nomutihetatu wepangelo laJosia.
Josia ta file moita
20 Konima yoinima aishe oyo, Josia eshi a yapula otembeli, Neko, ohamba yaEgipiti, ya fikama a ka lwife puKarkemis puEufrat, ndele Josia okwa fikama e ke mu shakeneke. 21 Opo nee ye ta tumu kuye ovatumwa, va tye kuye: “Ondi na shike naave, ohamba yaJuda? Nena itandi uya kwoove, ndelenee okepata olo tali lwifa nge alushe. Ndele Kalunga okwa tya ndi nokweendelela. Ino kondjifa Kalunga ou e li pamwe naame, opo Ye ehe ku nyone po.” 22 Ndelenee Josia ina kanduka po puye, ndelenee okwe lidimbika a lwe naye. Ina pwilikina eendjovo daNeko, da dja mokanya kaKalunga. Nokwa ya mepumbu laMegido e ke mu lwife. 23 Novaumbi va yasha Josia. Opo nee ohamba tai ti kovapiya vayo: “Tumbe i nge po, ame nda yashwa nai.” 24 Ovapiya vaye ve mu kufa mo metemba loita ndele ve mu nangeka metemba laye limwe, ndele ve mu twala kuJerusalem. Nokwa fya nokwa pakwa meembila dooxe, fimbo Ovajuda aveshe noonakukalamo muJerusalem va lila Josia. 25 Ndele Jeremia okwa tota eimbilokemo omolwaJosia. Novaimbi aveshe ovalumenhu novakainhu hava imbi Josia momaimbilokemo avo fiyo onena eli, ndele ve shi ninga onghedimhango muIsrael. Ndele tala, osho osha shangelwa mOmaimbilokemo.
26 Noinima imwe tai hepaulula Josia noilonga yaye iyuki pakushangwa momhango yOmwene, 27 inya yotete naayo yaxuuninwa, tala, oya shangwa membo leehamba daIsrael nodaJuda.
© Oshikwanyama Bible Revised © Bible Society of Namibia, 2008, 2012.
