Ouyapostoli nelininipiko
1 Keshe umwe ne tu tale ofye ovapiya vaKristus, nomalenga oiholekwa yaKalunga. 2 Ndele komesho yoinima aishe omalenga otaa pulwa oudiinini. 3 Ndelenee oshinima shinini kwaame ngeenge handi tokolwa kunye, ile ketokolo lopanhu; naame mwene itandi litokola, 4 osheshi meliudo lange kamu na sha, ndele hasho tashi pe nge ouyuki, osheshi omutokoli wange oye Omwene. 5 Hano inamu tokola sha manga efimbo inali fika, fimbo Omwene ine uya, ou ta holola ei ya holekwa momulaulu, nomadilongo omutima ote a holola; opo nee keshe umwe ota pewa epandulo laye kuKalunga.
6 Oinima ei, ovamwatate, ofye naApollos otwe i liyeleka omolweni, opo mu lilonge okuhakoya kombada yaasho sha shangwa, opo muhe linenepeke nokupopila umwe nokudina omukwao. 7 Osheshi olyelye te ku tula komesho? Noshikwashike eshi u shi kwete, ino shi pewa? Ndele ngeenge owe shi pewa, oshike to litange wa fa ino shi pewa? 8 Ndele nye omwa kuta, mwa punapala nokuli, mwa ninga nokuli mwa fa eehamba muhe na nafye! Heeno, ngeno mwa ninga ovapangeli, nafye yo tu pangele pamwe nanye! 9 Osheshi ondi shii fye ovayapostoli twa tulwa kuKalunga konima yaaishe, ngaashi ava va yandjwa kokufya; otwa ninga nokuli oshiyolifa shounyuni aushe, shovaengeli noshovanhu. 10 Ofye omalai omolwaKristus, nye ovanamayele muKristus, ofye oingone, nye ovanaenghono; onye mwa fimana, fye otwa dinika. 11 Fiyo okefimbo eli otwa fya ondjala notwa fya enota, otu li hamunghele nohatu dengwa, notuhe nomutumba, 12 ohatu lihepeke nokulikwafa nomake etu. Ohatu popiwa nai, ndele ohatu nangeke noupuna; hatu tewatewa, ndele fye ohatu lididimike; 13 hatu lundilwa, fye ohatu popi nombili; fye otwa talika ngaashi oshala shounyuni aushe, fye oonakweefiwa kwaaveshe fiyo onena eli.
14 Eshi itandi shi shange ndi mu fife ohoni, ndelenee oku mu kumaida ngaashi ovamwange ovaholike. 15 Osheshi nande omu kale mu novatekuli omayovi omulongo muKristus, kamu nooxo vahapu; osheshi ame onde mu dala muKristus Jesus okevaengeli. 16 Onghee ohandi mu kumaida; ningeni ovahopaeleli vange. 17 Onghee nde mu tumina Timoteus, ou omumwange omuholike nomudiinini mOmwene, oye te mu dimbulukifa okweenda kwange muKristus, nhumbi handi longo apeshe nomeongalo keshe. 18 Vamwe ove linenepeka, ve shii ame ihandi uya kunye. 19 Ndelenee Omwene ngeenge e shi hala, ohandi uya diva kunye, opo nee ohandi ka pula haendjovo dovalinenepeki adike, ndelenee neenghono yo davo. 20 Osheshi ouhamba waKalunga kau fi womeendjovo, ndelenee omeenghono. 21 Shilipipo mwa hala? Ondi uye kunye ndi noshimwati, ile onohole nomhepo ya lota?
© Oshikwanyama Bible Revised © Bible Society of Namibia, 2008, 2012.
