Pa kalwe ngahelipi novaitaveli oingone?
1 Ndele tambuleni omwiitaveli oshingone, mu tambuleni, nye inamu patafana omadiladilo e lili noku lili. 2 Umwe oku neitavelo, ota dulu okulya aishe, ndele mukwao, ou oshingone, ota li ombidi. 3 Ou ha li, ina dina ou iha li, naau iha li, ina tokola ou ha li, osheshi Kalunga okwe mu tambula. 4 Oove lyelye eshi ho tokola omupiya wamweni? Ota kalele ofika mwene waye, ile a wile po. Ndele ota ka kala e li ofika, osheshi Omwene e neenghono oku mu kaleka ofika.
5 Umwe e wete efiku limwe li dule likwao, ndele mukwao oha tale omafiku aeshe a faafana. Keshe umwe na kale a pama momayele aye. 6 Oye ou ta tongola omafiku, ohe a tongolele Omwene, naau ta li, ota lile Omwene, osheshi ta pandula Kalunga; ndele ou iha li, ote shi ningile Omwene, ndele ta pandula Kalunga. 7 Osheshi kape na umwe womufye te likalele ye mwene, nokape na umwe te lifile ye mwene. 8 Osheshi ngeenge hatu kala tu nomwenyo, ohatu kalele Omwene, ile ngeenge hatu fi, ohatu file Omwene. Osho hano ngeenge tu nomwenyo ile hatu fi, ofye ovOmwene. 9 Osheshi osho tuu eshi Kristus e shi fila nokwa nyumuka ndele ta ningi vali omunamwenyo, opo a pangele ovafi novanamwenyo.
10 Ndele ove, oto tokolele shike omumwaxo? Ile ove nima, oshike ho dini omumwaxo? Osheshi atusheni otu nokuholoka kolukalwatokolo laKalunga. 11 Shaashi pa shangwa:
“Oshili, ngaashi Ame ndi nomwenyo, Omwene ta ti,
omunhu keshe e nokutwa eengolo koshipala shange,
nokeshe tuu elaka oli nokuhambelela Kalunga.”
12 Onghee hano keshe umwe womufye e na okulihokolola ye mwene kuKalunga.
13 Hano inatu tokolafana vali, ndele pangeleni omhangela nokuli muha tulile omumwaxo oshinima shehaulo, ile shokupundukifa mondjila yaye. 14 Ame ondi shi shii, ndele onda pama shili mOmwene Jesus, kape noshinima sha nyata musho vene; oye ou aeke ta tale oshinima sha nyata, okuye sha nyata. 15 Ndele omumwaxo ngeenge ta yehamekwa koikulya yoye, ove ito ende vali pahole. Ino nyonauna po noikulya yoye ou a filwa kuKristus. 16 Inamu efa hano ouwa ou mu u kwete u shekwe. 17 Osheshi ouhamba waKalunga kau fi okulya nokunwa, ndelenee ouyuki, ombili nehafo mOmhepo Iyapuki. 18 Ou ta kalele Kristus moinima ei, a wapalela Kalunga, novanhu ve mu hokwa yo. 19 Tu lalakaneneni hano eshi tashi hapupalifa ombili netungafano. 20 Ino hanauna po oshilonga shaKalunga molwoikulya. Hano, aishe oya yela, ndele omunhu ou ta li neliudo lii, oshe mu nyikila owii. 21 Oshiwa okukala iho li ombelela noiho nu omaviinyu, ndele ho lidilike keshe eshi tashi tondifa omumwaxo, tashi mu pundukifa ile tashi mu fifa oungone. 22 Eitavelo olo u li na, kala u li na ove mwene koshipala shaKalunga. Omunelao oye ou ite litokola ye mwene, oinima oyo a tala ya fa iwa. 23 Ndele ou a limbililwa ye ta li, oye a tokolwa, osheshi okulya inaku dja meitavelo, ndelenee keshe eshi inashi dja meitavelo, osho oulunde.
© Oshikwanyama Bible Revised © Bible Society of Namibia, 2008, 2012.
