1 SAMUEL 22 - Oshikwanyama Bible (OKYB)

Omatembu aDavid

1 Ndele David okwa dja ko nokwa ya onhapo mekololo laAdullam. Novamwaina ovalumenhu neumbo lavo eshi ve shi uda, ova ya kuye. 2 Puye opa ongala vali keshe ou a fininikwa nakeshe ou e neengele, nakeshe ou a li e nomwenyo mwii. Ndele ye a ninga omukulunhu wavo, onghee pa li pamwe naye ovalumenhu ve fike pomafele ane ngeno. 3 David ta di ko, ta i kuMispa shomuMoab ndee ta ti kohamba yaMoab: “Efa, tate nameme ve uye va kale punye, fiyo handi ka shiiva osho Kalunga te shi ningile nge.” 4 Ndele ye okwe va eta koshipala shohamba yaMoab ndele va kala ko omafiku aeshe David a kala mohotengulu yokomhunda. 5 Ndelenee omuxunganeki Gad okwa lombwela David ta ti: “Ino kala mohotengulu yokomhunda. Dja po u ye koshilongo shaJuda. Ndele David okwa dja po ndee te uya mofuka yaHeret.”

Saul ta dipaa oonakukalamo muNob

6 Saul eshi a uda nokutya, pa shiivika apa David novalumenhu ava va li puye, apa ve li, osheshi Saul okwa kala omutumba muGibea koshikulundu momuti womutamarisk, e neonga meke laye novapiya vaye aveshe va kala ofika puye. 7 Saul okwa lombwela ovapiya vaye ava va kala ofika puye ta ti: “Pwilikineni nye, Ovabenjamin! Omumati omona waIsai ote ke mu pa yo tuu amushe omapya noikokola yomiviinyu, noku mu lenga nye amushe mu ninge ovaneyovi novanefele? 8 Nye amushe eshi mwa hangakena nge ndele kapa li nande umwe a hololela nge nokutya, omona wange a panga oukaume nomona waIsai ndele nande umwe munye ina yavala nge nokuhololela nge nokutya, omona wange okwa xwameka omupangelwa wange a hondjaunine nge, ngaashi shi li nena eli.”

9 Opo nee Doeg, Omuedom, ou a kala ofika povapiya vaSaul, a nyamukula ta ti: “Ame nda mona omumati omona waIsai te uya muNob, kuAhimelek yaAhitub. 10 Ndele ye okwe mu pulila kOmwene ndele e mu pa onghuta. Ye okwe mu pa yo eongamukonda laGoliat, Omufilisti.” 11 Opo nee ohamba ya tuma ko, va ka tale Ahimelek yaAhitub, omupristeli neumbo laye alishe, novapristeli ava va li muNob, ndele vo aveshe ve uya kohamba. 12 Ndele Saul ta ti: “Pwilikina, oove omona waAhitub!” Opo nee ye ta nyamukula: “Aame ou, omwene wange!” 13 Ndele Saul ta ti kuye: “Omolwashike mwa hangakena nge, nye nomona waIsai, ove eshi we mu pa omungome neongamukonda, ndele we mu pulila kuKalunga, opo a hovele okuhondjaunina nge ngaashi shi li nena eli?” 14 Opo nee Ahimelek ta nyamukula ohamba nde ta ti: “Ndelenee olyelye mokati kovapiya voye e shii okulineekelwa ngaashi David, oshitenya shohamba, ndele a ninga omukulunhu wovanangeli voye ndele a fimanekwa meumbo loye? 15 Hasho shotete nde mu pulila kuKalunga? Nashi kale nge kokule! Ohamba iha vele omupiya waye neumbo lange alishe ombedi. Osheshi omupiya woye ina shiiva sha shomoshinima eshi ngeenge shinini ile shakula.” 16 Ndelenee ohamba tai ti: “Ahimelek, ove ou nokufya shili, ove neumbo loye alishe.” 17 Ndele ohamba tai ti kovakwaita vokolupadi ava va kala ofika puye: “Eheneni oku mu dipae ovapristeli vOmwene, shaashi vo ova ama kuDavid. Osheshi vo va shiiva ye okwa ya onhapo, ndelenee inave shi hololela nge.” Ndelenee ovapiya vohamba va li inava hala okunana omake avo, va dipaa ovapristeli vOmwene. 18 Opo nee ohamba tai ti kuDoeg: “Ehena oku, ove u dipae ovapristeli.” Opo nee Doeg, Omuedom, a ehena po ndee ta dipaa ovapristeli. Ndele mefiku tuu olo ye okwa dipaa ovalumenhu omilongo hetatu navatano ava va djala oikutu yoliina yokomapepe. 19 Noonakukalamo muNob, oshilando shovapristeli va dipawa neongamukonda, omulumenhu nomukainhu, okaana nokahanana, neengobe yo neendongi needi. 20 Ndelenee umwe womovana ovamati vaAhimelek yaAhitub okwa xupifwa, nedina laye la li Abjatar. Ye okwa ya onhapo kuDavid. 21 Abjatar eshi a hepaululila David nokutya, Saul a dipaa ovapristeli vOmwene, 22 David ta ti kuAbjatar: “Mefiku tuu linya Doeg, Omuedom a kala ko, ame nda li ndi shi shii, nokutya ye ote ke shi hepaululila shili Saul. Ndi noushima molwefyo lovakwapata voye aveshe. 23 Kala pwaame, ino tila. Osheshi ovo hava kongo omwenyo wange, otava kongo yo omwenyo woye, osheshi ove u neameno liwa pwaame.”