Omudo wemangululo
1 “Pexulilo lomudo omutiheyali u nokwiingida emangululo. 2 Ndele onghedi yemangululo oyei: onakuyandja oikolo keshe, a pa mukwao oikolo, ne i efe, ye ehe nokufininika omushiinda shaye nomukwao, osheshi emangululo la vilikilwa okufimanekifa Omwene. 3 Omunailongo ou noku i mu pula, ndelenee oyo yomukweni, u noku i pula ngeno, ahowe, u noku i efa. 4 Ndelenee mokati keni ngeno itamu kala nande ohepele, osheshi Omwene ote ke ku nangeka noupuna unene medu olo Omwene Kalunga koye te ke li ku pa efyuululo u li nangale; 5 ngeenge ho pwilikine shili ondaka yOmwene Kalunga koye u diinine shili oipango aishe ei ame handi ku lombwele nena eli. 6 Osheshi Omwene Kalunga koye ote ku nangeke noupuna ngaashi e ku udanekela, opo nee to dulu okuyandja eengele koiwana ihapu, ndelenee ove mwene ito pumbwa okutambula eengele, ndele ove oto ka pangela oiwana ihapu, ndelenee yo itai ku pangele.
Eehepele novapika
7 “Mokati keni ngeenge omu nohepele yomovakweni peenhu deni moshilongo osho Omwene Kalunga keni ote ke shi ku pa, ino kukutika omwenyo woye, ndele ino kumatela eke loye komukweni ohepele. 8 Ndelenee eke loye u noku li mu kamutulukila noku mu pa nehafo eshi ye te shi pumbwa moluhepo laye. 9 Lungama, momwenyo woye muha kale omadiladilo mai, nokutya omudo omutiheyali, omudo wemangululo, ou li popepi, ndele uha tale omukweni ohepele kombada yomesho, ove uhe mu pe sha. Ye ngeenge ta kuu kOmwene molwoye, oove to pewa etimba. 10 U noku mu pa nehalo liwa, nomwenyo woye uha kale u noluhodi, osheshi omolweeshali doye Omwene Kalunga koye ote ke ku nangeka noupuna moilonga yoye aishe oyo ove ho i longo. 11 Eehepele eshi tadi ka kala alushe moshilongo, onghee hano ame ohandi ku lombwele: ‘Eke loye li kamutulukile nehalo liwa komukwanaluhepo nohepele, ava ve li moshilongo sheni.’
12 “Omukweni omulumenhu Omuheberi ile omukainhu Omuheberi, ngeenge te lilandifa po kwoove, ye e noku ku longela omido hamano. Ndelenee momudo omutiheyali u noku mu mangulula noku mu lekela. 13 Ndele ngeenge to mu lekele noku mu mangulula, ino mu lekela a dje po hamakasha. 14 Ndelenee u noku mu pa nehalo liwa meedi doye nomoshipale shoye nomoshikolelo shoye, musho Omwene Kalunga koye e ku nangeka noupuna, musho u noku mu pa. 15 Dimbulukwa nokutya, ove mwene owa li omupika medu laEgipiti, ndele Omwene Kalunga koye e ku xupifa mo. Onghee hano ame ohandi ku lombwele eshi.
16 “Ndelenee winya ngeenge te ku lombwele ta ti: ‘Inandi hala okudja po pwoove,’ osheshi ye e ku hole neumbo loye yo, shaashi pwoove ye e udite ouwa, 17 opo nee u nokukufa oshityuulifo ndele u nokutyuula okutwi kwaye pomhango yonhu, ndele ye na ninge omupika woye fiyo alushe. Osho ngaha u nokuninga yo nomupika woye omukainhu. 18 Ino liudila oudjuu oku mu efa a ye, osheshi ye e ku longela omido hamano, e dule ovalongeli vondjabi vavali tave ku longele omafiku; nOmwene Kalunga koye ote ke ku nangeka noupuna mwaashishe ho longo.
Oiveli yoimuna
19 “Oiveli aishe yeemhedi tai dalwa meengobe doye nomoimuna yoye, ove u noku i yapulila Omwene Kalunga koye. Ino longifa oshiveli shomeengobe, ndele ino kulula oiveli yomeedi doye. 20 Koshipala shOmwene Kalunga koye onye neumbo loye mu noku shi lya omudo keshe monhele oyo Omwene te ke i hoolola. 21 Ndelenee musho ngeenge omu noshipo sholutu, ngeenge tashi shongola ile oshipofi ile keshe oshipo shi shi na, opo nee ino shi yambela Omwene Kalunga koye. 22 Peenhu doye ove to dulu oku shi lya, ava va yela naava inava yela, ngaashi omenye ile ongalangobe tai liwa. 23 Ashike inamu lya ohonde. I tileni poshi medu ngaashi omeva.
© Oshikwanyama Bible Revised © Bible Society of Namibia, 2008, 2012.
