Eindilo moudjuu unene
Epsalome lOvakora, ounongoimbilo wa pewa enyakwa lolwiimbo oku u imba mondaka yoluhodi; wa totwa kuHerman, Omuesrahi.
1 Omwene, Kalunga kexupifo lange,
omutenya aushe ohandi ku ifana,
noufiku ohandi ingida mokule koshipala shoye.
2 Eindilo lange ngeno li fike kwoove,
endekela okutwi kwoye kokweehela kwange.
3 Osheshi omwenyo wange owa tunyukwa omaudjuu,
nokukalamwenyo kwange
otaku likokele popepi noshovafi.
4 Ame nda valelwa nokuli
mongudu yaava tava i meembila;
ondi li po oshimenhu, shihe na vali eenghono.
5 Mokati kovafi, omo ndi na omulele wange,
ondi li mo ngaashi ovadipawa,
ava va pakwa meembila,
noitava dimbulukiwa vali kwoove.
6 Owa undulila nge moshovafi mokule,
momulaulu fokofoko mombwili mwi.
7 Ehandu loye otali lyaminikile nge pedu,
omakufikufi oye oto a findilifa nge koshi. Sela
8 Ookaume kange aveshe we va amukifa kwaame,
wa dinifa nge kuvo,
onda patekena, noitandi dulu okudja mo.
9 Omesho ange otaa twikifwa koudjuu;
keshe efiku ohandi ku ifana, Omwene,
omaoko ange ohandi a aneke kwoove.
10 Movafi mbela oto dulu okulongela mo oikumwifa,
ile oilulu tai nyumuka mbela i ku tange? Sela
11 Mombila ohamu hepaululwa tuu ouwanghenda woye,
ile monhele yeolelo oudiinini woye?
12 Eenghonokumwifa doye
otadi udifwa mbela momulaulu,
nouyuki woye mbela moshilongo
omo itamu lidimbulukiwa vali?
13 Onghee ohandi ingida mokule kwoove, Omwene,
nongulangula eindilo lange otali ku shakeneke.
14 Omwene, oshike to ekelele shi omwenyo wange,
to holeke nge oshipala shoye?
15 Aame omunamupya oshingone, nghee nda dja,
onda humbatifwa omatilifo oye, onda loloka.
16 Okuxwama kwehandu loye okwa wila nge,
noitilifa yoye oya hanauna nge po.
17 Alushe oi li po tai kondekele nge
ngaashi omeva, ya shakavaena aishe.
18 Ookaume kange novashiivikile we ve liteekifa nge;
omulaulu auke wa kalela nge.
© Oshikwanyama Bible Revised © Bible Society of Namibia, 2008, 2012.
