Keongalo lokuSarde
1 “Nomweengeli weongalo lokuSarde mu shangela: ‘Ou e kwete eemhepo heyali daKalunga neenyofi edi heyali, Oye ta ti ngaha: Oilonga yoye ondi i shii, u nedina wa fa u nomwenyo, ndelenee owa fya. 2 Penduka u pashuke, ove u pameke oyo ya xupa po, oyo i li pokufya, shaashi oilonga yoye inandi i hanga ya wana koshipala shaKalunga. 3 Dimbulukwa hano nhumbi wa pelwe nowa udile, ove u shi diinine u lidilulule. Ndelenee ngeenge ito kala wa pashuka, ohandi uya ngaashi omulunga, ndele ku na apa to ka shiiva otundi oyo handi ku hange. 4 Ndelenee ou na yo ovanhu vamwe muSarde, inava nyateka oikutu yavo, vo otava ka enda pamwe naame va djala oikutu itoka, osheshi ove shi wana. 5 Ou ta findi, ota djalekwa oikutu itoka, nedina laye itandi li dimi mo membo lomwenyo, ndelenee edina laye ohandi li hepaulula koshipala shaTate nomoipafi yovaengeli vaye.
6 “ ‘Ou e nokutwi, na ude ko eshi Omhepo tai shi lombwele omaongalo.’
Keongalo lokuFiladelfia
7 “Nomweengeli weongalo lomuFiladelfia mu shangela, to ti: ‘Omuyapuki nOmunashili, ou e kwete oshapi yaDavid, ou ta yeulula nopehe na ou ta idile po, ndele ta idile po, ndele kape na ou ta yeulula po, Oye ta ti ngaha:
8 “ ‘Oilonga yoye ondi i shii; tala, onda tula komesho yoye oshivelo sha yeululwa, ndele kape na ou ta dulu oku shi idila po; osheshi nande u neenghono dinini, ove owa diinina ondjovo yange, ndele ino lidimbika edina lange. 9 Tala, ohandi ku pe vamwe vomongudu yaSatana, ovo have liti, ovo Ovajuda, ndele havo, ohava fufya ashike. Tala, ohandi ke va ninga, ve ke uye kwoove, ndele tave linyongamene keemhadi doye, ndele tava ka shiiva, nokutya, ondi ku hole. 10 Molwaashi wa diinina ondjovo youtalanheni wange, naame yo ohandi ke ku diinina mefimbo leyeleko olo tali uya kombada yedu alishe okuyeleka oonakukala kombada yedu. 11 Tala, ohandi uya diva; diinina shili eshi u shi kwete uha nyekwe oshishani shoye nande kuumwe. 12 Ou ta findi ohandi mu ningi ongudi motembeli yaKalunga kange, ndele ye ita di mo vali, ndele handi mu shange edina laKalunga kange, nedina loshilando shaKalunga kange, oshaJerusalem Shipe tashi kuluka, tashi di meulu kuKalunga kange, edina lange lipe. 13 Ou e nokutwi, na ude eshi Omhepo tai shi lombwele omaongalo.’
Keongalo lokuLaodikea
14 “Nomweengeli weongalo lokuLaodikea mu shangela: ‘Ou Amen, omuhepaululi omudiinini nomunashili, efina leshito laKalunga, Oye ota ti ngaha:
15 “ ‘Oilonga yoye ondi i shii, ove eshi ku fi omutalala nouhe fi omupyu. Ngeno owa li umutalala ile umupyu. 16 Hano eshi wa lomoka ndele uhe fi mutalala nouhe fi mupyu, onghee hano nda hala ndi ku kunge mo mokanya kange. 17 Shaashi ove oto ti: Aame oshipuna, heeno, nda punapala, ndihe na eshi nda pumbwa, ndele ku shi shii, nokutya ove epongo, omukwanaluhepo, omupofi, u li hamunghele. 18 Ohandi ku pe eendunge, u lande kwaame oshingoldo sha yelifwa momundilo, u punapale, noikutu yoye itoka u i djale, opo ohoni youhamunghele woye iha monike, omaadi omesho, u vaeke omesho oye u mone ko. 19 Aveshe ava ndi va hole, ohandi va handukile ndele handi va tekula nedengo. Kala hano nouladi ove u lidilulule. 20 Tala, ondi li ofika poshivelo ndele handi konghola, ngeenge ope na ou ta udu ondaka yange ndele ta yeulula oshivelo, ohandi piti nokuuya kuye, ndele hatu li ouvalelo pamwe naye, naye pamwe naame. 21 Ou ta findi, ohandi mu kaleke omutumba pamwe naame kolukalwapangelo lange, ngaashi Ame nda finda ndele ndi li omutumba pamwe naTate okolukalwapangelo laye. 22 Ou e nokutwi, na ude ko eshi Omhepo tai shi lombwele omaongalo.’ ”
© Oshikwanyama Bible Revised © Bible Society of Namibia, 2008, 2012.
