1 SAMUEL 28 - Oshikwanyama Bible (OKYB)

Saul ta i kuEndor kondudu

1 NOvafilisti eshi va ongela omatanga avo ovakwaita pomafiku enya, va ka homone Israel, Akis ta ti kuDavid: “Ove u shi shii nokutya, u nokuya naame koita, ove mwene novakwaita voye.” 2 Opo nee David ta ti kuAkis: “Eewa, ove u shi shii, omupiya woye, eshi ye te ke shi ninga.” Ndele Akis ta ti kuDavid: “Ame ohandi ku ningi omukulunhu wongudu yovanangeli vange fiyo alushe.”

3 Ndele Samuel okwa fya nOvaisraeli aveshe ve mu lila ndele ve mu paka mu Rama nokutya, moshilando shaye. Ndele Saul okwa taataa moshilongo ovashitukifi vovafi novamonikokule. 4 Opo nee Ovafilisti va ongala ndele ve uya moshilongo ndele va onga onhanda muSunem. Ndele Saul okwa ongela Ovaisraeli aveshe ndele va onga onhanda kuGilboa. 5 Saul eshi a mona onhanda yOvafilisti, okwa tila, nomwenyo waye wa kakama. 6 Ndele Saul okwa pula kOmwene, ndelenee Omwene ine mu nyamukula sha, nande meendjodi ile muUrim ile movaxunganeki. 7 Ndele Saul ta ti kovapiya vaye: “Kongelei nge omukainhu omushitukifi wovafi, ndi shiive okuya kuye ndi mu pule.” Novapiya vaye tava ti kuye: “MuEndor omu nomukainhu omushitukifi wovafi.” 8 Opo nee Saul e lidimbika nokwa djala oikutu imwe ndele ta i pamwe novalumenhu vavali. Ndele vo eshi ve uya komukainhu oufiku, okwa tya: “Xunganekele nge meenghono domhepo yomufi u pendulile nge umwe, ou handi mu ku lombwele.” 9 Ndelenee omukainhu ta ti kuye: “Ove mwene u shi shii Saul eshi a ninga. Nhumbi ye a taataa mo moshilongo ovashitukifi vovafi novamonikokule. Omolwashike hano tamu tele nge omwiyo mu dipae nge?” 10 Opo nee Saul te mu anene pOmwene, ndele ta ti: “Oshili, ngaashi Omwene e nomwenyo, ito ka handukilwa omolwoshinima eshi.” 11 Nomukainhu ta pula: “Olyelye handi ke ku pendulila?” Ndele ye ta ti: “Pendulile nge Samuel!” 12 Ndelenee omukainhu eshi a mona Samuel, okwa ingida pombada, nomukainhu okwa lombwela Saul ndele ta ti: “Omolwashike wa kengelela nge? Oove mwene Saul!” 13 Nohamba ye mu nyamukula: “Ino tila. Ndelenee to mono shike?” Nomukainhu ta ti kuSaul: “Ame ohandi mono omunamwenyo wopakalunga ta mbaduka medu.” 14 Ye te mu pula: “Oye a tya ngahelipi?” Ndele ye ta nyamukula: “Omuxungu a djala oshikutu shokombada, ta mbaduka.” Opo nee Saul eshi a dimbulukwa nokutya, winya oSamuel, ye okwe linyongamena poshi nokwa wila eombe. 15 Ndele Samuel ta ti kuSaul: “Omolwashike to lipyakidile nge, eshi wa mbadukififa nge mo?” Ndele Saul ta nyamukula: “Ame ondi li moudjuu muhapu unene, osheshi Ovafilisti va homona nge, ndele Kalunga okwa efa nge ndele ita nyamukula nge sha vali movaxunganeki ile meendjodi. Onghee hano nde ku ifana u shiivifile nge nhumbi ndi nokuninga?” 16 Ndele Samuel ta ti: “Ndelenee omolwashike to pula nge, fimbo Omwene e ku efa nokwa ninga omutondadi woye? 17 Omwene osho a ninga ngaashi e ku lombwela mokanya kange: Omwene okwe ku kufa ouhamba nokwe u yandja komukweni David. 18 Osheshi ove ino dulika kondaka yOmwene ndele ino wanifa oupyuhandu waye mOvaamaleki, onghee hano Omwene e ku ningila nena oshinima eshi. 19 NOmwene ota ka yandja Israel pamwe naave meke lOvafilisti, ndele mongula ove novana voye ovamati otamu ka kala pwaame. Omatanga ovakwaita Ovaisraeli Omwene te ke a yandja momake Ovafilisti.” 20 Ndele Saul okwa wila poshi, a nangala, nokwa tila unene omolweendjovo daSamuel, muye inamu kala vali eenghono, osheshi ina lya sha efiku olo alishe noufiku ou aushe.

21 Ndelenee omukainhu okwa ya kuSaul; ndele ye eshi a mona nokutya, Saul a haluka unene, ye okwa tya kuye: “Tala, omupiya woye omukainhu e ku uda ndele a yandja omwenyo waye mefyo, ndele a pwilikina eendjovo doye we di mu lombwela. 22 Ndele paife ove mwene u nokuuda omupiya woye omukainhu. Ame ohandi ku etele okapambu komungome u lye, opo u mone eenghono ndele u shiive vali okweenda nondjila yoye!” 23 Ndelenee ye okwa anya ndele ta ti: “Ame inandi hala okulya.” Ndelenee eshi ovapiya vaye nomukainhu ve mu fininika, ye okwe va uda nokwa penduka po ndele ta kala omutumba pombete. 24 Nomukainhu okwa li e nokatana moshuunda peumbo, ndele e ka toma diva, nokwa kufa oufila nokwe u pilula ndele ta teleke oikuki ihe nonhafi. 25 Opo nee ye e i eta pomesho aSaul nopomesho ovapiya vaye. Ndele vo va lya ndele va fikama, ndele tava i oufiku tuu ou.