2 SAMUEL 12 - Oshikwanyama Bible (OKYB)

Elidilululo laDavid nokuhandukilwa kwaye

1 Onghee hano Omwene a tuma Natan kuDavid. Ye eshi e uya kuye, ota ti kuDavid: “Moshilando shimwe mwa li ovalumenhu vavali: umwe oshipuna nomukwao omukwanaluhepo. 2 Noshipuna sha li shi nomaufita manene eedi neengobe, 3 ndelenee omukwanaluhepo okwa li ehe na nande osha, okadjona kamwe akeke e ke lilandela nokwe ka palula ndele ka kula pamwe novana vaye. Oko ka lya kokapambu komungome waye ndele ka nwa meholo laye ndele ka nangala mekolo laye, ndele ka kala puye ngaashi omona waye okakadona. 4 Ndele omweenda eshi e uya komulumenhu oshipuna, osha luvapala okukufa meedi dasho ile meengobe dasho shi dipaele sha omweenda ou e uya kusho, onghee hano sho sha kufa okadjona komukwanaluhepo ndele she ka pakela po omweenda ou e uya kusho.” 5 Ndele David okwa handuka unene ndele ta ti kuNatan: “Oshili, ngaashi Omwene e nomwenyo, omulumenhu ou e shi ninga, e nokufya! 6 Nokadjona e noku ka futa eedi nhee, shaashi a ninga oshinima eshi ndele ina fya olukeno.” 7 Opo nee Natan ta ti kuDavid: “Omulumenhu ou oove! Omwene Kalunga kaIsrael ta ti: ‘Ame nde ku vaeka u ninge ohamba yaIsrael, ndele Ame nde ku xupifa meke laSaul; 8 ndele Ame nde ku pa eumbo lomwene woye novalikadi vomwene woye mekolo loye. Ndele Ame nde ku pa epata laIsrael nolaJuda. Ndele osho ngeenge osha li shinini, ngeno ohandi ku wedele ko vali oinima ya tya ngaha. 9 Omolwashike wa dina ondjovo yOmwene mokulonga osho inashi yuka momesho aye? Uria, Omuheti, ove we mu dipaa neongamukonda, nomwalikadi waye we mu kufa a ninge omwalikadi woye, eshi we mu dipaifa eongamukonda lovana vaAmmoni. 10 Ndele paife eongamukonda itali ka efa fiyo alushe epata loye, osheshi wa dina nge, ndelenee wa kufa omwalikadi waUria, Omuheti, a ninge omwalikadi woye.’ 11 Omwene osho ta ti: ‘Tala, omeumbo loye Ame ohandi ke ku etela oshiponga, ndele handi ka kufa ovalikadi voye moipafi yoye noku va yandja kumukweni, opo ye ta nangala novalikadi voye moipafi. 12 Ove we shi ninga meholeko, ndelenee Ame ohandi ka ninga oshinima osho moipafi yOvaisraeli aveshe nomoipafi yetanga.’ ”

David ta hepaulula etimba laye ndele te li diminwa po

13 Ndele David ta ti kuNatan: “Ame nda nyona kOmwene!” Ndele Natan ta ti kuDavid: “Onghee hano Omwene e ku dimina po etimba loye. Ito ka fya. 14 Ndelenee ove eshi wa shekifa unene Omwene noilonga yaye, okaana aka ke ku dalelwa ke nokufya shili.” 15 Opo nee Natan a ya keumbo laye. NOmwene okwa denga okaana aka ka dalelwa David komwalikadi waUria, opo ka hangika koudu mudjuu. 16 Ndele David okwa konga oshipala shaKalunga molwokaana. Ndele David okwa ninga efimbo te lidilike ndele eshi e uya keumbo, a nangala oufiku pedu longaho. 17 Opo nee ovakulunhu vomeumbo laye ve uya kuye ve mu lombwele a penduke pedu. Ndelenee ye ina hala. Ye ina lya nande omungome pamwe navo. 18 Ndele mefiku etiheyali okaana ka fya. Novapiya vaDavid va tila oku mu lombwela nokutya, okaana ka fya, osheshi va diladila: “Taleni, okaana fimbo ka kala nomwenyo fye twe mu lombwela ndele ine tu uda. Ohatu dulu ngahelipi oku mu lombwela: ‘Okaana ka fya!’ Ye ota dulu okuliningila sha shii.” 19 Ndelenee David eshi a dimbulukwa nokutya, ovapiya vaye tava nongofolelafana, David okwa shiiva nokutya, okaana ka fya. Ndele David okwa pula kovapiya vaye: “Okaana oka fya?” Ndele va nyamukula: “Heeno, oka fya!” 20 Opo nee David a penduka pedu ndele e likosha nokulivaeka ndele ta djala oikutu imwe ndele ta i kongulu yOmwene ndele ta indile. Opo nee e uya meumbo laye ndele ta pula eendja ndele ta li. 21 Opo nee ovapiya vaye tava pula kuye: “Oshike hano wa ninga? Okaana fimbo ka li nomwenyo ove we lidilika nokulila, ndelenee okaana eshi ka fya, ove wa penduka ndele to li eendja?” 22 Ndele ye ta ti: “Okaana fimbo ka li nomwenyo, ame nde lidilika nokulila, osheshi nda diladila: Kashiimba Omwene ta file nge onghenda opo okaana ka kale nomwenyo. 23 Ndelenee paife oka fya. Omolwashike ndi kale nokulidilika? Ame handi dulu mbela oku ka alula vali? Ame ohandi i kuko, ndelenee ko itaka aluka kwaame.” 24 David okwa hekeleka omwalikadi waye Batseba nokwa ya kuye, ndele ta nangala naye. Ye okwa dala okaana okamati nokwe ka luka Salomo. NOmwene okwa li e ka hole. 25 Ndele David e ka yandja ka tekulwe komuxunganeki Natan. Ndele ye e ka luka Jedidiya molwOmwene.

Oshilando shaRabba tashi teka

26 Ndele Joab okwa lwifa Rabba shovana vaAmmoni nokwa teya oshilando shohamba. 27 Opo nee Joab ta tumu ovatumwa kuDavid va tye: “Ame nda lwifa Rabba ndele nda nangala oshilando shomeva. 28 Hano ongela ovakwaita ava va xupa po, u kondekele oshilando u shi teye, opo ame ndihe shi teye medina lange.” 29 Opo nee David a ongela ovakwaita aveshe nokwa ya kuRabba nokwe shi lwifa ndele te shi nangala. 30 Ndele ye okwa kufa oshishani shokomutwe wohamba yavo. Oudjuu washo eekilograma omilongo nhatu nanhano yoshingoldo, ndele musho mwa li okamanya ke nondilo. Ndele sha tulwa komutwe waDavid. Ndele va kufa mo moshilando oixuulwa ihapu. 31 Noonakukalamo musho okwe va kufa mo nokwe va tula moilonga yoishaaxa, yeembike noyomapanda. Ndele e va tula mokuyofa eedopi. Nosho ngaha a ninga noilando aishe yOvaammoni. Opo nee David a shuna novakwaita aveshe kuJerusalem.