JESAJA 5 - Oshikwanyama Bible (OKYB)

Oshikokola shomiviinyu shihe na oiimati

1 Onda hala okwiimba omuholike wange, ame ndi imbe eimbilo lomuholike wange tali popi olo oshikokola shaye shomiviinyu. Omuholike wange okwa li e noshikokola shomiviinyu koshikulundudu sha wapala. 2 Nokwe shi lima, ndele ta fe mo omamanya nokwa twika mo eenhwika domiviinyu dinyenye, ndele ta tungile mo oshungo nokwa hongela mo oshikolelo shokukolela mo. Ndele ye okwa teelela, shi ime eeviinyu dinyenye, ndelenee osha ima eeviinyu domofuka. 3 Hano osho ngaha, nye Ovajerusalem novalumenhu muJuda, tokoleni pokati ketu noshikokola shange shomiviinyu. 4 Onda li ndi nokulonga ngahelipi hano oshikokola shange, oshike inandi shi longela? Osha imina hano shike eeviinyu domofuka, fimbo nda teelela shi ime eeviinyu dinyenye? 5 Onda hala ndi mu hololele, eshi handi ningile oshikokola shange shomiviinyu; ongubu yasho ohandi i umbulula, shi lifwe po, nekuma lasho ohandi li ngumauna po, shi lyataulwe po. 6 Ame ohandi shi efa shi ninge ofuka yongaho, shiha kokolwe vali, sho shiha limwe vali, shi mene omano neeshosholo, ndele handi lombwele oilemo ihe shi lokele vali odula. 7 Osheshi oshikokola shOmwene womatanga ovakwaita osho eumbo laIsrael, novalumenhu vaJuda oshikunino shehafo laye. Okwa li a teelela ouyuki, ndele tala, edipaafano nohonde, nokwa li a teelela omatokolo a yuka, ndele tala, ekuwaano lopombada.

Ehandu tali xunganekwa

8 Woo, ovo tava shaameke eumbo neumbo, ndele tava tula kumwe epya nepya, po kape na vali onhele; osho ngaha tamu nangala oshilongo, onye amuke. 9 Omwene womatanga ovakwaita osho a popya momatwi ange: Oshili, omaumbo mahapu otaa ka shituka omaputu, nao manene a wapala otaa kala ehe na oovene. 10 Osheshi oshikokola shomiviinyu otashi longwa kovanhu omulongo efiku limwe otashi imi eelita hetatu, noilya ya kunwa eelita efele nomilongo hetatu otai dala ashike eelita omulongo nahetatu. 11 Woo, ava hava meneka ongula inene ve lilongekidile ondala, ndele tava xungilile omaviinyu e va pupyaleke. 12 Ndele okaxumbafeta nonyalilo, nokangoma nofilita nomaviinyu, oyo i li moitendele yavo, ndele vo ihava tale oilonga yOmwene, eshi ta ningi, ngaashi ihava koneke oilonga yomake aye. 13 Onghee hano ovanhu vange otava i moukwatwa omolwaashi vehe na eshiivo, novanamadina otava ka fya ondjala, novakolokoshi otava ka undikwa kenota. 14 Opo nee oshovafi otashi mbwalangadjifa omunino ndee otashi makula okanya kasho ka mbwalangadja unene; nomo otamu mbolokotele ovanamadina vaJerusalem novafyoona noipuna novahafi. 15 Opo nee omunhu ota ka xutulwa, nomulumenhu ota ka findilwa poshi, nomesho ovalinenepeki otaa ninipikilwa poshi. 16 Ndelenee Omwene womatanga ovakwaita ota ka kala omunene molwomatokolohandu, naKalunga omuyapuki ote ve lihololele ngaashi Omuyapuki molwouyuki. 17 Ndele eedjona otadi ka lya ngaashi poulifilo wado vene novanailongo otava ka lifa poikulukuma yoipuna 18 Woo ava, tava shili owii i neengodi dongaho nomatimba nomiya detemba, 19 ava tava ti: “Oshilonga shaye nashi endelele diva, opo tu shi mone; netokolo lOmuyapuki waIsrael nali ehene, tu li shiive!” 20 Woo ava, tava ti: Owii oo ouwa, nouwa oo owii, tava pilike ouyelele nomulaulu, nomulaulu nouyelele, tava ningi ounyenye oululu, noululu ounyenye. 21 Woo ovo, ve shii ovo ovanaendunge nove litala ve nomayele, 22 Woo ovo, va ninga ovaladi mokunwa omaviinyu nova ninga ovalumenhwelela mokudunga oikolwifa; 23 ovo hava tokolele omushima ouyuki molwombubo, ndele tava pe omuyuki oushima. 24 Onghee hano, ngaashi omutemo womundilo tau lafa po oihati, nongaashi omwiidi mukukutu tau ongotele mo momundilo, osho omidi davo tadi olo ngaashi onhata, nonhemo yavo tai i omhepo ngaashi ondwi, osheshi vo ova dina omhango yOmwene womatanga ovakwaita, nova sheka eendjovo dOmuyapuki waIsrael. 25 Onghee hano ehandu lOmwene ola hanga oshiwana shaye, e shi yelulila eke laye, ndele te shi denge, neemhunda oda kakama noimhu yasho oya li momapandavanda ngaashi oushosho. Ndele mwaaishe ei ehandu laye inali kandulwa po, ndelenee natango eke laye ola yeluka.

26 Ndele Oye ta ka yelulila oshiwana shokokule epandela, ndele te shi ifana nomwilwa okominghulo adishe dedu. Ndele tala, divadiva otave uya nokweendelela. 27 Mokati kavo kamu na omuloloki ile omupunduki, kamu na ou ta kumuka ile ta kofa, nekwamo itali di mo moshiya, nomwiya weenghaku davo itau tokoka. 28 Oikuti yavo oya honga nomauta avo okwa lukilwa. Omakondo eenghambe davo ngaashi emanya likukutu, nomaulu omatemba avo ngaashi okafudaela. 29 Nonghuwo yavo ongaashi onghoshi yonghadi tai kumbu, ngaashi onghoshi onyasha tai ono ndele tai hakana oshihakanwa notai shi kokolola, ndele kape nomuxupifi. 30 Ndele mefiku tuu olo venya otava ka ngunguma kombada yavo ngaashi engungumo lefuta. Opo nee otapa talwa medu, ndele tala, oku na omulaulu auke noudjuu womeni; nouyelele wa laulikwa koilemo yao.