Tu kaleni memanguluko twe li longekidilwa kuKristus
1 Otwa mangululwa kuKristus tu kale memanguluko. Kaleni mwa pama, muha tulwe vali meti loupika.
2 Taleni, aame Paulus, handi mu lombwele, ngeenge tamu lipitififa etanda, Kristus ke na eshi te mu kwafa. 3 Ndele keshe tuu omunhu te lipitififa etanda, ohandi mu lombwele, oye oku nokuwanifa omhango aishe. 4 Onye amushe ava mwa hala okuyukipalifwa komhango, onye omwe likufa mo muKristus nomwa wa mo mefilonghenda. 5 Osheshi mOmhepo ohatu teelele etimaumbwile louyuki, omolweitavelo. 6 Osheshi muKristus Jesus nande epitotanda ile okuhapita etanda kaku nekwafo, ndelenee eitavelo hali longo mohole.
7 Onye mwa li hamu tondoka nawa. Olyelye e mu kelela okudulika koshili? 8 Ehongaulo olo inali dja mwaau te mu ifana. 9 Okanhafi kanini taka pifa olumbololo alishe lomungome. 10 Ame onde mu lineekela mOmwene kutya, kamu na nande ediladilo limwe. Ndelenee ou te mu limbilike, oye ta handukilwa, nande na kale olyelye. 11 Ndele ovamwatate, ame ngee handi udifa natango epitotanda, ohandi hepekelwa vali shike? Ngeno eshindo lomushiyakano kali po vali. 12 Ovapiyaaneki veni ngeno ove lilutule, ngeno xwepo!
Omumangululwa oha endifwa kOmhepo Iyapuki
13 Ovamwatate, omwa ifanenwa emanguluko, ndelenee inamu efa ombelela yeni i pwidukifwe kemanguluko, ndele yakulafaneni mohole. 14 Osheshi omhango aishe oya wanifilwa mondjovo ei imwe: “Hola mukweni ngaashi u lihole mwene.” 15 Ndelenee ngeenge nye hamu lumatafana nohamu lyana, litaleni, muha manafane po filu.
16 Ndelenee ohandi mu lombwele: kaleni nokweenda mOmhepo, onye noitamu wanifa vali ouhalu wombelela. 17 Osheshi ombelela oi nondubo nOmhepo, nOmhepo i nondubo nombelela; ohai kalafana i nondubo, opo muha ninge osho mwe shi hala. 18 Ndelenee nye ngeenge ohamu endifwa kOmhepo, opo nee kamu li koshi yomhango. 19 Ndele oilonga yombelela i li poluhaela, oyo ei: oluhaelo, oihole, onyata, okukalela olwisho loipala, 20 oukalele woikalunga, oundudu, etondafano, eemhata, oukodi, ehandu, omashilafano, omaliyalafano, oimhanga; 21 efupa, omadipao, oukolwe, eenhingo naikwao ya fa ei, nda tetekela oku i mu lombwela, ngaashi nde mu lombwelele, kutya ava tava longo oilonga ya tya ngaha, itava ka fyuulula ouhamba waKalunga. 22 Ndelenee oiimati yOmhepo oyo ei: ohole, ehafo, ombili, onheni, oukaume, ouwa, oudiinini, engungumano, elididimiko. 23 Kape nomhango i nondubo noilonga ya tya ngaha. 24 Naava vaKristus Jesus ova valela ombelela yavo nouhalu wavo nolwisho lavo komushiyakano.
25 Hano ngeenge otu nomwenyo womOmhepo, tu kaleni yo nokweenda mOmhepo. 26 Inatu kaleni ovakongi vefimano longaho nokushindafana nokufilafana efupandubo.
© Oshikwanyama Bible Revised © Bible Society of Namibia, 2008, 2012.
