Job omudiinini wouyuki
1 Ndele Job okwa popya vali ndele ta ti: 2 “Oshili, ngaashi Kalunga e nomwenyo, ou a kufa nge eyukifo, nOmunaenghono adishe ou a nyikifa omwenyo wange oluhodi; 3 fimbo ndi nomwenyo nomufudo waKalunga momayulu ange, 4 omilungu dange itadi popi oipupulu nelaka lange itali fufya! 5 Nashi kale nge kokule, nye ndi mu pe ounongo. Fiyo handi ka fuda mo omufudo wange, itandi ekeleshi po ouyuki wange. 6 Ame ohandi dame kouyuki wange, itandi u efa nande. Eliudo lange itali vele nge ombedi nande efiku limwe lomokukala kwange.
7 “Omutondadi wange na ningwe ngaashi omuhenakalunga nomunandubo naame ngaashi omulongi wowii. 8 Elineekelo lashike omukolokoshi e li na, Kalunga eshi ta tete po okukala kwaye, Ye eshi ta kufa omwenyo waye? 9 Kalunga ota ka uda tuu onghuwo yaye, oluhepo ngee tali mu hange? 10 Ile ta dulu tuu okuhafela Omunaenghono adishe nokwiifana Kalunga efimbo keshe?
11 “Ame ohandi ke mu longa osho eke laKalunga tali longo. Osho shi li pOmunaenghono adishe itandi shi holeke. 12 Taleni, mwe shi mona nye vene amushe, omolwashike hano tamu diladila ngaho?
13 “Oshitukulwa shomuhenakalunga te shi pewa kuKalunga, noshifyuululwa shomufininiki te shi pewa kOmunaenghono adishe osheshi: 14 nande a kale e noludalo lihapu, lo tali ka liwa keongamukonda. Noitutuma yaye itai kutifwa komungome. 15 Ovo tava xupu po puye, otava ka fya koudu wolutapo, novafiyekadi itava lili eefya. 16 Ngeenge ta ndubile oisiliveli ngaashi ondwi, ndele ta ongele oikutu ngaashi edu, 17 heeno, ye ota ongele ndelenee omuyuki te i djala; nomuhenashipo ote litukulile oshisiliveli. 18 Ye ota tungu ongulu yaye ngaashi einyo lonhwishi nongaashi oshiyaamo sha dikwa komunangeli. 19 Ota ka nangala oshipuna, ndele ita ka kala oshipuna; nongeenge ta penduka, oupuna waye owa kana po. 20 Omahalukifo tae mu hange ngaashi omakungulukilo omeva. Oufiku oshikungulu oshe mu twala. 21 Omhepo yokoushilo tai mu twala, ye e nokwiililila. Noyo tai mu pepe mo monhele yaye. 22 Ndele Kalunga te mu umbu ehe nonghenda, ye e nokuya onhapo diva eke laye. 23 Ota pandulilwa omake ndele tave mu shikilwa omwilwa kovambulavo.
© Oshikwanyama Bible Revised © Bible Society of Namibia, 2008, 2012.
