Exulilo loupika womuBabilon tali xunganekwa
1 Ondjovo yOmwene oya hanga Jeremia lutivali fimbo a li a idililwa vali moluumbo longulu yodolongo, ndele tai ti: 2 Omwene, naku shi wanifa, osho ta popi, Omwene ou te shi longekida noku shi pameka, edina laye Omwene. 3 Ifane nge, handi ku nyamukula nohandi ku hololele oinima inene, tai nyenge eendunge, uhe i shii. 4 Osheshi Omwene Kalunga kaIsrael, ota popi ngaha, mokupopya eengulu doshilando eshi neengulu douhamba weehamba daJuda, da ngumunwa po moipafi yomakuma okukondeka noyeongamukonda, 5 nomokupopya ava ve uya okulwifa Ovakaldea; ndelenee otava ka yadifa omaumbo oimhu yovanhu ava, Ame nde va dipaifa mokuhanduka kwange, nomoupyuhandu wange. Nomolwowii wavo aushe, Ame nda holekela oshilando eshi oshipala shange: 6 Tala, ohandi ka etela oshilando eshi ouhaku neveluko, ndele handi ke va velula moku va yeululila ouyadi wombili nowoshili. 7 Ndele ohandi ka lundulula osho sha hanga Juda naasho sha hanga Israel, ndele handi va tungu va kale ngaashi nale. 8 Ndele ohandi ke va kosha oilonga yavo aishe ii ve i nyona kwaame, nonda hala oku va dimina po omatauluko avo aveshe, va nyona kwaame nokwe va twifa ondubo naame. 9 Ndele oshilando eshi otashi ka ninga efimano nehafo kwaame, nehambelelo noshinge koiwana aishe yokombada yedu, yo eshi tai udu ouwa ou aushe, handi u va ningile. Oyo tai ka tila nokukakama omolwouwa aushe ou nelao alishe eli ame ohandi ke li va pa.
10 Omwene ota ti: Monhele tuu ei tamu i popi, tamu ti: “Oya ninga eputu longaho, muhe novanhu noimuna,” omoilando yaJuda nomomapandavanda aJerusalem, mu li hamungaho, muhe novanhu, muhe novakalimo, muhe noimuna, 11 otamu ka udika vali ondaka yehafo nondaka yenyakuko, ondaka yomuhomboli nondaka yomuhombolwa nondaka yaava hava ti: “Hambeleleni Omwene womatanga ovakwaita, osheshi Omwene Oye muwa, nouwanghenda waye ohau kala fiyo alushe!” Nondaka yaava tava eta omayambo ehambelelo kotembeli yOmwene, osheshi osho sha hange oshilando ohandi ke shi lundulula, shi kale ngaashi nale, Omwene osho ta ti.
12 Omwene womatanga ovakwaita ota ti ngaha: Ponhele tuu apa pwa hanaunwa po, pehe na nande omunhu ile oimuna, nomoilando aishe yayo otamu ka kala oulifilo wovafita, tava ka tulumukifa eedi davo. 13 Moilando yokeemhunda nomoilando yomolufilu nomoilando yokoumbuwanhu nomoshilongo shaBenjamin nomomikunda daJerusalem nomoilando yaJuda ohamu ka kala eedi tadi pitile moipafi yomuvali, Omwene osho ta ti.
Messias ta xunganekwa
14 Taleni, omafiku otae uya, Omwene osho ta ti, ondjovo ei iwa nde i udaneka, nda popya eumbo laIsrael neumbo laJuda, ohandi ke i wanifa. 15 Pomafiku enya nomefimbo tuu olo ohandi ka tutumifila David oshitutumine shouyuki, ndele ye ota ka longa oshili nouyuki moshilongo. 16 Pomafiku enya Juda ota kulilwa naJerusalem tashi kala shihe nombudi, nedina lasho otali lukwa: “Omwene oye ouyuki wetu.” 17 Osheshi Omwene ota ti: Otapa ka kala alushe omulumenhu womepata laDavid, ta kala omutumba kolukalwapangelo leumbo laIsrael. 18 Nomovapristeli Ovalevi itamu ka pumba omulumenhu moipafi yange, ou ta eta omaxwikiloyambo, ndele ta xwike eendjayambo ndele ta longekida omatomenoyambo efimbo alishe.
Ehangano laalushe tali xunganekwa
19 Ndele ondjovo ei yOmwene oya hanga Jeremia. 20 Omwene ta ti ngaha: Ngeenge tamu dulu okuteya po ehangano lange nomutenya nehangano lange noufiku, paha kale vali ngeno omutenya noufiku pomafimbo avo, 21 opo nee ehangano lange naDavid, omupiya wange yo, tali ka teywa po, a kale ngeno ehe nomona ta pangele kolukalwapangelo laye, nehangano lange nOvalevi, ovapristeli, ovapiya vange. 22 Ngaashi eengudu dokeulu da nyengwa okuvalwa neheke lokefuta la nyengana okuyelekwa, osho ohandi ka hapupalifa oludalo laDavid, omupiya wange, novapristeli Ovalevi ovo tava longele nge.
23 Ondjovo ei yOmwene oya hanga vali Jeremia, ta ti: 24 Ino koneka oshiwana eshi tashi shi popi, tashi ti: “Omapata aa avali, Omwene e a hoolola, okwe a ekelashi?” Ndele tava dini oshiwana shange sha fa kashi fi vali oshiwana moipafi yavo. 25 Omwene ota ti ngaha: Oshili, ehangano lange pamwe nomutenya noufiku, nomaufomhango eulu nedu, ngeno inandi a pameka, 26 ngeno osho ohandi ka ekelashi yo oludalo laJakob nolaDavid, omupiya wange, ndiha hoolole mo moludalo laye ohamba, tai kala nokupangela oludalo laAbraham nolaIsak nolaJakob. Osheshi osho she va hanga ohandi ke shi lundulula nohandi va file onghenda.
© Oshikwanyama Bible Revised © Bible Society of Namibia, 2008, 2012.
