Satana ta yeleke vali Job
1 Ndele mefiku limwe ovana ovamati vaKalunga eshi ve uya koshipala shOmwene, Satana yo e uya pamwe navo a kale ofika koshipala shOmwene. 2 Opo nee Omwene ta pula Satana: “Oto di peni?” Ndele Satana ta nyamukula Omwene ndele ta ti: “Okokweendaenda kombada yedu nokweelaela.” 3 NOmwene ta pula Satana: “Ove wa didilika tuu omupiya wange Job? Osheshi kombada yedu kaku na nande umwe ngaashi ye: omulumenhu ehe noshipo nomuyuki, ta tila Kalunga ndele ta kukuma owii, ndele natango tuu ta anyene mouyuki waye, nande ove we mu shindila nge ndi mu nyone po, nande ehe nombedi.” 4 Opo nee Satana ta nyamukula Omwene ndele ta ti: “Oshipa omoshipa! Omunhu keshe osho e shi na, te shi yandjele omwenyo waye. 5 Ndele shamha to nane eke loye u kume omakipa aye nombelela yaye, ndele ye ote ke ku liteeka shili moipafi yoye!”
6 NOmwene ta ti kuSatana: “Tala, ye oku li meke loye. Xupifa ashike omwenyo waye!” 7 Ndele Satana okwa dja po koshipala shOmwene, nokwa umbila Job oidinda ii koshi yomhadi fiyo okombada yomutwe. 8 Ndele ye okwa kufa oshikangwa te linyae nasho ndele ta kala omutumba momute. 9 Opo nee omwalikadi waye ta ti kuye: “Natango tuu to anyene mo mouyuki woye? Efa Kalunga u fye!” 10 Ndelenee ye te mu nyamukula: “Ove to popi ngaashi elai tali popi! Fye ohatu tambula ouwa kuKalunga, nowii ngeno tuhe u tambule?” Pwaaishe oyo Job ina nyona sha nomilungu daye.
Ookaume kaJob tave uya kuye
11 Nookaume vatatu vaJob, eshi va uda oiponga aishe oyo ye mu hanga, ove uya, keshe umwe konhele yaye: Elifas, Omuteman, naBildad, Omusuhi, naSofar, Omunaamati. Ndele va ongala paudafano ve ke mu pendule noku mu hekeleka.…ova ongala paudafano ve ke mu pendule noku mu hekeleka. 12 Ndele eshi va li kokule ndele tava yelula omesho avo, va nyengwa oku mu dimbulukwa. Onghee hano va yelula ondaka yavo ndele tava lili. Keshe umwe womuvo a pombaula elwakani laye, ndele va unda ondwi komitwe davo. 13 Opo nee va kala omutumba poshi puye omafiku aheyali nomaufiku aheyali ndele nande umwe ina popya naye etumbulo nande limwe, shaashi va mona nokutya, ouyehame waye wa li mudjuu.
© Oshikwanyama Bible Revised © Bible Society of Namibia, 2008, 2012.
