MALAKIA 1 - Oshikwanyama Bible (OKYB)

Ohole yOmwene yokuhola oshiwana shaye Oshiwana inashi shiiva okupandula

1 Exunganeko, ondjovo yOmwene kuIsrael ya endela muMalakia. 2 Ame nda li ndi mu hole, Omwene ta ti. Ndelenee nye tamu pula: Ohole yoye ya holoka peni? Esau ke fi omumwaxe waJakob? Omwene ta ti. Ndelenee nda li ndi hole Jakob, 3 ndelenee nda li nda tonda Esau, ndele nda tokeka eemhunda daye, noshifyuululwa shaye nde shi yandja keembadje domombuwa. 4 Nge Edom tashi ti: Fye otwa hanaunwa po sheke, ndelenee fye ohatu ka tungulula omakulukuma, opo Omwene womatanga ovakwaita ta ti: Nava tunge, ohandi ke shi ngumauna po. Novanhu otave va luku: Onhele youkolokoshi, navali: Oshiwana eshi sha handukilwa kOmwene fiyo alushe! 5 Ndele omesho eni otae ke shi tala, ndele tamu ka tya: Omwene Ye omunene kombada yeengaba daIsrael!

6 Omona ta fimaneke xe, nomupiya omwene waye! Aame ngeenge oxo, efimaneko lange oli li peni? Naame ngeenge Omwene, etilo lokutila nge oli li peni? Omwene womatanga ovakwaita ta ti kunye ovapristeli, ohamu dini edina lange! Ndelenee nye tamu ti: Edina loye otwe li nyateka ngahelipi? 7 Nye otamu eta koaltari yange omingome da nyata, ndele tamu pula: Mushike twe ku nyateka? Eshi tamu ti: Oshililo shOmwene nashi dinike. 8 Ndele ngeenge tamu eta oshinamwenyo sha twika mu shi yambe, eshi kashi fi shii? Ndele ngeenge tamu eta odjona ile oshinamwenyo tashi vele, kashi fi shii? Shi twala ngeno kelenga loye! Lo otali ke ku hokwa mbela ile ove to mu wapalele? Omwene womatanga ovakwaita ta ti. 9 Heeno paife handukulukifeni Kalunga, Ye e tu filonghenda! Oinima ya tya ngaha mwe i ninga, Ye ota ka kala tuu e mu hokwa? Omwene womatanga ovakwaita ta ti. 10 Ngeno mokati keni mu kale umwe ou ta idile oivelo, muha shiive okutema omundilo oshimha koaltari yange! Ame inandi mu hokwa nande, Omwene womatanga ovakwaita ta ti, ndele itandi tambula eyambo tali di momake eni. 11 Osheshi edina lange otali kala linene mokati kovapaani kokudja kepito letango fiyo okokuningina kwalo. Ndele monhele keshe tamu twiminwa efimano ledina lange notamu etwa eyambo la koshoka. Osheshi edina lange otali kala linene mokati kovapaani, Omwene womatanga ovakwaita ta ti. 12 Ndelenee nye otamu li shekifa, eshi tamu ti: Oshililo shOmwene osha yapululuka noiimati yasho, eendja dasho da dinika. 13 Ndele nye tamu ti: Taleni, oudjuu u fike peni! Ndele nye tamu shi dini, Omwene womatanga ovakwaita ta ti. Ndele nye tamu eta oshimuna sha vakwa, ile shilema ile tashi vele; osho ngaha tamu eta omayambo! Ame ohandi hokwa tuu oku shi tambula momake eni, Omwene womatanga ovakwaita ta ti. 14 Omukengeleli na fingwe, ou e noshikombo oshindume mokati koikombo, ndele nande e shi udaneka, ta eta eshi shi noshipo osho a yambele Omwene. Osheshi Aame ohamba inene, Omwene womatanga ovakwaita ta ti, nedina lange ola tilika mokati kovapaani.