JOB 33 - Oshikwanyama Bible (OKYB)

Elihu ta twikile okupopya Kalunga a hala okutekula omunhu noku mu xupifa

1 “Ndele Job, pwilikina paife okupopya kwange, u ude eendjovo dange adishe. 2 Tala, ame nda makula okanya kange. Elaka lange tali popi koshi yondakona yange. 3 Eendjovo dange tadi di moshili yomutima wange; naasho sha shiivika komilungu dange otadi shi popi odikilila. 4 Omhepo yaKalunga ya shita nge, nomufudo wOmunaenghono adishe tau mwenyeke nge omwenyo. 5 Ngeenge ho dulu, nyamukule nge. Lilongekida u kondjife nge. Tanda ombinga! 6 Tala, ame ndi li ngaashi ove koshipala shaKalunga. Naame yo okapambu kelova. 7 Tala, ito pumbwa okutila nge, nomutengi wange itau ke ku djuupalela. 8 Ndelenee ove wa popya momatwi ange, naame nda uda ondaka yeendjovo wa tile: 9 ‘Aame omukoshoki, inandi tauluka, ndihe noshipo, mwaame kamu nombedi. 10 Taleni, Ye ota kongele nge eembedi dokuhandukila nge, ta tale nge ame omutondadi waye. 11 Ye ota tula eemhadi dange meti. Ta nangele eendjila dange adishe.’

12 “Tala, moshinima osho ku li mondjila osho handi ku nyamukula, osheshi Kalunga e dule omunhu. 13 Omolwashike we mu twifa eemhata, ye ngeenge ita nyamukula eendjovo adishe domunhu? 14 Osheshi Kalunga ta popi panghedi imwe, heeno, paenghedi mbali, ndelenee omunhu ite shi dimbulukwa. 15 Mondjodi, memoniko loufiku, ovanhu ngeenge tava wilwa keemhofi didjuu, ndele hava nangala momitala davo, 16 opo nee Ye ta fitulula omatwi ovanhu ndele ta pameke noshihako omakumaido aye, 17 opo a alule omunhu moshilonga shii nokwaamena omulumenhu kelinenepeko, 18 opo a amene omwenyo waye, uha ye mombila, nomwenyo waye keonga. 19 Omunhu ota handukilwa yo nouyehame momutala waye, momakipa aye eshi mu nolwoodi itali xulu po, 20 onghee nomwenyo waye tau nyonyodola omungome, nomutima waye eendja dinyenye. 21 Onhumba yaye tai kukuta, tai xulu po, ihe na vali ewapalo; nomakipa aye aa a li inaa monika, taa kunyuka. 22 Heeno, omwenyo waye tau ehene popepi nombila, nomhepo yaye popepi nomapangelonghono efyo. 23 Ngeenge pefimbo olo omweengeli ngeenge a ama kuye, omunghwandjila umwe womomayovi okushiivifila omunhu oshinakuwanifwa shaye, 24 opo nee Kalunga te mu file onghenda ndele ta ti: ‘Mu xupifa aha ye mombila, ame nda pewa oikulila.’ 25 Opo nee olutu laye tali ka fuluka vali eenghono dounyasha, ye ota shuna vali momafiku ounyasha waye. 26 Ye ota indile Kalunga ndele Ye okwe mu hokwa, onghee ta tale nehafo oshipala shaye. Osho ngaha hano Ye ota alulile omunhu ouyuki waye. 27 Ye ota imbile ovanhu ndele ta ti: ‘Ame nda nyona ndele nda nyona ouyuki, ndelenee ame inandi handukilwa pawii wange. 28 Ye okwa xupifa omwenyo wange mombila, nomhepo yange ya tala nehafo ouyelele.’

29 “Tala, ashishe eshi Kalunga te shi ningile omunhu luvali ile lutatu nokuli, 30 opo a alule omwenyo waye mombila, ndele a yelelwe kouyelele womwenyo. 31 Tala, Job, pwilikine nge! Mwena, ame ndi popye! 32 Ndelenee ngeenge u neendjovo, nyamukule nge. Popya, osheshi nehalo liwa nda hala ove u kale wa pewa ounongo. 33 Ngeenge hasho, pwilikine nge; mwena, ndi ku longe ounongo.”