OVAEFESO 1 - Oshikwanyama Bible (OKYB)

Ekundifo

1 Paulus, omuyapostoli waKristus Jesus okehalo laKalunga okovayapuki ava ve li muEfeso ovaitaveli muKristus Jesus. 2 Efilonghenda kunye nombili yaKalunga Tate yetu noyOmwene Jesus Kristus.

Oshilonga shaKalunga shefilonghenda

3 Kalunga naXe yOmwene wetu Jesus Kristus na hambelelwe, Oye ou e tu nangeka noupuna nomapuniko aeshe opamhepo moikwaulu omuKristus, 4 ngaashi e tu hoolola muye fimbo ounyuni inau shitwa, tu kale ovayuki notuhe noshipo koshipala shaye mohole, 5 eshi e tu nunina nale tu ninge ovana vaye muye omolwaJesus Kristus pahokwe yehalo laye, 6 okupandulifa efimano longhenda yaye e i tu pa mOmuholike.

7 Muye otu nekulilo omolwohonde yaye, edimepo lomanyonauno okoupuna wonghenda yaye, 8 oyo tuu oyo e i tu pa ihapu ihapu mounongo aushe nomeendunge adishe, 9 eshi e tu shiivifila oshiholekwa shehalo laye opahokwe yaye iwa ei, e i pangela muKristus, 10 omolwelelo leumbo, te ke li wanifa pakufika komafimbo, nokutya ta ka kwatakanifa muKristus aishe oyo yomeulu naai yokombada yedu.

11 Omuye nafye yo twa pewa oshipewa shefyuululo, osho twe shi nuninwa nale opamhangela yaye, Oye ou ta longo aishe payukifo lehalo laye mwene, 12 opo tu kale ehambelelo lefimano laye, fye ava twa tula etimaumbwile muKristus. 13 Nanye yo eshi mwa uda muye ondjovo yoshili, evaengeli lexupifo leni, eshi mwa itavela yo, omwa didilikwa muye noshilimbo shOmhepo Iyapuki, ou a udanekwa, 14 Oye ou a ninga ombabyona yefyuululo letu okukulila Omona waye nokuhambelelifa efimano laye.

Omuyapostoli ta ilikanene eongalo

15 Onghee hano naame yo, eshi nda uda eitavelo leni mOmwene Jesus nohole yeni yokuhola ovayapuki aveshe, 16 ihandi dimbuka okupandula Kalunga omolweni moku mu dimbulukwa momailikano ange, 17 nokwiindila opo Kalunga wOmwene wetu Jesus Kristus, Xe yefimano, e mu pe ngeno omhepo younongo noyehololo moku mu shiiva, 18 Ye a minikile omesho eni omomutima, opo mu shiive eteelelo olo mwe li ifanenwa, noupuna wefimano lefyuululo laye apa u fike movayapuki vaye, 19 nouneneyadi ndoondoo weenghono daye apa u fike kufye ava hatu itavele opakulonga kweenghono daye dinene, 20 odo e di holola muKristus, eshi e mu nyumuna movafi ndele e mu tula omutumba kolulyo laye momaulu, 21 kombada yomapangelo aeshe nomauhamba meenghonopangelo neenghono noumwenepangelo nakeshe tuu edina hali tumbulwa hamefimbo eli alike lopaife lounyuni ou, ndelenee nomulinya tali uya, 22 ndele aishe okwe i tula koshi yeemhadi daye, ndele okwe mu pa a kale omutwe waaishe keongalo, 23 olo olutu laye nouyadi waau ta yadifa aishe mwaaishe.