Oinakuwanifwa yOvakriste
1 Ounona nye, dulikeni kovakulunhu veni mOmwene, osheshi osho sha yuka. 2 “Fimaneka xo nanyoko,” osho oshipango shotete shi neudaneko: 3 “Opo u kale nelao nomwenyo mule kombada yedu.” 4 Nanye ooxe, inamu shinda ovana veni noku va handukifa, va tekuleni meduliko nomekumaido lOmwene.
5 Ovapiya nye, dulikeni koovene veni vomounyuni ngaashi kuKristus, nokutila nokukakama meyuko lomitima deni, 6 muhe va longele noihelele okuwapalela ovanhu, ndelenee ongaashi ovayakuli vaKristus nokulonga komwenyo ehalo laKalunga, 7 nokulonga nehalo liwa, mwa fa hamu longele Omwene, havanhu, 8 nye mu kale mu shi shii kutya, keshe ou ta longo ouwa washa, ote u alulilwa kOmwene, nge omupiya ile omudalwa.
9 Nanye yo oovene, osho va ningileni, efeni okutilifa, eshi mu shi shii, Omwene weni nowavo e li meulu, ndele munye kamu nokatongotongo.
Oilwifo yOmukriste
10 Ndele natango, ovamwatate, lipamekeni mOmwene nomeenghono domepangelonghono laye. 11 Lidikeni oilwifo aishe yaKalunga, opo mu dule okufikamena ekonda laSatana; 12 osheshi ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii mevalelwa.
13 Onghee hano tambuleni oilwifo aishe yaKalunga, mu shiive okulipopila mefiku lii nokukala ofika eshi mwa longa aishe. 14 Hano kaleni ofika mwe limanga oshiya sheni noshili, nye mwa djala ponhulo oipapa yoivela youyuki, 15 nelilongekeko tali di mevaengeli lombili li ninge eenghaku keemhadi deni. 16 Mwaaishe kwateni oshikelelifo sheitavelo, mu dule okudima po nasho oikuti yomunawii ya xwama omundilo, 17 nembale loshivela lexupifo li tambuleni, neongamukonda lOmhepo, nokutya, eendjovo daKalunga. 18 Eshi shi ningeni nomailikano nomaindilo aeshe nokwiilikana alushe mOmhepo ndele molwaasho kaleni mwa pashuka moudiinini aushe nokwiilikanena ovayapuki aveshe; 19 nomu ilikanene nge yo ndi pewe eendjovo da yuka, ngeenge handi popi nouladi okuholola, opo ndi udife nouladi oshiholekwa shevaengeli, 20 omolwalo aame omutumwa ndi li momalyenge ndi li udife nouladi ngaashi ndi nokupopya.
21 Ndelenee opo mu shiive okukala kwange nhumbi ndi li naasho handi ningi, Tikikus omumwatate omuholike nomuyakuli omudiinini mOmwene, oye te ke mu hepaululila aishe; 22 handi mu tumu kunye, mu kale mu shi shii nhumbi tu li, ye a hekeleke omitima deni.
23 Ombili nai kale novamwatate, nohole mumwe neitavelo kuKalunga Tate nokOmwene Jesus Kristus. 24 Efilonghenda nali kale naaveshe ava ve hole Omwene wetu Jesus Kristus mokuhaxula po. Amen.
© Oshikwanyama Bible Revised © Bible Society of Namibia, 2008, 2012.
