EXODUS 6 - Oshikwanyama Bible (OKYB)

Moses ta pewa eendjovo dimwe kOmwene

1 Opo nee Omwene okwa nyamukula Moses ndele ta ti: “Paife ove oto ka mona eshi handi ka ningila Farao. Osheshi molweke li neenghono ote mu lekele mu dje mo, heeno, okefininiko leke li neenghono ye ote ke mu taataa mo moshilongo.” 2 Kalunga okwa popya vali naMoses ndele ta ti kuye: “Aame Omwene, 3 ndele kuAbraham, kuIsak nokuJakob Ame nde ve liholela Kalunga Omunaenghono adishe, ndelenee Ame nde ve lihololela edina lange Omwene. 4 Nda ninga yo ehangano letu navo, ndi va pe edu laKaanan, edu lounailongo wavo, omu va kala; 5 ndele Ame nda uda yo ekemo lOvaisraeli ava va kwatwa moupika kOvaegipiti, ndele Ame nda dimbulukwa ehangano letu navo. 6 Onghee hano lombwela Ovaisraeli u tye: ‘Aame Omwene, ndele Ame ohandi ke mu kufa mo moshilonga shidjuu shOvaegipiti noku mu xupifa moupika wavo mudjuu ndele handi mu xupifa neke la yeluka nomatokolo manene, 7 Ndele handi ke mu tambula oshiwana shange naame Kalunga keni. Ndele tamu ka shiiva nokutya, Aame Omwene Kalunga keni, ou e mu pitifa mo moshilonga shidjuu shOvaegipiti. 8 Ndele Ame ohandi ke mu twala medu nde li udanekela nokwaana ndi li yandje kuAbraham naIsak naJakob. Ndele Ame ohandi ke li mu pa efyuululo; Aame tuu Omwene.’ ” 9 Opo nee Moses okwa popya nOvaisraeli, ndelenee vo inava pwilikina Moses, omolwokuhelidiinika nomolwoilonga idjuu. 10 Omwene okwa popya vali naMoses ndele ta ti: 11 “Inda u lombwele Farao, ohamba yaEgipiti, a lekele Ovaisraeli va dje mo moshilongo.” 12 Ndelenee Moses okwa popya koshipala shOmwene ndele ta ti: “Ovaisraeli eshi inava pwilikina nge; Farao ota ka pwilikina nge ngahelipi, eshi ame ndi nomilungu inadi pita etanda?” 13 Opo nee Omwene okwa lombwela Moses naAron ndele e va tuma kOvaisraeli neenghundana nokuFarao, ohamba yaEgipiti, nokupitifa mo Ovaisraeli moshilongo.

Eshikulafano lomapata Ovaisraeli

14 Oovene vomapata ovava: ovana ovamati vaRuben, oshiveli shaIsrael: Henok naPallu, Hesron naKarmi. Olo epata laRuben. 15 Novana ovamati vaSimeon: Jemuel naJamin, naOhad naJakin naSohar naSaul, omona womukainhu Omukaanan; olo epata laSimeon. 16 Nomadina ovana ovamati vaLevi oyaa pamapata avo: Gerson naKohat naMerari. Nomido daLevi, edi a kala nomwenyo, odo efele nomilongo nhatu nomido heyali. 17 Ovana ovamati vaGerson: Libni naSimei pamapata avo. 18 Novana ovamati vaKohat: Amram naIshar naHebron naUsiel. Nomido daKohat oda li efele nomilongo nhatu nomido nhatu. 19 Novana ovamati vaMerari: Mahli naMushi. Eli epata laLevi pashikulafano lomapata. 20 Ndele Amram okwa hombola Johobed, omumwaina waxe, ndele ye okwe mu dalela Moses naAron. Nomido daAmram da li efele nomilongo nhatu nomido heyali. 21 Novana ovamati vaIshar: Kora naNefek naSikri. 22 Novana ovamati vaUsiel: Mishael, Elsafan naSitri. 23 Ndelenee Aron okwa hombola Eliseba, omona okakadona kaAminadab, omumwaina waNashon. Ndele ye okwe mu dalela: Nadab naAbihu, Eliaser naItamar. 24 Novana ovamati vaKora: Assir naElkana naAbiasaf. Olo epata lOvakora. 25 NaEliaser, omona waAron, okwa hombola okakadona kamwe komovana vaPutiel. Ndele ye okwe mu dalela Pinehas. Ava ovakulunhu vomepata laLevi pashikulafano lomapupi avo.

26 Hano Moses naAron ova lombwelwa kOmwene: “Pitifeni mo Ovaisraeli medu lOvaegipiti pamatanga avo.” 27 Ovo tuu venya va popya naFarao, ohamba yaEgipiti, a pitife mo Ovaisraeli muEgipiti, Moses naAron. 28 Mefiku tuu olo Omwene okwa popya naMoses medu laEgipiti, 29 Omwene okwa popifa Moses neendjovo edi: “Aame Omwene. Lombwela Farao, ohamba yaEgipiti, ashishe eshi handi shi popi naave.” 30 Opo nee Moses okwa tya koshipala shOmwene: “Ame ndi nomilungu inadi pita etanda! Farao ota ka pwilikina nge ngahelipi?”