Israel ta shuninwa omwenyo
1 Eke lOmwene la kala kombada yange, ndele Ye okwa pitifa nge mOmhepo yOmwene ndele a kaleka nge pokati kefilufuka. Ndele lo la li li yadi oipongolo. 2 Ndele Ye okwa twalatwala nge keembinga adishe mokati kayo, ndele tala, opa li ongudu inene ya nangala mefilufuka, ndele tala, oyo aishe ya li ya kukuta unene. 3 Opo nee Ye a lombwela nge ta ti: “Kaana komunhu, oipongolo ei tai dulu tuu okuninga omwenyo?” Ndele ame nda nyamukula, handi ti: “Omwene Kalunga, Oove u shi shii.” 4 Opo nee Ye okwa lombwela nge ta ti: “Xunganekela oipongolo ei u i lombwele: Oipongolo ikukutu, udeni ondjovo yOmwene! 5 Omwene Kalunga ta ti ngaha koipongolo ei: Taleni, Ame ohandi pake mo munye omhepo, opo mu shiive okuninga ovanamwenyo. 6 Ndele Ame ohandi mu tula omifipa neenhumba kombada yeni nohandi pake oshipa kunye, nomeni leni handi mu pe omhepo, opo mu shiive okuninga ovanamwenyo; ndele nye otamu ka shiiva nokutya, Aame Omwene.” 7 Opo nee nda xunganeka ngaashi nda lombwelwa. Ndele eshi nda xunganeka, oshihomo sha udika, ndele tala, elinyengo! Ndele omakipa a ehenafana, keshe ekipa la ehena kekipa likwao. 8 Opo nee nda tala ndele nda mona kombada yao pa kala omifipa nonhumba ye uya kuwo, noshipa she a djalekwa, ndelenee muwo inamu kala omhepo. 9 Opo nee Ye okwa lombwela nge, ta ti: “Xunganekela omhepo, xunganeka, okaana komunhu, u tye komhepo: Omwene Kalunga ta ti ngaha: Akutu omhepo, ila, u dje keembinga adishe nhee dedu u fudile mo oonakudipawa ava va ninge ovanamwenyo.” 10 Ndele ame nda xunganeka ngaashi nda lombwelwa, Opo nee omhepo ye uya muvo, ndele vo va ninga ovanamwenyo, ndele vo va kala ofika, ongudu inene unene. 11 Opo nee Ye okwa lombwela nge ta ti: “Kaana komunhu, oipongolo ei oyo eumbo alishe laIsrael. Tala, vo ohava ti: Omakipa etu a kukuta, eteelelo letu la kana. Twa xula po sheke! 12 Onghee hano, xunganeka u va lombwele: Omwene Kalunga ta ti ngaha: Taleni, Ame ohandi ka lafulula eembila deni, ndele handi ke mu kufa mo meembila deni, akutu oshiwana shange, ndele Ame ohandi mu eta moshilongo shaIsrael. 13 Ndele nye otamu ka shiiva nokutya, Aame Omwene ngeenge handi lafulula eembila deni, ndele handi mu kufa meembila deni, akutu oshiwana shange! 14 Ndele Ame ohandi tula munye Omhepo yange, opo mu ninge ovanamwenyo, ndele handi mu nangeke moshilongo sheni; ndele nye otamu ka shiiva nokutya, Aame Omwene nde shi tya nonde shi wanifa, Omwene ta ti.”
Israel naJuda otai ka ninga oshilongo shimwe
15 Ondjovo yOmwene ye uya vali kwaame ndele tai ti: 16 “Ndele ove, kaana komunhu, kufa oshiti u shangele mo: ‘KuJuda nokOvaisraeli,’ ndele kufa vali oshiti shimwe u shangele mo: ‘KuJosef. Oshiti shaEfraim nokOvaisraeli,’ 17 i patela kumwe, i ninge oshiti shimwe meke loye. 18 Nongeenge ovana vomoshiwana shoye tava popi kwoove ndele tava ti: Ito tu fatululile nokutya, noinima ei ove to yeleke shike? 19 U tye kuvo: Omwene Kalunga ta ti ngaha: Taleni, Ame ohandi kufa oshiti shaJosef shi li meke laEfraim nomapata aIsrael a endafana naye; ndele Ame ohandi ke va patela kumwe noshiti shaJuda, ndele vo otava ningi oshiti shimwe, ndele tava ka ninga oshiti shimwe meke lange. 20 Noiti muyo wa shangela mo i nokukala meke loye moipafi yavo.
21 “Ndele tya kuvo: Omwene Kalunga ta ti ngaha: Tala, Ame ohandi ka kufa mo ovana vaIsrael moiwana muyo va elaela, nohandi ke va ongela keembinga adishe noku va eta moshilongo shavo. 22 Ndele Ame ohandi ke va ninga oshiwana shimwe moshilongo shavo, keemhunda daIsrael. Navo aveshe tava ka kala ve nohamba imwe, ndele vo itava kala vali oiwana ivali, noitava ka kala vali va tongoka va tukulwa oilongo ivali. 23 Ndele vo itave ke linyateka vali noikalunga yavo noixuna yavo nomatauluko avo, ndele Ame ohandi ke va mangulula meenhele adishe omo va nyonenene, ndele handi ke va yapula. Osho ngaha vo otava ka ninga oshiwana shange, naame handi ningi Kalunga kavo. 24 Ndele omupiya wange David ta ka kala ohamba yavo, ndele vo aveshe tava ka kala ve nomufita umwe, ndele vo otava ka enda pamalombwelo ange nokudiinina eenghedimhango dange noku di wanifa. 25 Ndele vo otava ka kala medu nde li pele omupiya wange Jakob, mulo ooxekulu yavo va kala. Heeno, vo otava ka kala mulo, novana vavo novatekulu vavo fiyo alushe. Nomupiya wange David ta ka kala ohamba yavo fiyo alushe. 26 Ndele Ame ohandi ka ninga ehangano navo, olo tali ka kala ehangano laalushe navo. Ndele Ame ohandi ke va eta mo noku va hapupalifa, ndele Ame ohandi ka pamekela otembeli yange mokati kavo fiyo alushe. 27 Ndele edilaumbo lange tali ka kala kombada yavo, naame ohandi ka kala Kalunga kavo, navo tava ka kala oshiwana shange. 28 Ndele oiwana tai ka shiiva nokutya, Aame Omwene, ou ta yapula Israel, otembeli yange, ngeenge tai kala mokati kavo fiyo alushe.”
© Oshikwanyama Bible Revised © Bible Society of Namibia, 2008, 2012.
