Haman ta itavelelwa okuhanauna po Ovajuda
1 Konima yoinima oyo ohamba Ahasveros ya nenepeka Haman yaHammedata, Omuagag, ndele ye mu lenga ndele ya tula oshipundi shaye komesho yomalenga aeshe aa a kala puyo. 2 Novapiya aveshe vohamba, ovo va li poshivelo shohamba ve linyongamena ndele va wila eombe koshipala shaHaman, osheshi ohamba osho e va lombwela molwaye. Mordekai ine linyongamena ndele ina wa eombe. 3 Novapiya vohamba ava va li poshivelo shohamba, va lombwela Mordekai: Omolwashike ho tauluka oshipango shohamba? 4 Ndele eshi ve shi mu lombwela efiku keshe ndele ye ine va uda, ove shi shiivifila Haman, va tale elipopilo laMordekai ngeenge tali mu popile shili, osheshi ye e va shiivifila, nokutya ye Omujuda. 5 Haman eshi a mona, nokutya Mordekai ite linyongamene ndele ita wile eombe koshipala shaye, Haman okwa yada ehandu. 6 Ndelenee eshi a shiivifilwa oshiwana shaMordekai, okwa dina ekwafo laMordekai aeke. Onghee hano Haman a konga omhito a hanaune po Ovajuda aveshe nokutya, oshiwana shaMordekai sho shi li moshilongo shaAhasveros.
7 Mohani yotete, nokutya muNisan, momudo omutimulongo nomutivali wohamba Ahasveros, ova umba Pur, nokutya oshihoololifo, koshipala shaHaman efiku keshe mohani keshe fiyo okohani onhimulongo nonhivali, nokutya ohani yaAdar. 8 Opo nee Haman ta ti kohamba Ahasveros: “Moitukulwalongo aishe yomoshilongo shoye omu noshiwana shimwe she lihana ndele tashi likalele mokati koiwana, neemhango dasho odi lili hangaashi eemhango doiwana ikwao aishe. Ndele ihava diinine yo eemhango dohamba, onghee itashi dulika ohamba tai va efa va kale po. 9 Ngeenge tashi wapalele ohamba, napa shangwe oshipango, nokutya vo ve nokuhanaunwa po. Naame ohandi ka yeleka oshisiliveli shi dule eekilograma omayovi omafele atatu nomafele omilongo nhee momake omalenga e i wedele komamona ohamba.” 10 Opo nee ohamba ya xukula okalinga kayo koshihako komunwe wayo ndele ye ka pa Haman yaHammedata, Omuagag, omutondadi wOvajuda. 11 Nohamba ya lombwela Haman: “Oisiliveli nai ninge yoye nosho yo ovanhu ovo, u va ningile ngaashi sha wapala momesho oye.”
12 Opo nee ovashangi vohamba va ifanwa mefiku etimulongo netitatu mohani yotete, ndele va shanga ngaashi Haman e va lombwela, oshipango kovapangeli vohamba nokomalenga omoshitukulwalongo keshe nokeehamba doiwana adishe, koshitukulwalongo keshe panghedi yasho okushanga nokoshiwana keshe melaka lasho vene. Sha shangelwa medina lohamba Ahasveros ndele sha hakifwa nokalinga kohamba kokuhakifa. 13 Neenhumwafo da tumwa neenhondoki koitukulwalongo aishe yohamba va hanaune po Ovajuda aveshe, okudipaa nokukomba po ovanyasha novakulunhu, ovana novalikadi, mefiku limwe, mefiku etimulongo netitatu lohani onhimulongo nonhivali, nokutya mohani Adar, nomamona avo e nokutikishwa oixuulwa. 14 Eshangululo loshipango sha shangwa nali hololwe ngaashi omhango moshitukulwalongo keshe oiwana aishe i li shiive, opo va kale ve lilongekida mefiku tuu olo. 15 Eenhondoki da fikama divadiva kelombwelo lohamba shamha tuu omhango ya yandjwa mohotengulu yomuSusa. Ohamba naHaman va kala omutumba ndele tava nu ndelenee oshilando shaSusa sha li sha haluka.
© Oshikwanyama Bible Revised © Bible Society of Namibia, 2008, 2012.
