2 OMAFIMBO 33 - Oshikwanyama Bible (OKYB)

Manasse ohamba yaJuda

1 Omido daManasse da li omulongo nambali ye eshi a ninga ohamba, nokwa pangela muJerusalem omido omilongo nhano nanhano. 2 Nokwa ninga osho inashi yuka momesho Omwene paixuna yoiwana oyo ya tewa kOmwene momesho Ovaisraeli. 3 Nokwa tungulula vali oikulundu, oyo ya ngumaunwa po kuxe Hiskia, nokwa dikila Baal eealtari nomiti omalupwelele ndele te linyongamene moipafi yeengudu adishe dokeulu noku di fimaneka. 4 Nokwa tunga yo eealtari mongulu yOmwene, odo Omwene e di popya: “Edina lange tali ka kala fiyo alushe muJerusalem.” 5 Nokwa tungila eengudu adishe dokeulu eealtari moihale aishe ivali yokomesho yongulu yOmwene. 6 Naye mwene yo okwa endifa ovana vaye ovamati momundilo mefilu lomona waHinnom. Nokwa xunganeka omadidiliko ndele ta nyanekele nokwa tula po ovo hava pula keemhepo dovafi ndele tava mono kokule. Okwa ninga shihapu osho inashi yuka momesho Omwene, a handukifa Omwene. 7 Nokwa tula yo mongulu yaKalunga oshihongwafano shoshikalunga, e shi ninga, osho sha tongwa kuKalunga e shi lombwela David nomona waye Salomo: “Mongulu ei nomuJerusalem, nde shi hoolola mo momapata aeshe aIsrael, Ame ohandi ka tula mo edina lange fiyo alushe. 8 Ndele ihandi ka kandula vali omhadi yaIsrael medu olo, Ame nde li sheyela ooxe, vo ngeenge hava diinine shili ashishe osho nde shi va lombwela pamhango aishe nopaenghedimhango nopamalombwelo, Ame nda pa Moses.” 9 Ndelenee Manasse okwa hongaula Juda noonakukala muJerusalem okunyona unene, ku dule okunyona kwoiwana oyo Omwene e i hanauna po komesho yaIsrael. 10 NOmwene okwa popifa Manasse novanhu vaye, ndelenee inava pwilikina.

Manasse te lidilulula

11 Onghee hano Omwene a tuma ovakulunhu vomatanga novakwaita vohamba yaAsiria, ve va lwife. Ndele vo ova kwata Manasse neengona ndele ve mu manga nomalyenge oshikushu ndele ve mu twala kuBabilon. 12 Ndelenee moudjuu waye okwa konga onghenda koshipala shOmwene Kalunga kaye nokwe lininipika shili koshipala shaKalunga kooxe, 13 ndele te mu indile. Ndele Ye okwe mu uda ndele ta pwilikine omaindilo aye nokwe mu shunifa mouhamba waye muJerusalem. Opo nee Manasse a hepaulula nokutya, Omwene Ye oKalunga.

14 Ndele konima yaashi okwa tunga ohotekuma yopondje yoshilando shaDavid, kouninginino waGihon mefilu fiyo okomhito yokuya kOshivelo sheeshi, nokwe i tunga tai dingilile Ofel, ndele te i ningi ile ya ya pombada. Nokwa tula ovakulunhu vomatanga novakwaita moilando aishe yomuJuda i neehotekuma. 15 Nokwa hanauna po oikalunga yoilongo noshihongwafano shoshikalunga mongulu yOmwene, nosho a ngumauna po eealtari adishe e di tunga komhunda yongulu yOmwene nomuJerusalem, ndele te i ekele pondje yoshilando. 16 Nokwa tungulula vali oaltari yOmwene ndele a yambela ko vali omapanduloyambo nomahambeleloyambo ndele ta lombwele Ovajuda, va longele Omwene Kalunga kaIsrael. 17 Ovanhu va yamba vali koikulundu, ndelenee va yambela Omwene Kalunga kavo aeke

18 Noinima imwe tai hepaulula Manasse neindilo laye eshi ta indile Kalunga neendjovo dovamonikokule odo ve di mu lombwela medina lOmwene Kalunga kaIsrael, tala, oyo i li mehepaululo leehamba daIsrael. 19 Neindilo laye nanhumbi la udika, nomatimba aye aeshe neliteeko laye neenhele oko a tunga oikulundu yokuyambela nokwa dikila omiti omalupwelele aAsera noihongwafano, fimbo ine lininipika, tala, oyo oya shangwa mehepaululo laHosea. 20 Ndele Manasse okwa ka nangala pooxe, nokwa pakwa mongulu yaye. Nomona waye Amon a ninga ohamba ponhele yaye.

Epangelo laAmon

21 Omido daAmon da li omilongo mbali nambali eshi a ninga ohamba. Nokwa pangela omido mbali muJerusalem. 22 Nokwa ninga osho inashi yuka momesho Omwene, ngaashi xe Manasse a ninga. Ndele Amon okwa yambela oihongwafano aishe oyo ya ningwa kuxe Manasse nokwe i fimaneka. 23 Ndelenee ye ine lininipika koshipala shOmwene ngaashi xe Manasse e lininipika. Ndelenee Amon okwa hapupalifa oulunde waye. 24 Novapiya vaye ve mu hangakena ndele ve mu dipaa mongulu yaye. 25 Ndelenee ovanhu voshilongo va dipaa aveshe ava va hangakena ohamba Amon, novanhu voshilongo va ninga omona waye Josia ohamba ponhele yaye.