Ovaladi ve uya kuDavid kuSiklag nokuHebron
1 Ndele ovo ve uya kuDavid kuSiklag, fimbo ye okwa li ta hondama natango omolwaSaul yaKis, ovava: Vo va li yo mokati kovaladi ovo va kwafa David molwoodi, 2 va dililwa omauta, va deuka okukupula omamanya neke lokolulyo nolokolumosho ndele va dililwa oikuti nomauta. Vo va li vomepata laSaul vomuBenjamin. 3 Ova li mewiliko londjai Ahieser, omukulunhu, naJoas yaShemaa, Omugibea. NaJesiel naPelet, ovana vaAsmavet. NaBeraka naJehu, Omuanatot, 4 naJismaja, Omugibeon, omuladi mokati kaava omilongo nhatu, nomukulunhu waava omilongo nhatu, naJeremia naJahasiel naJohanan naJosabad womuGedera. 5 Elehusai naJerimot naBealja naShemaria naSefatja womuHaruf. 6 Elkana naIsshia naAsareel naJoeser naJasobeam, Omukora; 7 naJoela naSebadja, ovana vaJeroham womuGedor.
8 Ndele vomOvagad va ya yo kuDavid, kohotemhundangulu yomombuwa, ovalumenhu ovaladi, ovakwaita vomolwoodi, va dililwa noshikelelifo neonga, noipala yavo ya li ngaashi oipala yeenghoshi, ndele va li ve nonhapo ngaashi eemenye dokeemhunda: 9 Eser, omukulunhu, Obadja, omutivali, Eliab, omutitatu; 10 Mismanna, omutine, Jeremia, omutitano; 11 Attai, omutihamano, Eliel, omutiheyali; 12 Johanan, omutihetatu, Elsabad, omutimugoi. 13 Jeremia, omutimulongo, Mahbannai, omutimulongo naumwe. 14 Vo ova li vomovana vaGad, ovakulunhu vomatanga ovakwaita. Omuxupielela ta wana okulwifa efele. Nomunene wavo ta wana okulwifa eyovi. 15 Ovo tuu ovo va tauluka Jordan mohani yotete, fimbo oo wa li u yadi ndo, omeva taa kunguluka komakuma ao aeshe. Ndele va taataa oonakukalamo aveshe vomomaluhaela kombinga yokoushilo noyokouninginino.
16 Ndele ovo vomovana vaBenjamin novaJuda, eshi ve uya kohotemhundangulu kuDavid, 17 David okwa ya e va shakeneka ndele te va lombwele ta ti: “Nye ngeenge tamu uya kwaame nombili, mu kwafe nge, omutima wange tau ka kwatafana nanye. Ndelenee ngeenge tamu uya mu kengelele nge kovatondadi vange, nande momake ange kamu netimba, Kalunga kootate ne shi tale ndele ne shi handukile”. 18 Opo nee Omhepo ya yada Amasai, omukulunhu womilongo nhatu, ndele ta ti:
“Fye ovoye, David, ndele twa ama kwoove,
omona waIsai! Ombili.
Ombili nai kale naave,
nombili nai kale naava tave ku yakula,
osheshi Kalunga koye te ku kwafa!”
Opo nee David e va tambula ndele e va tula va ninge ovakulunhu veengudu domatanga. 19 Vamwe va dja yo kuManasse, ve uya kuDavid, ye eshi e uya pamwe nOvafilisti, va lwife Saul, ndelenee inave va kwafa, osheshi ovakulunhu vOvafilisti va kundafana ndele ve mu lekela, ndele tava ti: “Ye ota dulu okuyandja omitwe detu ndele ta ka ama komwene waye Saul.” 20 Fimbo ta i kuSiklag, ovo vomuManasse va ya kuye: Adna naJosabad naJediael naMikael naJosabad naElihu naSilletai, ovakulunhu vomayovi vomuManasse. 21 Vo ova kwafa David mokulwifa eengudu doita yomwii la, osheshi vo aveshe va li ovaladi novakulunhu vomatanga ovakwaita. 22 Osheshi efiku nefiku ve uya kuDavid, ndele tave mu kwafa, fiyo va ninga omatanga manene ovakwaita, ngaashi omatanga aKalunga.
Omatanga aDavid
23 Nomuvalu womatanga ovakwaita ava va dilililwa oita, ava ve uya kuDavid muHebron, ve mu pe ouhamba waSaul palombwelo lOmwene: 24 Ovana vaJuda, ava va humbata oshikelelifo neonga, va dilililwa oita, ova li omayovi ahamano nomafele ahetatu; 25 movana vaSimeon, ovaladi moshilonga shoita: omayovi aheyali nefele; 26 movana vaLevi omayovi ane nomafele ahamano; 27 naJehoiada, omukulunhu woludalo laAron napamwe naye omayovi atatu nomafele aheyali; 28 naSadok, omulumenhu omunyasha, omuladi, neumbo laye: ovakulunhu omilongo mbali navavali. 29 Ndele movana vaBenjamin, ovakwao vaSaul, omayovi atatu, osheshi vahapu unene va ama natango kepata laSaul. 30 Ndele movana vaEfraim omayovi omilongo mbali nomafele ahetatu, ovaladi, ovalumenhu ve nedina momapata avo; 31 ndele metata lepata laManasse omayovi omulongo naahetatu, ava va tumbulwa pamadina, va ye va ka ninge David ohamba. 32 Ndele movana vaIsaskar, ava va koneka efimbo ndele va li ve shi shii osho shi nokuningwa kOvaisraeli! Ovakulunhu vavo omafele avali, novakwao aveshe vomepangelo lavo. 33 MuSebulon ava ve nokuhomona palombwelo, va dilililwa oita ve noiti i lili nai lili, vo omayovi omilongo nhano, ve nehalo limwe alike meudafano lokulwa, ndele va li vehe nomitima mbali. 34 Ndele muNaftali ovakulunhu eyovi pamwe novanhu vavo omayovi omilongo nhatu naaheyali ve noshikelelifo neonga. 35 Ndele mOvadan, va dilililwa oita omayovi omilongo mbali naahetatu. 36 Ndele muAsser ava ve nokuhomona palombwelo, ve lilongekidila olwoodi: omayovi omilongo nhee. 37 Ndele kombinga inya yaJordan: mOvarubeni nomOvagad nometata lepata laManasse omayovi efele nomayovi omilongo mbali, ve noiti i lili nai lili.
38 Ovakwaita ovo aveshe ve uya kuHebron pamatanga nomutima we liyandja, va ninge David ohamba yOvaisraeli aveshe; nOvaisraeli vakwao aveshe va li ve nomutima umwe va ninge David ohamba. 39 Ndele va kala pamwe naDavid okulya nokunwa omafiku atatu, osheshi ovakwanepata vavo ve va pa onghuta. 40 Naavenya yo va kala moushiinda wavo fiyo okuIsaskar naSebulon naNaftali, va eta omungome wa humbatwa keendongi nokeengamelo nokomamula nokeengobe deenghutwa: oufila noikambi yeenghwiyu noikuki yeeviinyu nomaviinyu nomaadi neengobe needi dihapu, osheshi muIsrael mwa li ehafo.
© Oshikwanyama Bible Revised © Bible Society of Namibia, 2008, 2012.
