Kristus e tu ninga ovana vaKalunga
1 Ndelenee ohandi ti: Omufyuululi fimbo okaana, kape netukauko pokati kavo nomupiya, nande oye mwene woinima aishe; 2 ndele ota kala mepangelo lovatekuli nomalenga fiyo okefimbo olo la pangelwa kuxe. 3 Osho nafye yo; fimbo twa li ounona otwa li twa kwatelelwa moupika weenghedi dounyuni. 4 Ndelenee ewano lefimbo eshi la fika, Kalunga okwa tuma Omona waye a dalwa komukainhu nokwa dalelwa momhango, 5 opo a kulile ava ve li koshi yomhango, fye tu pewe vali oudalwa. 6 Ndele shaashi nye ovana, Kalunga okwa tuma Omhepo yOmona waye momitima detu ta ingida: “Abba! Tate!” 7 Hano ku fi vali omupika, oove omona, ndele ngee omona, ove omufyuululi yo waKalunga molwaKristus.
8 Ndelenee nale, fimbo inamu shiiva Kalunga, omwa li hamu longele ei ihe fi ookalunga koludi layo. 9 Ndelenee paife, eshi mwa shiiva Kalunga, naunene tuu eshi mwa shiivika kuKalunga, otamu dulu ngahelipi okwaalukila vali keenghedi odo donale dihe noshilonga nodihe neenghono, nomwa hala mu ninge ovapika vado vali? 10 Omu li po tamu tongola omafiku neehani nomafimbo nomido. 11 Onda tila omolweni, pamwe onde mu lihepekela epwanga.
12 Ovamwatate, ohandi mu indile, fei nge, ngaashi ame nde mu fa. Inamu ningila nge owii washa. 13 Ndelenee nye mu shi shii, omolwoungone wokolutu lange nde mu udifila tete evaengeli, 14 nomu shi shii, nhumbi mwa yelekwa kolupe lange lopalutu, nye inamu dina nge, noinamu tonda nge, ndele mwa tambula nge ongaashi omweengeli waKalunga, heeno, ongaashi Kristus Jesus. 15 Hano elitango leni kutya, nye ovanelao, oli li peni? Osheshi ohandi mu hepaulula, ngeno sha dulika, ngeno mwa kufa mo omesho eni mu a pe nge. 16 Hano onda ninga omutondwa weni, eshi nde mu lombwela oshili? 17 Ouladi wavo molweni kau fi woshili; ova hala oku mu tukula mo, nanye opo mu shiive okukala nouladi omolwavo. 18 Onawa okukala nouladi alushe moshinima shiwa, hafimbo olo alike ndi li punye. 19 Ovamwange, ava ndi noku mu dalulula nouyehame, fiyo Kristus ta mono olupe munye. 20 Nonda hala, ngeno ndi li punye paife, nondaka yange ndi i shitukife, osheshi onde mu limbililwa.
Hagar oye efano loupika womhango naSara olelipangelo lopavaengeli
21 Lombwelei nge hano, onye ava mwa hala okupangelwa komhango, omhango kamu i udite hamba eshi tai ti? 22 Osheshi opa shangwa: Abraham okwa li e novana vavali, umwe owomupika, nomukwao owomudalwa okeudaneko. 23 Ndelenee omona womupika a dalwa pambelela ndelenee oo womudalwa okeenghono deudaneko. 24 Odo omafaneko; ovakainhu ava ovo omahangano avali: limwe olokomhunda yaSinai, lokudalela oupika, olo tuu Hagar; 25 osheshi Hagar oyo omhunda yaSinai i li muArabia, noyo ya yeleka Jerusalem shopaife, shi li moupika novana. 26 Ndelenee Jerusalem shokombada, osho omudalwa, nosho meme yetu. 27 Osheshi pa shangwa:
“Nyakukwa, oove ongadji, ou iho dala,
kuwilila pombada, oove ou iho fetwa;
osheshi ovana vaau ina hombolwa ovo ovahapu,
ve dule vaau e nomulumenhu.”
28 Ndelenee ovamwatate nye, onye ovana veudaneko ongaashi Isak. 29 Ndelenee ngaashi momafiku enya, omudalwa pambelela a taataa winya omudalwa paMhepo, osho nonena yo. 30 Ndelenee omishangwa otadi ti ngahelipi? “Taataa mo omupika nomona, osheshi omona womupika ita dulu okufyuulula pamwe nomona womudalwa.” 31 Osho hano ovamwatate, fye katu fi ovana vomupika, ndelenee ovomudalwa.
© Oshikwanyama Bible Revised © Bible Society of Namibia, 2008, 2012.
