OVAHEBERI 11 - Oshikwanyama Bible (OKYB)

Eitavelo neenghono dalo

1 Eitavelo olo elineekelo la pama okulineekela osho tashi teelelwa nokuliyukifa painima ihe wetike. 2 Osheshi omulo ovakulunhu vonale va pewa ehepaululo liwa.

3 Meitavelo otu udite ko nokutya, ounyuni owa tungifwa ondjovo yaKalunga, noinima ei i wetike inai dja moinima ihe wetike.

Oihopaenenwa yovaladi meitavelo

4 Meitavelo Abel okwa yambela Kalunga eyambo liwa li dule eli laKain, nomolwalo a pewa ehepaululo nokutya, oye omuyuki, Kalunga eshi a hepaulula omayambo aye; nomeitavelo tuu olo ota popi natango nande a fya. 5 Meitavelo Henok okwa kufwa po aha mone efyo, ye ina monika, osheshi Kalunga e mu kufa po. Osheshi fimbo ina kufwa po, okwa pewa ehepaululo nokutya, Kalunga e mu hokwa. 6 Kape na ou ta dulu okuwapalela Kalunga, ngeenge kape neitavelo, osheshi ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi. 7 Meitavelo Noa, eshi a shiivifilwa inya inai monika natango, metilo liyapuki okwa tunga ongulu yomomeva, a xupife eumbo laye, nomeitavelo okwa tokola ounyuni nokwa ninga omufyuululi wouyuki tau di meitavelo.

8 Meitavelo Abraham eshi a ifanwa a tembukile kedu olo te ke li pewa li ninge efyuululo laye, okwa dulika, nokwa dja mo ina shiiva apa ta i. 9 Meitavelo okwa kala omunailongo medu leudaneko la fa lihe fi laye, nokwa li ha kala momatwali pamwe naIsak naJakob, ovafyuululi veudaneko pamwe naye, 10 osheshi okwa li ha teelele oshilando shinya shi nomakanghameno a pama, nomutoti nomutungi washo oKalunga. 11 Meitavelo naSara yo okwa li a pewa eenghono okutunga epata; nonande a hangika a kulupa, okwa dala molwaashi oye a tala omuudaneki e shi okulineekelwa. 12 Onghee hano omuumwe, ou omukulupe, mo omwa tutuma vahapu va feenyofi dokeulu nova fehekedu lopomunghulo wefuta lihe shii okuvalulwa.

13 Meitavelo aveshe ava va fila mo, vo inava mona eshi sha udanekwa, ndelenee ove shi tala ashike kokule nokwiitavela, nove shi kunda, nove lihepaulula nokutya, ovo ovanailongo novaenda kombada yedu eli. 14 Osheshi ava hava ti ngaha, otave liholola, ovo tava kongo oshilongo shovambulavo. 15 Ngeno ova popya shinya va dile mo, ngeno ove nomhito okushuna mo, 16 ndelenee paife otava djuulukwa oshilongo shiwa shi dule shinya, oshomeulu. Onghee hano Kalunga ite va fi ohoni a ifanwe Kalunga kavo, osheshi okwe va longekidila oshilando.

17 Meitavelo Abraham okwa yandja Isak eyambo eshi a yelekwa kuKalunga. Abraham tuu ou a pewa omaudaneko kuKalunga; nande ongaho okwa yandja ewifa laye Isak eyambo. 18 Kalunga okwe mu lombwela: “OmuIsak oludalo loye tali ka dja.” 19 Osheshi Abraham a diladila kutya Kalunga ota dulu okunyumuna Isak koufi; onghee okwe mu peululwa a fa a dja mefyo.

20 Meitavelo Isak okwa nangeka Jakob naEsau noupuna omokutala inya yokomesho. 21 Meitavelo Jakob, eshi a li pokufya a nangeka noupuna ovana vaJosef aveshe vavali, ndele ta indile mokulinyongamena komutwe wonhaili yaye. 22 Meitavelo Josef, eshi a li pokufya okwa tonga etembu lovana vaIsrael, nokwe va lombwela omakipa aye nhumbi tave a ningi.

23 Meitavelo ovakulunhu vaMoses ova li ve mu holeka eehani nhatu, eshi a dalwa, osheshi va mona okaana kawa, vo inava tila oshipango shohamba. 24 Meitavelo Moses, eshi a kula, okwa anya a ifanwe omona wokakadona kaFarao, 25 okwe lihoololela, a hepekwe pamwe noshiwana shaKalunga nokwa dina ouwa wokafimbo womoulunde, 26 nokushekwa kwaKristus okwe ku tala oko oupuna u dule omamona omuEgipiti, osheshi e a pilamena a taalela kondjabi. 27 Meitavelo okwa fiya po Egipiti ehe noutile wehandu lohamba, okwe likolelela, osheshi a kala a fa e wete ou ehe wetike. 28 Meitavelo okwa dika po Opaasa neshamino lohonde, omudipai woiveli opo aha kume kuvo.

29 Meitavelo va tokola Efuta Litilyana va fa va enda poukukutu, fimbo Ovaegipiti eshi ve shi hetekela, va fila mo. 30 Meitavelo ohote yaJeriko oya teka po, eshi ya dingililwa omafiku aheyali. 31 Meitavelo ombwada Rahab ina hanaunwa po pamwe novanandubo eshi a idilila eendadi nombili.

32 Ndele ohandi ti shike vali? Osheshi efimbo otali ka pwila nge po, ngeenge handi hepaulula Gideon, Barak, Simson, Jefta, David naSamuel novaxunganeki, 33 ava va teya po oilongo okeitavelo, nova diinina ouyuki, va mona omaudaneko a wanifwa, nova fitika po omakanya eenghoshi, 34 va dima po eenghono domundilo, va ya onhapo eememo domaongamukonda, va ninga ovanaenghono moungone wavo, novaladi molwoodi, va taataa po eengudu dovakwaita dovanailongo. 35 Nokwa li ku novakainhu va alulilwa oonakufya vavo va nyumunwa. Vakwao ova hepekwa nokuhepekelelwa, vo inava hala okumangululwa, opo va mone enyumuko liwa unene. 36 Vamwe vali va dengwa nova shekwa, ndele va mangwa nomalyenge nova idililwa modolongo, 37 va dipawa nomamanya, va shaaxwa nokutetwa, va hepekwa nai, va dipawa nomaongamukonda. Va tembauka nova djala oikafa yeedi noyoikombo; va fya oluhepo, va fininikwa nova monifwa oixuna, 38 ovo tuu ava ounyuni inau wana va kale muwo, va endaenda neefuka neemhunda nomomakololo nomomakwena edu.

39 Nonande aveshe ava va pewa ehepaululo okeitavelo, inava mona ewanifo leudaneko, 40 osheshi Kalunga e tu nunina ouwa u dule winya, venya vaha fike kewaneneno vehe li nafye.