Ematulo loipatifo iheyali
1 Ndele ame onda mona eshi Odjona ya matula shimwe shomoipatifo inya iheyali, ndele nda uda oshinamwenyo shimwe shomwaainya ine, sha popya nondaka ya fa engungumo lodula sha tya: “Ila u tale!” 2 Ndele nda mona, ndele tala, opa li onghambe itoka nomulondi wayo okwa li e kwete outa nokwa pewa oshishani nokwa ya omufindani a ka findane.
3 Ndele yo eshi ya matula oshipatifo oshitivali, onda uda oshinamwenyo oshitivali sha tya: “Ila u tale!” 4 Nonghambe ikwao itilyana oye uya nomulondi wayo okwa pewa a kufe po ombili kombada yedu, opo ovanhu va dipaafane, ndele ye okwa pewa eongamukonda linene.
5 Ndele yo eshi ya matula oshipatifo oshititatu, onda uda oshinamwenyo oshititatu sha tya: “Ila u tale!” Ame nda mona, ndele tala, onghambe ilaula, nomulondi wayo okwa li e kwete oshiyelekifo meke laye. 6 Ndele nda uda sha sha fa ondaka mokati koinamwenyo ei ine ya tya: “Olita yoilya otai i odenari imwe, neelita nhatu doilyavala otava i odenari imwe, ndelenee omaadi nomaviinyu ino a hepifa.”
7 Ndele Odjona eshi ya matula oshipatifo oshitine, onda uda ondaka yoshinamwenyo oshitine ya tya: “Ila u tale!” 8 Ndele nda mona, ndele tala, opa li onghambe ombashe nomulondi wayo edina laye Efyo, oshovafi oshe mu shikula. Ndele va pewa mepangelo lavo oshitine shedu okudipaa neongamukonda nonondjala nonomukifi wolutapo nonoilyani yokedu. 9 Ndele Odjona eshi ya matula oshipatifo oshititano, onda mona koshi yoaltari eemwenyo daavenya va dipaelwa eendjovo daKalunga nehepaululo lavo olo va li ve li kwete. 10 Ndele vo ova ingida nondaka inene tava ti: “Omwene Oove omuyapuki nomunashili, fiyo onaini ito tokola, Ove u handukilile ohonde yetu ovakali kombada yedu?” 11 Ndele keshe umwe womuvo okwa pewa oshikutu shile shitoka, ndele va lombwelwa va teelele nombili okafimbo kanini, fiyo omuvalu wovapiya vakwao nowovamwaxe tau wana, ava tava ka dipawa yo ngaashi vo.
12 Ndele ame onda mona Odjona eshi ya matula oshipatifo oshitihamano, tala, ndele ekakamo ledu lidjuu unene la ningwa, netango ola laula la fa oshikutu sheefya, nohani oya tilyana ya fa ohonde, 13 neenyofi deulu oda wila pedu, ngaashi omukwiyu wa yaumuka omangongwa ao, eshi wa nyemwa ko komhepo inene. 14 Ndele eulu la kanduka po ngaashi omushangwatonywa wa tonywa, neemhunda adishe neenhunhu oda diluka. 15 Neehamba dopedu novanenenhu novaneyovi noipuna novanaenghono novapika aveshe novamangululwa aveshe ova ka hondama momakololo nomomamanya eemhunda, 16 ndele va lombwela eemhunda nomamanya tava ti: “Tu wileni, nye mu tu holeke oshipala shaau e li omutumba kolukalwapangelo nokehandu lOdjona; 17 shaashi efiku linene lehandu lavo ole uya, olyelye ta dulu okukala po ofika?”
© Oshikwanyama Bible Revised © Bible Society of Namibia, 2008, 2012.
