Elipopilo laPaulus
1 Ndele Paulus okwa tala oshiongalele shovakulunhu ndele ta ti: “Ovalumenhu nye ovamwatate, moinima aishe ame onda kala nokweenda koshipala shaKalunga ndi neliudo liwa fiyo efiku eli.” 2 Ndele omupristeli omukulunhu Ananias okwa lombwela ava va li ofika, ve mu denge komulungu. 3 Opo nee Paulus okwa tya kuye: “Kalunga ote ku denge, oove ekuma litoka la fefengwa, ove wa kala omutumba u tokolife nge omhango, ndele to lombwele ovanhu ndi dengwe konghedi yokunyona omhango.” 4 Ndele ovo va li ofika opo, ova tya: “Ove to tuku omupristeli omukulunhu waKalunga?” 5 Opo nee Paulus okwa tya: “Ovamwatate nye, ame inandi mu shiiva oye omupristeli omukulunhu, osheshi okwa shangwa: ‘Ino tuka omupangeli woshiwana shambuleni.’ ”
6 Ndele Paulus eshi a li e va wete ombinga imwe yavo oyOvasadukai naikwao oyOvafarisai, okwa popya mokule moipafi yoshiongalele: “Ovalumenhu nye ovamwatate, ame Omufarisai nomona wOmufarisai. Ame ondi li po handi hokololifwa molweteelelo nenyumuko loonakufya.” 7 Ndele eshi e di tya, opo tuu opo pe uya eemhata pokati kOvafarisai nOovasadukai, noshiongalele osha tukuka. 8 Osheshi Ovasadukai otava ti: “Kaku nenyumuko nokaku novaengeli nokaku neemhepo,” ndele Ovafarisai ova itavela aishe ei. 9 Opo nee pa ningwa eweelelo linene, novanongo vomishangwa vamwe vomongudu yOvafarisai ova fikama, ndele tava patafana nouladi va tya: “Omulumenhu ou inatu mu mona e nowii nande washa. Omhepo ile omweengeli kashiimba e mu popifa?” 10 Ndele eenhamanana eshi da ya pombada, omuneyovi okwa tila kutya, otava ka pombaula Paulus, a lombwela ovakwaita, va ye ve ke mu kufe mo divadiva mokati kavo, vo ve mu twale mongulu yovakwaita.
Omwene ta xupifa Paulus momake Ovajuda
11 Ndele moufiku wa shikula Omwene okwa kala ofika puPaulus ndele ta ti: “Kala nomwenyo muwa, osheshi ngaashi wa hepaulula nge muJerusalem, osho yo u nokuhepaulula nge muRoma.”
12 Ndele ongula eshi kwa sha, Ovajuda ova udafana nova ana eano, vo vaha makele nande eendja novaha nwe sha fimbo inava dipaa Paulus. 13 Ndele ava ve mu hangakena ngaha, ova li ve dule omilongo ine. 14 Ndele ova ya kovapristeli ovakulunhu nokovakulunhu, ndele tava ti: “Fye otwa udaneka nokwaana, fye tuha lye sha fimbo inatu dipaa Paulus. 15 Hano paife onye noshiongalele shovakulunhu, ka shiivifileni omuneyovi, e mu tume kunye, mwa fa mwa hala okuuda nawa eendjovo daye, ndele fye otwe lilongekida tu mu dipae, ofimbo ina fika kunye.”
16 Ndele omona womumwaina waPaulus omukainhu okwa uda omhangela ei, nokwe uya kongulu yovakwaita ndele te shi hepaululile Paulus. 17 Ndele Paulus okwa ifana umwe womovanefele ndele ta ti: “Twala omunyasha ou komuneyovi, osheshi ye oku na sha oku mu shiivifila.” 18 Opo nee ye e mu kufa, okwe mu twala komuneyovi ndele ta ti: “Onghwate Paulus okwa ifanene nge ndele okwa indila nge ndi ete omunyasha ou kwoove, osheshi ye oku na sha shoku ku shiivifila.” 19 Opo nee omuneyovi e mu kwata kokwooko ndele e mu twala pamwe pe lili ndele te mu pula: “Eendjovo edi to shiivifile nge, odilipipo hano?” 20 Ndele ye ta ti: “Ovajuda ova pangela omhangela, ve ku indile mongula u twale Paulus koshiongalele shovakulunhu, va fa va hala okupwilikina vali eendjovo daye. 21 Ndele ove ino va itavela, osheshi oku na ovalumenhu mokati kavo, ve dule omilongo ine, tave mu nangele, ndele vo ova ana eano, itava li sha noitava nu sha fimbo inave mu dipaa, ndele paife ove lilongekida ndele tava teelele eitavelelo loye.” 22 Ndele omuneyovi a lekela omunyasha ndele ta ti kuye: “Ino shi tya nande okulyelye, nokutya, we shi shiivifila nge.”
Paulus ta twalwa kuKesarea
23 Ndele ye okwa ifana ovanefele vavali ta ti: “Pokafimbo okatitatu koufiku kaleni mwa longekida ovakwaita omafele avali, novalondi veenghambe omilongo heyali novalumenhu ovanamaonga omafele avali, mu va longekide okuya kuKesarea. 24 Ndele mangeni yo eenghambe dokulondwa kuPaulus, nye mu mu twale nawa kuFeliks, omupangeli woshilongo.” 25 Ndele ye okwa shanga onhumwafo tai ti: 26 “Klaudius Lisias ota kundu omupangeli woshilongo, Feliks, omufimanekwa munene. 27 Omulumenhu ou, Ovajuda ve mu kwata nokonyala ve mu dipae. Ame onde uya ndi nongudu yovakwaita, nonde mu xupifa, eshi nde mu uda kutya oye Omuroma. 28 Ndele ame eshi nda hala okushiiva efina lehovelo lavo, onde mu twala koshiongalele shovakulunhu vavo, 29 ndele nda mona kutya okwa hokololifwa eemhata domhango yavo, ndele okwa li ehe netimba lokufya ile lokwiidililwa modolongo. 30 Ndelenee ame eshi nda hololelwa kutya omulumenhu ou ota ve mu nangelwa, onde mu tuma kwoove, nonda lombwela yo ovahokololifi vaye ve ke mu hokololife koshipala shoye. Kundilwa po!”
31 Ndele ovakwaita ova ninga ngaashi va lombwelwa, va kufa Paulus ndele tave mu twala oufiku kuAntipatria.Ovakwaita ova ninga ngaashi va lombwelwa. 32 Nefiku la shikula ove mu pa ovalondi veenghambe, va ka fike ko pamwe naye, voovene ova aluka ko, nove uya kongulu yovakwaita. 33 Ndele ovalondi eshi va fika kuKesarea, ova yandja onhumwafo komupangeli woshilongo nova twala yo Paulus kuye. 34 Ndele omupangeli eshi a lesha onhumwafo, okwa pula Paulus, kutya owomoshilongo shilipi, naashi a uda owokuKilikia, 35 okwa tya: “Onda hala oku ku pwilikina, ovahokololifi voye ngeenge ve uya.” Ndele okwa lombwela a kale a nangelwa mongulu yaHerodes.
© Oshikwanyama Bible Revised © Bible Society of Namibia, 2008, 2012.
