Jefta ta taataa Ovaefraim
1 Ndelenee ovalumenhu vomuEfraim va ongalekwa ndele va tauluka omulonga waJordan ya yuka kuSafon, nde tava pula Jefta, tava ti: “Omolwashike wa ya u ka lwife ovana vaAmmoni ndele ino tu ifana tu yeni pamwe? Fye ohatu ka tomeka nomundilo eumbo loye.” 2 Ndelenee Jefta okwe va lombwela: “Fye novanhu vange va li ve nolwoodi linene novana vaAmmoni, ndele ame nde mu ifana, ndelenee nye inamu tu kwafa tu xupifwe momake avo 3 Naame eshi nda mona kutya nye itamu kwafa ame nde liekelela, ndele nda ya kovana vaAmmoni. NOmwene okwe va yandja meke lange. Omolwashike hano nye mwa homona nge paife mu lwife nge?” 4 Opo nee Jefta okwa shiva ovalumenhu aveshe vomuGilead a lwe naEfraim. Novalumenhu Ovagilead va taataa Efraim shaashi vo va tile: “Ovagilead nye ovainhapo vomuEfraim mu li mokati kaEfraim nomeni laManasse.” 5 NOvagilead va nangala peeshau daJordan. Novainhapo Ovaefraim, eshi tava ti: Ame nda hala okutauluka, ovalumenhu Ovagilead tava pula: “Ove Omuefraim?” Oye ngeenge ta ti: “Ahowe.” 6 Opo nee tave mu pula: “Tya Shibbolet.” Ndele okwa tya: “Sibbolet”, shaashi ina lungama e shi tumbule nawa; opo nee ve mu kwata ndele ve mu dipaa peeshau daJordan. Osho ngaha hano mefimbo linya ovalumenhu Ovaefraim ve fike pomayovi omilongo nhee naavali va dipawa. 7 Ndele Jefta okwa pangela Israel omido hamano. Ndele Jefta, Omugilead, okwa fya nokwa pakwa moshilando shimwe shomoilando yomuGilead.
Ovatokolipangeli Ibsan, Elon naAbdon
8 Ndele konima yaye Ibsan wokuBetlehem a pangela Israel. 9 Ye okwa li e novana ovamati omilongo nhatu ndele a hombolifa ovana vaye oukadona koilongo omilongo nhatu, nokwa kongela ovana vaye ovamati oukadona omilongo nhatu koilongo. Ndele a pangela Israel omido heyali. 10 Ndele Ibsan okwa fya nokwa pakwa mu Betlehem. 11 Ndele konima yaye Elon wokuSebulon okwa pangela Israel. Ndele ye okwa pangela Israel omido omulongo.
12 Ndele Elon wokuSebulon okwa fya nokwa pakwa muAijalon, moshilongo shaSebulon. 13 Ndele konima yaye Abdon yaHillel, Omupiratoni, okwa pangela Israel. 14 Nokwa li e novana ovamati omilongo nhee novatekulu omilongo nhatu, ava va londa keendongi omilongo heyali. Ndele ye okwa pangela Israel omido hetatu. 15 Ndele Abdon yaHillel, Omupiratoni, okwa fya nokwa pakwa muPiraton moshilongo shaEfraim, keemhunda dOvaamaleki.
© Oshikwanyama Bible Revised © Bible Society of Namibia, 2008, 2012.
