David eshi a ninga ohamba, ta nangala Jerusalem
1 Opo nee Ovaisraeli aveshe va ongala puDavid muHebron ndele tava ti: “Tala, fye ekipa loye nonhumba yoye. 2 Nokuli shito nale, fimbo Saul kwa li ohamba yetu, ove wa endifa Ovaisraeli mokuya nomokwaaluka. NOmwene, Kalunga koye e ku lombwela: ‘Ove u nokulifa oshiwana shange shOvaisraeli, ndele u nokuninga ohamba yovanhu vange Ovaisraeli.’ ” 3 Osho ngaha hano ovakulunhu vOvaisraeli ve uya kohamba muHebron; ndele David okwa ninga ehangano navo muHebron koshipala shOmwene. Ndele va vaeka David a ninge ohamba yOvaisraeli pandjovo yOmwene, e i lombwela Samuel.
4 Ndele David nOvaisraeli aveshe va ya kuJerusalem nokutya, kuJebus. Ndele oko kwa kala Ovajebusi, oonakukalamo moshilongo. 5 Noonakukala muJebus, va lombwela David, tava ti: “Ove ito uya mo omu!” Ndelenee David okwa teya ohotemhundangulu yaSion, nokutya oshilando shaDavid. 6 Ndele David okwa tya: “Ou ta dipaa tete Omujebusi, ta ka ninga omukwateli komesho nomukulunhu.” Opo nee Joab yaSeruja a londa ko tete, nokwa ninga omukwateli komesho.
7 Ndele David okwa tula mohotemhundangulu. Onghee hano tave shi luku Oshilando shaDavid. 8 Nokwa tunga oshilando keembinga adishe okudja kuMillo fiyo okominghulo. Ndele Joab okwa tungulula oshilando kombinga ikwao. 9 Ndele David okwa ehena komesho meenghono efimbo alishe, nOmwene womatanga ovakwaita a kala pamwe naye.
Ovaladi vaDavid
10 Ndele ava va li ovakulunhu ovaladi vaDavid, ava ve mu kwafa mouhamba waye pamwe nOvaisraeli aveshe, opo ve mu ninge ohamba yaIsrael pandjovo yOmwene. 11 Nomuvalu wovaladi vaDavid ou: Jasobeam yaHakmoni, omukulunhu waava omilongo nhatu. Ye okwa dungadunga eonga laye kombada yaavo omafele atatu ava va fya pefimbo limwe alike. 12 Nokwa shikulwa kuEliaser yaDodo, Omuahohi, umwe waava vatatu. 13 Ye okwa li pamwe naDavid puPas-Dammim, Ovafilisti eshi va ongala ko va lwe. Ndele oko kwa li ombinga imwe yepya i yadi oilya, novanhu va ya onhapo Ovafilisti. 14 Ndelenee ye okwa ya a kale pokati kombinga oyo yepya, nokwe i alula, ndele ta taataa Ovafilisti; osho ngaha Omwene e va pa efindano linene.
15 Ndele vatatu vomovakulunhu venya omilongo nhatu va ya keemhunda kuDavid, kekololo laAdullam, fimbo onhanda yOvafilisti ya li mefilu laRefaim. 16 Ndele pefimbo olo David okwa li mohotemhunda. Nongudu yovanangeli Ovafilisti ya li muBetlehem. 17 Ndele David okwa li a hala omeva ndele ta ti: “Ngeno ndi pewe okunwa omeva omondungu oyo i li poshivelo shaBetlehem.” 18 Opo nee ovakwanyati vatatu va honyaeka monhanda yOvafilisti ndele va teka omeva mondungu yaBetlehem ya li poshivelo, ndele ve a humbata nove a eta kuDavid. Ndele ye ina hala oku a nwa. Okwe a tila shi poshi, kokufimaneka Omwene, 19 ndele ta ti: “Itandi dulu ndi nwe omeva aa, osheshi onda fa handi nu ohonde yovalumenhu ava, ve ke a talele mokweekelashi eemwenyo davo!” Ndele okwa anya oku a nwa. Ei oilonga youpenda yovakwanyati vatatu.
20 Ndele Abisai, omumwaina waJoab okwa li omukulunhu womapenda omilongo nhatu. Nokwa lwifa neonga laye ovalumenhu omafele atatu, nokwe va dipaa. Osho ngaha okwa mona efimano mokati komapenda omilongo nhatu. 21 Okwa li a fimana mokati kaava omilongo nhatu, onghee ye a ninga omukwatelikomesho wavo, ashike efimano laye inali fika pu laavenya vatatu votete. 22 Benaja yaJehoiada womuKabseel okwa li omukwaita omuladi; moilonga yaye youladi okwa dipaa eendjai mbali dOvamoab. Nokwa dipaa yo onghoshi mekololo mefiku lombabi. 23 Ye okwa dipaa yo Omuegipiti omutongolume, oule waye ou dule eemeta mbali. Nokwa li neonga lefo linene. Benaja okwe mu ponokela nodibo yaye yomutwe wakula, ndele te mu nyeka eonga laye, nokwa dipaa Omuegipiti neonga laye mwene. 24 Ei oyo oilonga youpenda yaBenaja yaJehoiada umwe womapenda enya omilongo nhatu. 25 Ye okwa li a fimana komesho yaava omilongo nhatu, ndelenee efimano laye inali fika pu laavenya vatatu. Ndele David okwe mu ninga omukulunhu wovanangeli vaye.
26 Novaladi ovava: Asahel, omumwaina waJoab omulumenhu, Elhanan yaDodo, womuBetlehem. 27 Sammot Omuharodi, Heles Omupeloni. 28 Ira yaIkkes, Omutekoa. Abieser, Omuanatot. 29 Sibbegai, Omuhusai. Ilai, Omuahohi. 30 Maharai, Omunetofa, Heled yaBaana, Omunetofa. 31 Ittai yaRibai womuGibea shovana vaBenjamin. Benaja, Omupiratoni. 32 Hurai womuNahab-Gaas, Abiel, Omuarba. 33 Asmavet, Omubahurim; Eliaba, Omusalboni. 34 Ovana ovamati vaHasem, Omugison, ovava: Jonatan yaSage, Omuharari; 35 Ahiam yaSakar, Omuharari; Elifal yaUr; 36 Hefer, Omumegera; Ahia, Omupeloni; 37 Hesro, Omukarmel; Naarai yaEsbai; 38 Joel omumwaina waNatan omulumenhu; Mibhar yaHagri; 39 Selek, Omuammoni; Naharai, Omubeerot, omuhumbati woiti yaJoab yaSeruja; 40 Ira, Omuiitri; Gareb, Omuiitri; 41 Uria, Omuheti; Sabad yaAhlai; 42 Adina yaSisa, Omurubeni, omukulunhu wOvarubeni, ndele pamwe naye kwa li omilongo nhatu. 43 Hanan yaMaaka; naJosafat, Omumitni; 44 Ussia, Omuastera; Sama naJeiel, ovana vaHotam, Omuaroeri; 45 Jediael yaSimri; naJoha omumwaina, Omutisi; 46 Eliel wokuMahavim naJeribai naJosavja, ovana vaElnaam; naJitma, Omumoabi; 47 Eliel naObed naJaasiel wokuMesobaja.
© Oshikwanyama Bible Revised © Bible Society of Namibia, 2008, 2012.
