David ta ningi ohamba yOvaisraeli aveshe
1 Opo nee omapata aeshe Ovaisraeli e uya kuDavid muHebron ndele taa ti: “Tala, fye ekipa loye nonhumba yoye! 2 Nokuli nale fimbo Saul a li ohamba yetu, ove wa li ou ta twala Israel noku mu alula. NOmwene e ku lombwela: ‘Ove u nokulifa ovanhu vange Israel ndele ove u nokuninga ohamba yOvaisraeli.’ ” 3 Osho ngaha hano ovakulunhu aveshe vaIsrael ve uya kohamba muHebron. Nohamba David ya ninga ehangano navo muHebron koshipala shOmwene. Ndele va vaeka David a ninga ehangano navo muHebron koshipala shOmwene. Ndele va vaeka David a ninga ohamba yOvaisraeli. 4 David eshi a ninga ohamba omido daye da li omilongo nhatu. Nokwa pangela omido omilongo nhee. 5 Okwa pangela Juda muHebron omido heyali neehani hamano. Nokwa pangela muJerusalem Israel ashishe naJuda omido omilongo nhatu nanhatu.
David okwa teya Jerusalem
6 Ohamba eshi ya ya novalumenhu vayo kuJerusalem i homone Ovajebusi ovo va kala moshilongo, ovo ova lombwela David ndele tava ti: Ove ito uya mo omu, ndelenee ovapofi noingudu tai ku taataa nokutya: David ite uya mo omu. 7 Ndelenee David okwa kwata ohotemhunda Sion. Osho oshilando shaDavid. 8 Ndele David okwa popya efiku tuu olo ndele ta ti: “Keshe umwe ta dipaa Omujebusi ndele ta fiki fiyo okekungulukilo lomeva, ye ota taataa ovapofi noingudu oyo i yelike komwenyo waDavid!” Onghee hano tava ti: “Ovapofi noingudu itai uya meumbo.”
9 Ndele David a tula mohotemhunda ndele e i luka oshilando shaDavid. Ndele David okwe shi tunga noku shi yadifa neengulu okudja muMillo fiyo omeni lasho. 10 Ndele David a ehena komesho meenghono efimbo alishe, nOmwene Kalunga komatanga ovakwaita a kala pamwe naye.
Ouhamba waDavid nomateyo aye
11 Opo nee Hiram, ohamba yaTirus, ya tuma ovatumwa kuDavid nomiti domisederi, novapangeli novahongi vomamanya, ve mu tungile ongulu. 12 Osho ngaha hano David e shi dimbulukwa nokutya Omwene e mu pameka ohamba yOvaisraeli, nouhamba waye wa tumbala omolwoshiwana shaye Israel. 13 Ndele David eshi a dja muHebron nokwe uya kuJerusalem, okwa kufa vali ovalikadi vaye naava vopomunghulo. Ndele David okwa dalelwa ovana ovamati noukadona. 14 Nomadina aavo ve mu dalelwa muJerusalem oyaa: Sammua naSobab naNatan naSalomo, 15 naJibhar naElishua naNefek naJafia, 16 naElisama naEljada naElifelet.
17 Ndelenee Ovafilisti eshi va uda nokutya, David a vaekwa a ninge ohamba yOvaisraeli, Ovafilisti aveshe va fikama va ka konge David, ndelenee David okwe shi uda nokwa ya kohotemhunda. 18 NOvafilisti ove uya ndele ve lihanena mefilu laRefaim. 19 Opo nee David a pula kOmwene ndele ta ti: “Nandi ka lwife tuu Ovafilisti? Ove oto va yandje tuu meke lange?” Omwene okwe mu nyamukula: “Inda ko; Ame ohandi ke va yandja meke loye.” 20 Opo nee David a ya kuBaal-Perasim, ndele David okwe va taataa ndee ta ti: “Omwene okwa hanauna po ovatondadi vange moipafi yange ngaashi omeva taa panuka.” Onghee hano ye a ifana onhele oyo Baal-Perasim. 21 Ndele Ovafilisti ova fiya po oikalunga yavo, ndele David novanhu vaye ve i kufa po.
22 Ndelenee Ovafilisti ve uya natango ndele ve lihanena mefilu laRefaim. 23 Opo nee David ta pula kOmwene, ndele Omwene ta ti: “Ino ya oku va shakeneka. Va dilila konima yavo, u va dje kombinga yomiti domitaku. 24 Ndele ove ngeenge to udu oikukulo yeemhadi membolongodjo lomiti domitaku, tota hano, osheshi Omwene te ku tetekele komesho a ka denge omatanga Ovafilisti.” 25 Ndele David osho a ninga ngaashi Omwene e mu lombwela, nokwa taataa Ovafilisti okudja muGeba fiyo opopepi naGeser.
© Oshikwanyama Bible Revised © Bible Society of Namibia, 2008, 2012.
