JOSUA 23 - Oshikwanyama Bible (OKYB)

Josua ta kumaida Israel a diinine ehangano lOmwene

1 Eshi pa pita efimbo lile Omwene eshi a pa Israel etulumuko kovatondadi vaye aveshe keembinga adishe, ndele Josua okwa kulupa nomafiku aye a ninga mahapu, 2 Josua okwa ifana Israel ashishe, ovakulunhu vasho nomalenga asho, ovatokoli vasho novapashukili vasho, ndele ta ti kuvo: “Ame nda kulupa, omafiku ange a ninga mahapu. 3 Ndele nye vene mwa mona ashishe eshi Omwene Kalunga keni a ningila oiwana aishe oyo, Ye e i taataa komesho yeni, osheshi Omwene, Kalunga keni, Ye e mu kondjela. 4 Taleni, ame nde mu hoololela epata keshe noshihoololifo oiwana oyo ya xupa po natango, oshitukulwafyuululwa, okudja kuJordan fiyo okEfuta Lopokati mouninginino, pamwe noiwana aishe oyo ame nde i taataa. 5 NOmwene Kalunga keni, Ye mwene ote ke i taataa komesho yeni, Oye ote va tembula koshipala sheni, mu shiive okunangala oilongo yayo, Omwene Kalunga keni ngaashi e mu udanekela. 6 Ndelenee nye mu nokukala mwa pama nokudiinina shili aishe ya shangelwa mo membo lomhango yaMoses muha yapukile kolulyo ile kolumosho lomhango. 7 Inamu dongakana noiwana oyo ya xupa po tai kala pamwe nanye. Inamu tumbula omadina oikalunga yavo ndele inamu ana kuyo, ndele inamu i longela ndele inamu linyongamena kuyo. 8 Ndelenee mu nokukanyatela kOmwene, Kalunga keni ngaashi mwa ninga fiyo onena eli. 9 Onghee Omwene okwa taataa komesho yeni oiwana inene i neenghono. Ndele inapa fyaala nande shimwe sha kala moshipala sheni. 10 Omulumenhu umwe womunye a taataa eyovi limwe, osheshi Omwene Kalunga keni okwe mu kondjela ngaashi e mu udanekela. 11 Kaleni hano oupafi molweemwenyo deni mu kale mu hole Omwene Kalunga keni. 12 Osheshi nye ngeenge tamu mu pilamene ndele tamu kanyatele koiwana ei ya xupa po tai kala pamwe nanye, ndele tamu hombolafana navo ndele tamu kwatafana navo, naavenya nanye, 13 kaleni mu shi shii, nokutya Omwene Kalunga keni ita taataa vali oiwana oyo komesho yeni, ndelenee yo tai ningi kunye eendjadja nomwiyo nongona yomalutu eni neeshosholo momesho eni fiyo nye otamu ka kombwa po moshilongo eshi shiwa, Omwene Kalunga keni e shi mu pa. 14 Ndele taleni, ame ohandi i paife nondjila yoonakukala aveshe kombada yedu. Ndelenee nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e mu lombwela tai kala inai wanifwa. Adishe de mu wanifilwa, kape na nande imwe inai wanifwa. 15 Ndelenee ngaashi oinima aishe iwa ye uya kombada yeni, oyo Omwene Kalunga keni e i mu udanekela, nosho yo Omwene ta ka tuma kombada yeni oiponga aishe fiyo te mu te mo medu eli liwa, mwe li pewa kOmwene Kalunga keni. 16 Nye ngeenge tamu teya po ehangano lOmwene Kalunga keni, Ye e li mu lombwela ndele tamu i mu ka longele oikalunga imwe ndele tamu linyongamene kuyo, opo nee ehandu lOmwene tali ke mu xwamena ndele tamu ka nyonwa po diva medu eli liwa Ye e li mu pa.”