Oinamwenyo ya yela naai inai yela
1 “Nye ovana vOmwene Kalunga keni. Inamu lilengula omolwomufi, ndele inamu likulula omapalu. 2 Osheshi onye ovana va yapulilwa Omwene Kalunga keni, nOmwene e mu hoolola mo moiwana aishe ei i li kombada yedu, mu ninge oshiwana shaye mwene.
3 “Inamu lya oixuna. 4 Oinamwenyo tamu dulu okulya oyei: ongobe, odi noshikombo. 5 Oholongo, nomenye, oshowa, okapundja, ombabi, ofine nomhuulu, 6 noinamwenyo aishe i nomakondo a pandjuka, heeno, a pandjuka fiyo oposhi, ndele tai alula, oyo lyeni. 7 Ndelenee inamu lya ei yomwaayo tai alula ile i nomakondo a pandjuka, nokutya: ongamelo, okandiba, nokahele, osheshi yo otai alula, ndelenee ihe nomakondo a pandjuka, yo inai koshoka kunye; 8 nosho yo oshingulu, osheshi sho oshi nomakondo a pandjuka, ndelenee ihashi alula, sho inashi koshoka kunye. Inamu lya ombelela yasho ndele inamu kuma omutunhu washo. 9 Mwaashishe eshi shi li momeva, tamu dulu okulya aishe ei i nomilenge nomapeta. 10 Ndelenee aishe ei ihe nomilenge nomapeta inamu i lya, yo inai yela kunye. 11 Eedila adishe da yela, di lyeni. 12 Ndelenee mudo inamu lya edi, nokutya: onhwa, oshikodinhwa, oshikombenhwa, 13 neimbi nookakodi, noludi keshe lonhwa, 14 keshe ekola pamaludi alo. 15 Nomho nokahanameva, needilafuta, nokakodinghuti, aishe pamaludi ayo; 16 Oshukushula, exuvi lokomamanya, ekwenoxuvi, nexuvi, 17 nonyundu nenyamhanghalwa nomukwatiweeshi, nexuwashi, 18 nenghumbinghumbi noolukenghe pamaludi avo, depupu nomalimalima pamaludi ao.
19 “Noupuka aveshe ve nomavava, inava yela kunye. Inamu va lya. 20 Eedila adishe da yela tamu dulu oku di lya.
21 “Inamu lya sha she lifila. Oto dulu oku shi pa omunailongo, ou e li peenhu doye, ye e shi lye, ile to dulu oku shi landifa komunailongo, osheshi onye oshiwana sha yapulilwa Omwene Kalunga keni.
“Ino teleka okakombwena momashini aina.
Oitimulongo
22 “Keshe omudo u nokuyandja shili oshitimulongo shoimeno aishe we i kuna, ya mena mepya, 23 ndele u nokulya koshipala shOmwene Kalunga koye monhele oyo, Ye te ke i hoolola, edina laye li kale ko; oshitimulongo shoilya yoye noshomaviinyu oye noshomaadi oye noshoiveli yeengobe doye nosheedi doye, opo u longwe okutila Omwene Kalunga koye mokukala kwoye akushe. 24 Ndele ondjila yoye ngeenge oile unene, ove ito dulu oku shi humbata, shaashi onhele oyo Omwene Kalunga koye e i hoolola a tule mo edina laye, oi li kokule naave, osheshi Omwene Kalunga koye a hala oku ku nangeka noupuna, 25 opo nee ove u noku shi landa po oimaliwa, kufa oimaliwa u i mange ove u i kumatele meke loye, opo u ye konhele oyo Omwene Kalunga koye, te ke i lihoololela. 26 Opo nee to lande noimaliwa ei, aishe omwenyo woye wa hala, eengobe, eedi nomaviinyu noikunwa idjuu, naashishe omwenyo woye wa hala, oko u nokulya koshipala shOmwene Kalunga koye nokunyakukwa, oove mwene neumbo loye alishe. 27 Ndelenee Omulevi ou ha kala peenhu doye, ino mu lumbula oipewa yaye, osheshi ye ehe noshitukulwafyuululwa pamwe naave.
28 “Pexulilo lomudo omutitatu u nokweeta oitimulongo aishe yoilya yoye, ndele u noku i tuvikila omudo ou peenhu doye. 29 Opo nee Omulevi te uya, osheshi ehe noshitukulwafyuululwa pamwe naave, nomunailongo nofiye nomufiyekadi, ava ve li peenhu doye, vo ove nokulya nokukuta, opo Omwene Kalunga koye a shiive oku ku nangeka noupuna moilonga aishe yomake oye ho ningi.
© Oshikwanyama Bible Revised © Bible Society of Namibia, 2008, 2012.
