Ouwa womefimbo lexupifo
1 Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo; 2 otai ka eta eenhemo nokuhafa, heeno, tai nyakukwa nokukuwilila pombada. Otai pewa oshingefimano shaLibanon, ndele tai mono ewapalo laKarmel nolaSaron. Otava kala nokutala oshinge shOmwene newapalopuna laKalunga ketu. 3 Pamekeni omaoko a wa neengolo da loloka di nghonopalekeni. 4 Lombweleni ava ve nomitima di noumbada: “Inamu tila, lipamekeni,” Kalunga keni Oye ou. Tala, Kalunga keni ote uya nehandu, onghone yaKalunga tai uya, Oye mwene ote ke uya, ndele te mu xupifa. 5 Opo nee omesho ovapofi otaa ka pashuka nomatwi ovafitamatwi otaa ka fituluka. 6 Mefiku olo oshingudu otashi ka nhuka ngaashi omenye nelaka laau ha kokoma, otali imbi nokukuwilila, osheshi mombuwa omwa fituluka omeva, nomilonga otadi tondoka mofuka. 7 Ndele efululu la hanya tali ka ninga etale, nomatunda taa ka ninga onhele yeefifiya. Poima hapa kala ouvandje, otapa kala omwiidi nolumbungu nomanenge. 8 Ndele otapa ka kala oshitauwa shakula sha palwa, tai ka ifanwa Ondjila iyapuki; itai endwa nande kwaava va nyatekwa, ndelenee otai ka kala yaavenya. Ou ta ende mo ita puka, nomalai oovene itaa puka. 9 Itapa kala eenghoshi, noshilyani keshe itashi londo ko kuyo, nande shimwe itashi monika mo; ndelenee ovakulilwa otava ende mo. 10 Ndele ovakulilwa vOmwene otava ka alukila ko, ndele tava ka ya kuSion nokukuwilila, ve nehafo laalushe, tali ka kala kombada yomitwe davo. Ehafo nenyaku otave ke li mona, ndelenee oisho nokukema otai faduka po.
© Oshikwanyama Bible Revised © Bible Society of Namibia, 2008, 2012.
