OMAYELETUMBULO 8 - Oshikwanyama Bible (OKYB)

Ounongo wa kalelela alushe puKalunga tau shivi ovanhu

1 Ounongo itau ingida mbela, eendunge itadi yelula mbela ondaka yado? 2 Oo tau kala ofika koxulo yoikulundudu pondjila, pomatukaukilo omalila, 3 peemhito doshivelo shoshilando, moluvanda peenhu, oo tau ingida pombada: 4 “Ohandi mu ifana, nye ovalumenhu, ondaka yange tai lombwele ovana vovanhu. 5 Onye ovashima lilongeni eendunge, nomalai lilongeni okushiiva omayele. 6 Udeni, osheshi ame ohandi ka popya oinima iwaelela, ndele handi makulile omilungu dange kwaashi sha yuka. 7 Osheshi ondakona yange tai popi oshili, nouhenakalunga oo oixuna komilungu dange. 8 Eendjovo adishe dokanya kange oda yuka, mudo kamu na nande ekengelelo noipupulu, 9 odo adishe da yela da yelelela ovanaendunge, noda yuka kwaava va mona eshiivo. 10 Tambuleni outekuduliko wange, ndele haisiliveli; neshiivo ponhele yoshingoldoelela sha hoololwa. 11 Osheshi ounongo u dule okorali, noinima aishe i nondilo itai yelekwa nao. 12 Ame, Ounongo, nda koneka omayele, ame nda mona eshiivo nediladilo la yuka. 13 Etilo lokutila Omwene olo okutonda osho shii. Ame ohandi tondo elinenepeko nelitumbo, okweenda kwii nokanya koipupulu. 14 Ame ndi nepukululo nomayele. Aame eendunge. Eenghono odange! 15 Kekwafo lange eehamba tadi pangele, novapangeli tava pangele eemhangela da yuka. 16 Okekwafo lange ovapangeli nomalenga novatokoli aveshe kombada yedu tava pangele. 17 Ame ndi hole ava ve hole nge, naava hava kongo nge tava ka mona nge. 18 Oupuna nefimano li li pwaame, emona ihali xulu po nouyuki. 19 Oiimati yange i dule oshingoldo, heeno oshingoldoelela, neliko lange li dule oshisiliveli sha hoololwa. 20 Ame ohandi ende nondjila youyuki, pokati komalila oshili, 21 opo ndi pe ava ve hole nge efyuululo tali kalelele, ndele ndi yadife omalimba avo emona.

22 “Omwene okwa longekida nge ngaau wotete woilonga yaye, komesho yoilonga yaye, omafimbo ounyuni manga inaa shitwa. 23 Ye okwa ma nge moukwaalushe, opehoveloelela, komesho yomafimbo ounyuni, 24 omaule oposhi fimbo inaa kala po, ame nda dalwa, fimbo eefifiya di yadi omeva diha li ko, 25 eemhunda fimbo inadi dikwa mo komesho yoikulundudu ame nda dalwa, 26 fimbo Ye ina ninga natango edu nomapya neendwi adishe dounyuni. 27 Ye eshi a longekida eulu, ame nda li ko. Fimbo ina findila oule omufinda, 28 Ye eshi a pameka oilemo yopombada, eefifiya domokule eshi da mona eenghono, 29 Ye eshi a ningila efuta ongaba yalo, omeva aha tauluke oshipango shaye. Ye eshi a pameka omakanghameno edu, 30 opo nee ame nda li puye ngaashi omunongoelela, nda nyakukwa pombada efiku nefiku, ndele nda danauka moipafi yaye alushe, 31 ndele nda danauka kongonga yedu laye, ndele nda nyakukilwa ovana vovanhu.

32 “Ovamwange, pwilikinei nge hano, osheshi ovanelao ovovo hava diinine eendjila dange. 33 Pwilikineni outekuduliko ndele mu mone ounongo, ndele inamu u ekelashi. 34 Omunelao omunhu ou ta pwilikine nge, ou ta kala oupafi poivelo yange efiku nefiku, ou ta nangele peemhanga deenhu dange. 35 Osheshi ou ta mono nge, okwa mona omwenyo ndele te limonene okuhokwa kOmwene. 36 Ndelenee ou ta di pwaame, ota pongeke okukalamwenyo kwaye. Aveshe ovo hava tondo nge, ve hole efyo.”