Ohole yomuvaleki noyomuvalekwa
1 Eimbiloelela laSalomo. 2 Ye na fipe nge omilungu nomafipo aye omilungu. Osheshi ohole yoye inyenye i dule omaviinyu. 3 Omivavo doye da nyika edimba liwa, edina loye omaadi a tilwa po, onghee hano ovakainhu ovanyasha ve ku hole.
4 Shile nge, natu endeleleni! Ohamba ya twala nge meenduda dayo domeni. Fye twa hala okunyakukwa noku ku hafela, nokufimaneka kwetu ohole yoye ku dule okufimaneka omaviinyu. Owa wana ve ku hole.
5 Oukadona nye vokuJerusalem, ame ondi laula, ndelenee nda wapala, ngaashi omatwali aKedar, ngaashi oiendjeleloyata yaSalomo. 6 Inamu tala nge eshi ndi laula, nda pya komutenya. Ovana ovamati vameme va handukila nge. Ova nangeka nge omunangeli woshikokola shomiviinyu, oshikokola shange mwene shomiviinyu inandi shi nangela. 7 Lombwele nge, omuholike womwenyo wange, openi ho lifa oimuna, openi ho ombifa oimuna omutenya? Osheshi omolwashike ndi kale ngaashi ou e liuvika oshipala, ta kala poimuna yavakweni? 8 Ngeenge ino shi shiiva, ove oumuwa muweelela mokati kovakainhu, shikula omakondo eedi, u life oudjona voye meenhele domatwali ovafita. 9 Omuholike wange, ame ohandi ku yeleke nonghambe onghadi yopetemba laFarao. 10 Eemhanda doye da wapala pamwe noulyenge nofingo yoye pamwe noilanda.
11 Fye ohatu ku ningile oulyenge voshingoldo noipatifo yavo yoshisiliveli.
12 Ohamba fimbo ya kala omutumba poshililo, omuvavo wange onarde wa nyika edimba liwa. 13 Omuholike wange oye oshipandi shomirha, tashi tulumukwa pokati komavele ange. 14 Omuholike wange oye eshila leenhemo dohenna lomoshikokola shomiviinyu shomuEngedi.
15 Tala, ove wa wapala, omuholike wange. Tala, ove wa wapala, omesho oye e li ngaashi eenghutyona.
16 Tala, ove wa wapala, omuholike! Omutala wetu muwa ngahelipi, wa hapa ngahelipi!
17 Omitengi dongulu yetu omiti domisederi, omifingo detu omisipresi.
© Oshikwanyama Bible Revised © Bible Society of Namibia, 2008, 2012.
