2 EEHAMBA 13 - Oshikwanyama Bible (OKYB)

Joahas naJoas eehamba daIsrael

1 Momudo omutimilongo mbali nomutitatu waJoas yaAhasia, ohamba yaJuda, Joahas yaJehu a ninga ohamba yaIsrael muSamaria. Ye a pangela omido omulongo naheyali. 2 Nokwa ninga eshi inashi yuka momesho Omwene, nokwa shikula omatimba aJerobeam yaNebat, ou a hongaula Israel okunyona. Ye ina dja mo muwo. 3 Onghee hano ehandu lOmwene la xwamena Israel, Ye e va yandja momake aHasael, ohamba yaAram, nomomake aBenhadad yaHasael, momafiku aye aeshe. 4 Ndelenee Joahas okwa indila onghenda koshipala shOmwene, onghee hano Omwene e mu uda, osheshi Ye a mona oudjuu wOvaisraeli nokutya, ohamba yaAram tai va fininike. 5 Omwene okwa yandja kOvaisraeli omuxupifi, opo va dula okudja mo mepangelo laAram, novana vaIsrael va shiiva okukala nombili momatwali avo ngaashi shito. 6 Ndele vo inava efa omatimba eumbo laJerobeam, ou a hongaulile Israel okunyona. Ye okwa enda nao, nokuli olupwelele liyapuki la kala muSamaria. 7 Ndele Ye ina xupifila Joahas omatanga ovakwaita, ashike ovalondi veenghambe omilongo nhano, nomatemba oita omulongo umwe, novakwaita vokolupadi omayovi omulongo. Osheshi ohamba yaAram ye va kondekela noku va ninga ngaashi olungu lomoshipale.

8 Noinima imwe tai hepaulula Joahas naaishe e i ninga, noilonga yaye yeenghono, inai shangelwa mbela membo lomafimbo leehamba daIsrael? 9 Ndele Joahas okwa ka nangala pooxe ndele a pakwa muSamaria. Nomona waye Joas a ninga ohamba ponhele yaye.

10 Momudo omutimilongo nhatu nomutiheyali waJoas, ohamba yaJuda, Joas yaJoahas, a ninga ohamba yaIsrael muSamaria. Ye okwa pangela omido omulongo nahamano. 11 Nokwa ninga eshi inashi yuka momesho Omwene. Ye ina efa omatimba aeshe aJerobeam yaNebat, ou a hongaula Israel okunyona. Ye okwa enda nao. 12 Noinima imwe tai hepaulula Joas naaishe e i ninga, noilonga yaye yeenghono, nhumbi a lwifa Amasia, ohamba yaJuda, inai shangelwa mbela membo lomafimbo eehamba daIsrael? 13 Ndele Joas a ka nangala pooxe, ndele Jerobeam okwa kala omutumba kolukalwapangelo laye. Ndele Joas okwa pakwa muSamaria peehamba dOvaisraeli.

Okufya kwaElisa

14 Ndele Elisa eshi a vela oudu ou tau mu twala kefyo, Joas, ohamba yaIsrael, ye uya kuye ndele tai mu lili ndele tai ti: “Tate, Tate, etemba laIsrael novalondi valo!” 15 Opo nee Elisa ta ti kuyo: “Kufa outa noikuti.” Ndele ya kufa outa noikuti. 16 Ndele ye okwa lombwela ohamba yaIsrael: “Tula eke loye kouta.” Ndele yo ya tula eke layo kouta. Ndele Elisa okwa tula omake aye komake ohamba. 17 Ye ta ti vali: “Yeulula ekende koushilo!” Ndele yo ye li yeulula. Ndele Elisa ta ti: “Umba!” Ndele yo ya umba. Opo nee ye ta ti: “Oshikuti shimwe shefindano lOmwene, oshikuti shimwe shokuta Ovaarami: Ove u nokutaataa sheke Ovaarami muAfek fiyo we va mana po filu.” 18 Ye ta ti vali: “Kufa oikuti. Ndele yo oye i kufa.” Opo nee ye ta lombwele ohamba yaIsrael: “Denga poshi!” Yo oya denga lutatu, ndele ya mwena. 19 Opo nee omulumenhu waKalunga a handuka ndele ta ti kuyo: “Ngeno wa dengele lutano ile luhamano, ngeno wa taataa sheke Ovaarami. Ndelenee paife to taataa Ovaarami lutatu aluke.”

20 Opo nee Elisa a fya ndele vo ve mu paka.

Neemwiila dOvamoab de uya moshilongo pehovelo lomudo. 21 Ndele fimbo hava pake mombila omulumenhu umwe, vo ova mona eemwiila. Onghee va ekela omulumenhu mombila yaElisa. Ndele omulumenhu eshi a kuma oipongolo yaElisa, ye okwa ninga omunamwenyo nokwa kala ofika neemhadi daye.

22 Ndele Hasael, ohamba yaAram, ya fininika Israel omafiku aeshe aJoahas. 23 Ndelenee Omwene okwe va filonghenda ndele e va udila olukeno nokwe va pungulukila omolwehangano lavo naAbraham naIsak naJakob. Ndele Ye ina hala oku va komba po, ndele fiyo opo po ine va ekelashi. 24 Ndele Hasael, ohamba yaAram, ya fya. Nomona waye Benhadad okwa ninga ohamba ponhele yayo. 25 Ndele Joas yaJoahas okwa alula vali oilando momake aBenhadad yaHasael, oyo winya e i kufa kuxe Joahas moita. Joas okwe mu taataa lutatu nokwa alula oilando yaIsrael.