Ondjodi yomuvalekwa
1 Omuvaleki: omumwameme, omuvalekwa wange, ame ohandi uya moshikunino shange, ohandi kola omirha yange nabalsam yange. Naame ohandi li eshila lange nomaadi ange eenyiki. Ohandi nu omaviinyu ange nomashini ange. Omuvalekwa: Ookaume, lyeni, nweni nye mu kolwe kohole!
2 Omuvalekwa: Ame nda kofa, nomwenyo wange wa pashuka. Pwilikina, omuholike wange ta konghola: Omumwameme, omuholike wange, onghuti yange, omufetuki wange, yeululile nge! Osheshi omutwe wange wa tuta omume, neexwiki dange di yadi omata oufiku.
3 Omuvalekwa: Ame onde lidula oshikutu shange. Ohandi shi lidjaleke ngahelipi? Onda kosha eemhadi dange, ohandi di yapula ngahelipi? 4 Omuholike wange okwe lieta mo eke laye mombululu yoshivelo. Nomwenyo wange we mu tukulukila. 5 Ame nda penduka ndi ka yeululile omuholike wange, nomake ange a ndodela omuvavo womirha, nominwe dange da yulika oshikwatifo shoshivelo omuvavo womirha. 6 Ame nda yeululila omuholike wange, ndelenee omuholike wange okwa dja po, a henuka po. Fimbo ye a popya, omwenyo wange wa limbililwa. Ame onde mu konga, ndele inandi mu mona. Ame nde mu ifana, ndelenee ina itavela nge. 7 Ovanangeli ava hava endaenda moshilando ova hanga nge, vo ova denga nge ndele va denga nge oipute. Ovanangeli vohotekuma va kufa nge eluviluvi lange. 8 Ohandi mu anifa, nye oukadona vomuJerusalem: Omuholike wange ngeenge tamu mu mono, otamu mu lombwele shike? Mu lombweleni nokutya, ame ohandi vele ohole.
9 Omuholike woye e dule ngahelipi vakwao, oove onhemoelela yomovakainhu? Omuholike woye e dule ngahelipi vakwao, eshi to tu anifa ngaha?
10 Omuholike wange omutootoo nokutilyana nokwa fimana mokati komayovi omulongo. 11 Omutwe waye oshingoldo, oshingoldoelela. Eenghwa deexwiki daye da feembale, dilaula ngaashi ekola. 12 Omesho aye a feenghuti pomatondokelo omeva, do de likosha momashini, ndele tadi kala omutumba pouyadi. 13 Eemhanda daye da foituvikilo yabalsam, ngaashi omaanda oimeno yedimba liwa. Omilungu daye da feenhemo domado, ndele tadi ndodele omirha. 14 Omaoko aye a foiti yoingoldo, e yadi ouwe vakrisolit. Olutu laye ngaashi omakipa ondjaba, oshilonga shomunongo, la uvikwa noumanya vasafir. 15 Omaulu aye a feengudi damarmori, a dikwa moshikwatelwamhadi shoshingoldoelela. Okutalika kwaye kwa fa Libanon, kwa wapala ngaashi omusederi. 16 Okanya kaye ounyenye woovene, ye mwene ondjelo yoovene. Heeno, omuholike wange osho e li; okaume kange osho a tya, nye oukadona vomuJerusalem.
© Oshikwanyama Bible Revised © Bible Society of Namibia, 2008, 2012.
