JEREMIA 31 - Oshikwanyama Bible (OKYB)

Israel ota shuna keumbo

1 “Mefimbo linya, Ame ohandi ka kala Kalunga komapata aeshe aIsrael, ndele vo otava ka kala ovanhu vange, Omwene osho ta ti. 2 Omwene ta ti: Oshiwana osho sha xupa keongamukonda sha mona onghenda mombuwa, handi ke shi findikila, Israel, mombili. 3 Omwene okwe lihololela nge kokule. Heeno, onda kala ndi ku hole nohole yaalushe. Onghee nde ku shilila kwaame nouwanghenda. 4 Handi ke ku tungulula, noto ka kala wa tungululwa nawa, okakadona Israel. Ove oto ka djalekululwa ouxumba woye ndele to ka danauka pamwe novanyakukwi. 5 Ndele ove oto ka twika vali oikokola yomiviinyu keemhunda daSamaria, naava tave di twike otave ke di lya yo. 6 Osheshi efiku otali ke uya, ovanangeli otava ingida ve li keemhunda daEfraim ndele tava ti: ‘Fikameni tu yeni kuSion, kOmwene Kalunga ketu.’ ” 7 Osheshi Omwene ota ti ngaha: “Imbileni Jakob, nyakukweni pombada mu hafele omutwe woiwana! Ingideni nokupandula, nye mu tye: ‘Omwene okwa kwafa oshiwana shaye, oixupe yaIsrael.’ 8 Tala, Ame ohandi ke va kufa medu lokoumbangalanhu nohandi va kongolola kominghulo dounyuni. Mokati kavo omu novapofi noingudu, ovafimba novamwali, ngaashi ve li, otava alukile apa ongudu inene. 9 Otava aluka nokulila. Ndele Ame handi va endifa, eshi hava ende nokwiilikana. Ohandi va twala komakungulukilo omeva nondjila oyo ya yelakana, itava punduka nande. Osheshi Aame Xe yaIsrael, naEfraim oye oshiveli shange.

10 “Udeni ondjovo yaKalunga onye oiwana nye mu ke di udifile meenhunhu dokokule domefuta mu tye: ‘Ou a halakanifa Israel, ote ke shi ongela yo, note shi amene ngaashi omufita ta amene oshuunda shaye.’ 11 Osheshi Omwene okwa kulila Jakob nokwe mu xupifa momake aau e mu dule eenghono. 12 Ndele tave uya ndele tava imbi nokunyakukwa komhunda yaSion, ndele tava tondokele kouwa wOmwene, koilya nokomaviinyu nokomaadi, keedi nokeengobe. Ndele eemwenyo davo otadi kala da fa oshikunino sha tekelwa nawa, noitava ka kala vali nokukema. 13 Mefiku olo okakadona taka nyakukwa nokutanha, nosho yo ovamati novakulunhu pamwe. Noluhodi lavo ohandi ke li shitukifa nohandi va hekeleke nohandi va hafifa ehafo konima yoluhodi lavo. 14 Ndele ohandi ka hekeleka eemwenyo dovapristeli neloolo, novanhu vange ohandi va kutifa nouwa wange, Omwene osho ta ti.” 15 Omwene ota ti ngaha: “Ondaka oya udika muRama, ekemo nelilaano linene. Rakel ota lili eenghali dovana vaye. Ndele ina hala okuhekelekwa molwovana, osheshi kave po vali.” 16 Ndelenee Omwene ota ti: “Lididimika mokulila kwoye, nomesho oye inaa tondoka vali omahodi, osheshi oilonga yoye oi nondjabi, Omwene osho ta ti; ndele tava ka aluka kedu lovatondadi. 17 Heeno, ope neteelelo mokukala kwoye kwokomesho, Omwene osho ta ti, oludalo loye otali ka alukila kedu lalo. 18 Heeno oshili, Ame onda uda Efraim ta lili ta ti: ‘Ove owa denga nge, ndele ame nda itavela edengo loye, ngaashi onhana inai dulika. Alule nge, ndi aluke, osheshi Oove Omwene Kalunga kange. 19 Osheshi ame eshi nde lyaaluluka nde lipa oushima, naashi nde lidimbulukwa, nhumbi ndi li, ohandi lidenge komatundji. Heeno ame onda fya ohoni, ndi udite ohoni shili, osheshi onda humbata oulai wounyasha wange.’ 20 Efraim ke shi omumwange omuholike nokaana kehafo lange? Nomomafimbo oku mu hanyena kwange ohandi mu yo alushe. Omwenyo wange owe mu tukulukila ndele u mu uditile onghenda. Ame ondi noku mu fila onghenda, Omwene osho ta ti. 21 Lidikila omadidiliko, li ningila oiulikifo yondjila, ndele tuvikila momwenyo woye ondjila nelila wa enda nale. Aluka, oove okakadona Israel, alukila koilando yoye ei. 22 Fiyo onaini to elaela ngaha, oove okakadona omuliteeki? Tala, Omwene ota shiti oshinima shipe kombada yedu, omukainhu ota kondeke omulumenhu?” 23 Omwene womatanga ovakwaita, Kalunga kaIsrael ota ti: “Omafiku okomesho, nge handi lundulula osho she va hanga moshilongo shaJuda nomoilando aishe tamu tiwa: ‘Omwene ne ku punike, oove onhele youyuki, oove omhunda iyapuki.’ 24 Ndele omo otamu kala Juda noilando yaye aishe, ovanamapya novanahambo pamwe. 25 Osheshi Ame ohandi hekeleke omwenyo wa loloka, ndele keshe omwenyo wa notelwa ohandi u kumifa.” 26 Opo nda duduluka nonda pashuka nokukofa kwange, nde ku tala kunyenye.

27 “Tala, omafiku otae uya, Omwene osho ta ti: Ame onda hala okukuna medu laJuda nomedu laIsrael eembuto dovanhu nodoimuna. 28 Ngaashi nda pashuka ndi va dude mo nondi va ngumaune po nondi va hanaune po nondi va etele oshiponga, osho handi ka pashuka, ndi va tunge nondi va twike, Omwene osho ta ti. 29 Pomafiku enya itapa tiwa vali:

‘Ootatekulu ova lile oipele yeeviinyu

nomayoo oludalo lavo okwa hangwa kouwe.’

30 Ndelenee keshe umwe ota file omanyonauno aye mwene, keshe ou ta li oipele yeeviinyu, omayoo aye oku nokukwatwa kouwe.

Ehangano lipe tali xunganekwa

31 “Tala, omafiku otae uya, Omwene osho ta ti, Ame nda hala okuninga ehangano lipe, ofye neumbo laIsrael noneumbo laJuda, 32 ehahangano la fa olo nde li ningile nooxokulu, eshi nde va kwata keke nonde va tembula muEgipiti, ndele ova nyona ehangano olo, nande Ame nda li nde va tambula, Omwene osho ta ti. 33 Ndelenee ehangano olo tuu olo nda hala oku li ninga ofye neumbo laIsrael pomafiku enya okomesho, Omwene ta ti, omhango yange ohandi i tula mo meenhulo davo, ndele handi i shangele momitima davo, osho ngaha ohandi ka kala Kalunga kavo, navo otava ka ninga ovanhu vange. 34 Ndele vo itava ka kala nokulongafana omukwao nomukwao, omumwaxe nomumwaxe nokutya: ‘Shiiva Omwene,’ osheshi vo aveshe ngaashi ve li, ovanyasha novakulunhu, otava ka shiiva nge, Omwene ta ti. Osheshi Ame ohandi ka dima po omanyonauno avo, ndele itandi dimbulukwa vali omatimba avo.” 35 Omwene osho ta ti, Oye tuu ou a tula po etango li minikile omutenya, nokwa tula po ohani neenyofi pamhangela yado okuminikila oufiku, Oye ou ta tukulukifa efuta nomakufikufi alo otaa ndunduma, Omwene womatanga ovakwaita olo edina laye.

36 Omhangela tuu ei ngeenge tai ka lunduluka koshipala shange, Omwene osho ta ti, noludalo eli laIsrael otali ka xula po yo okukala ovanhu vange koshipala shange fiyo alushe. 37 Omwene ta ti ngaha: “Omaulu opombadambada ngeenge taa yelekwa apa e fike, nomikangha dedu ngeenge tadi konakonwa meni mwi, noda shiivika, opo nee naame yo ohandi ka ekelashi oludalo laIsrael molwaayo aishe ve i ninga, Omwene ta ti.

38 “Tala, omafiku otae uya, Omwene osho ta ti, oshilando eshi shOmwene otashi ka tungululwa vali, otashi tungwa okudja kOshungo yaHananel fiyo okOshivelo shokekololo. 39 Ndele ongodi yokuyeleka otai piti ya yukilila kombada yomhunda yaGareb ndele tai kandukile kuGoa. 40 Nefilu alishe pamwe noimhu yalo nomute walo nehenene alishe fiyo okamulonga kaKidron, nofiyo okekololo lOshivelo sheenghambe, lwokoushilo, oli nokukala la yapulilwa Omwene. Onhele ei itai hanaunwa po vali nongaashi itai teyaulwa fiyo alushe.”