Ehafo lemonafano
1 Omuholike woye okwa ya peni, oove onhemoelela mokati kovakainhu? Fye naave tu ye tu ke mu konge.
2 Omuholike wange okwa ya koshikunino shaye koimhungu yeebalsam, a ka life moikunino yaye nokutoola eenhemo domado. 3 Ame owomuholike wange, nomuholike wange owange; ou ha lifa mokati keenhemo domado.
4 Ove omuholike wange, wa wapala ngaashi Tirsa, wa wapalelela ngaashi Jerusalem, onakutilika ngaashi omatanga ovakwaita. 5 Pilamene nge osheshi omesho oye, oo haa shili nge. Eexwiki doye dokomutwe di li ngaashi oshuunda shoikombo tai koloka komhunda yaGilead. 6 Omayoo oye a fongudu yeedi deenghadi da djuuka mekoshelo, keshe imwe i nepasha, nande imwe ihe noudjona. 7 Eemhanda doye di li ngaashi ogranati ya tukulwa, tadi vema meluviluviyata loye. 8 Ovambada vohamba omilongo hamano novakainhu omilongo hetatu vopomunghulo novakainhu ovanyasha vehe shii kuvalwa, 9 ndelenee umwe aeke, onghutyona yange, omufetuki wange, ewifa laina, omuhoololwa waau e mu dala. Oukadona moku mu tala hava fimaneke elao laye, ovambada vohamba novakainhu vopomunghulo tave mu hambelele. 10 Okakadona olyelye oko taka tende ngaashi eluwa, ka wapala ngaashi ohani, taka vema ngaashi etango, onakutilika ngaashi omatanga ovakwaita?
11 Ame nda ile koshikunino shoiimati ndi ka hafele ewapalo lomefilu, ndi tale omuviinyu ngeenge tau hape, eegranati ngeenge da eta eenhemo, 12 divadiva omwenyo wange wa kaleka nge omutumba momatemba oshiwana shange sha fimana.
13 Tanauka ko, tanauka ko tu ku tale, okakadona Okasulamit! Otamu tale shike muye? Ongaau ta tanhe mokati keengudu mbali dovakwaita.
© Oshikwanyama Bible Revised © Bible Society of Namibia, 2008, 2012.
