Ondjelo yomuvalekwa
1 Omuholike wange, owa wapala ngahelipi, heeno, ove wa wapala! Omesho oye a fa eenghuti, taa monika momaluviluvi oshiuvikoyata. Eexwiki doye dokomutwe di li ngaashi ongudu yoikombo, tai koloka komhunda yaGilead. 2 Omayoo oye a foshuunda sheedi da kululwa, da djuuka mekosho, adishe di nepasha, nande imwe ihe noudjona. 3 Omilungu doye di li ngaashi ongodi ya tilyana, nokanya koye ke nounyenye. Eemhanda doye da foshiimati shagranati, sha tukulwa, tadi monika momaluviluvi oshiuvikoyata. 4 Ofingo yoye ngaashi oshungo yaDavid, ya tungilwa ohotengulu omo mwa endjelela oikelelifo eyovi, oikelelifo aishe yovaladi.
5 Omavele oye e li ngaashi oupundja vanyasha, ngaashi omapasha omenye, oo taa li mokati keenhemo domado. 6 Fiyo omhepo yonguloshi tai pepe nomidile tadi faduka po, ame ohandi ka ya komhunda yamirha nokoshikulundu shoitwiminino. 7 Oove omuholike wange, wa wapala, uhe na nande oshiponga.
8 Ila, omuvalekwa wange, tu dje kuLibanon; ila, tu dje kuLibanon. Dja ko konhele yaAmana, keexulo daSenir nodaHermon, okeenhele deenghoshi nokeemhunda deengwe.
9 Ove wa vaka omutima wange, omuvalekwa wange nomumwameme wange, heeno, wa vaka omutima wange okepakumo limwe alike leisho loye, noshilanda shimwe ashike shomokalyenge koye komofingo. 10 Omumwameme, nomuvalekwa wange, ohole yoye inyenye ngahelipi! Ohole yoye inyenye i dule omaviinyu. Edimba lomivavo doye liwa li dule eebalsam adishe! 11 Omilungu doye, omuvalekwa wange, tadi ndodele omaadi eenyiki. Pelaka loye ope nomaadi eenyiki nomashini, nedimba loikutu yoye li li ngaashi edimba laLibanon. 12 Omumwameme, nomuvalekwa wange e li ngaashi oshikunino sha idilwa, omufima wa idilwa, nofifiya ya patwa.
13 Oitutuma yoye oyo oshikunino shomiti tadi imi eegranati, noiimati inyenye i nondilo, eenhemo dohenna nodonarde, 14 heeno, onarde nasafran, kalmus nokaneli pamwe noixwa i lili yoitwiminifo, mirha naaloe pamwe noimeno i lili iwa yabalsam.
15 Oove ofifiya yoikunino, oove ondungu i nomeva e nomwenyo, omeva taa kunguluka taa di muLibanon. 16 Omhepo yokoumbangalanhu, penduka! Omhepo yokoumbuwanhu, ila, u pepele oshikunino shange, omadimba asho abalsam a tandavele. Omuholike wange ne uye moshikunino shaye na lye oiimati iwa i nondilo yomusho.
© Oshikwanyama Bible Revised © Bible Society of Namibia, 2008, 2012.
