Omuvalekwa ta djuulukwa omuvaleki
1 Onhemo yaNarsis yomuSaron, aame onhemo yedo lomomafilu!
2 Ngaashi onhemo yedo mokati keeshosholo, osho omuholike wange e li mokati koukadona.
3 Ngaashi omuti womuapula u li mokati komiti domomufitu, osho omuholike wange e li mokati kovamati. Nda hala okukala omutumba momudidimbe wao, noshiimati shao oshinyenye mokanya kange. 4 Okwa twala nge monduda yomomiviinyu. Ohole yaye oyo epandela laye kombada yange. 5 Pamekei nge noikamena yeeviinyu, hekelekei nge noiimati yomaapula, osheshi ohandi vele ohole. 6 Eke laye lokolumosho li li koshi yomutwe wange, neke laye lokolulyo tali pamhadala nge.
7 Nye oukadona vomuJerusalem, ohandi mu anifa eemenye noupundja vokepumbu: Inamu pendula, inamu weelela ohole, fiyo oyo vene ya hala.
8 Pwilikina! Omuholike wange te uya. Tala, ou te uya ta nhuka eemhunda, ta nhukile oikulundudu. 9 Omuholike wange e li ngaashi oholongo ile ngaashi omenye onyasha. Tala, kwinya konima yekuma letu ota kala ofika, ta taalele mo mekende, ta vandamene mombululu.
10 Omuholike ta popi, ta lombwele nge, ta ti: “Fikama, omuholike wange. Oove onhemo yange, ila! 11 Osheshi tala, okufu kwa xula, odula ya sheka, ya pita, ya ya! 12 Eenhemo tadi monika medu, efimbo lokwiimba la fika nokushukushula kwonghuti taku udika moshilongo shetu. 13 Omukwiyu tau imi eedive, omashila omiviinyu taa piti, eenhemo da nyika edimba liwa. Fikama, omuholike wange, onhemo yange, ila!
14 “Onghuti yange, wa hondama mekololo lemanya, mehondameno lopeemhunda, tali fiile nge oshipala shoye, udifile nge ondaka yoye. Osheshi ondaka yoye inyenye nomesho oye a wapala. 15 Tu kwateleni ouvandje, ouvandje vanini, ava hava nyono po oikokola yomiviinyu, osheshi oikokola yetu yomiviinyu oya eta eenhemo.”
16 Omuholike wange, owange mwene, naame owaye; waau ta lifa mokati keenhemo domado. 17 Fiyo omhepo yonguloshi tai pepe nomidile tadi faduka po, ila kwaame omuholike wange, ngaashi omenye, heeno, ngaashi oholongo onyasha yokeemhunda domamanya.
© Oshikwanyama Bible Revised © Bible Society of Namibia, 2008, 2012.
