Ouyuki waKalunga Ovajuda kave u shii
Ouyuki womeitavelo
1 Ovamwatate, onda hala nomutima wange, ndele handi va indilile kuKalunga va xupifwe. 2 Osheshi ohandi va hepaulula kutya ove na ouladi okukondjela Kalunga, ndele hapakushiiva; 3 osheshi inava shiiva ouyuki waKalunga, ndele va hala okudika ouyuki wavo vene, inave liyandja koshi youyuki waKalunga. 4 Osheshi Kristus Oye exulilo lomhango, Oye ouyuki wakeshe tuu ou ta itavele.
5 Osheshi Moses okwa shanga nokupopya ouyuki ou womomhango, okutya, omunhu ou te u wanifa, ota kala e nomwenyo kuo. 6 Ndele ouyuki ou womeitavelo otau ti ngaha: “Momwenyo woye ino tya: olyelye ta londo meulu?” nokutya, a ka tale ko Kristus; 7 ile: “Olyelye ta filukile moshi mwi?” nokutya, a ka yelule mo Kristus movafi. 8 Ndelenee otau ti ngahelipi? Ondjovo i li popepi naave, mokanya koye nomomutima woye, oyo ondjovo yeitavelo ei hatu i udifa. 9 Osheshi ngeenge to hepaulula nokanya nokutya, Jesus Oye Omwene, ndele to itavele momutima woye, kutya Kalunga e mu nyumuna movafi, oto xupifwa; 10 osheshi okwiitavela nomutima otaku yukipalifa, nokuhepaulula nokanya otaku xupifa. 11 Osheshi omushangwa otau ti: “Keshe ou te mu itavele, ita ka fifwa ohoni.” 12 Osheshi apa kape netongolo pokati kOmujuda nOmugreka; osheshi Oye tuu ou Omwene waaveshe, nomuyandji woupuna kwaaveshe ava tave mu ifana. 13 Osheshi: “Keshe tuu ou ta ifana edina lOmwene, oye ota xupifwa.”
14 Ndele otava kuu ngahelipi kwaau inave mu itavela? Ndele tava itavele ngahelipi ou inave mu uda? Ndele tava udu ngahelipi ngeenge kape nomuudifi? 15 Ndele otava udifa ngahelipi, ngeenge itava tumwa? Ngaashi pa shangwa: “Eemhadi oda fewa ngahelipi daava hava udifa eenghundana diwa.” 16 Ndele haaveshe va dulika kevaengeli, osheshi Jesaja ota ti: “Omwene, olyelye a itavela eudifo letu?” 17 Hano eitavelo ohali di mokuuda, nokuuda omondjovo yaKristus.
18 Ndele ohandi pula: “Inava uda mbela?
Heeno, ondaka yavo oya ya nedu alishe,
neendjovo davo ofiyo okominghulo dounyuni.”
19 Ndele ohandi pula: Israel ine shi shiiva mbela? Tete Moses ota ti:
“Ohandi mu fifa efupandubo koshiwana shihe fi nande oshiwana,
ndele handi mu fifa ouladi koshiwana shihe neendunge.”
20 Ndele Jesaja e na ouladi, ta ti:
“Ame onda monika kwaava inava konga nge,
ndele nda holokela ava inava pula nge.”
21 Ndele mokutonga Israel ota ti: “Onda twala omaoko ange omutenya aushe koshiwana ihashi dulika, shi noshityani.”
© Oshikwanyama Bible Revised © Bible Society of Namibia, 2008, 2012.
