Eenhumwafo komaongalo aheyali
Keongalo lokuEfeso
1 “Shangela omweengeli weongalo lokuEfeso: ‘Ou e kwete eenyofi odo heyali meke laye lokolulyo, ndele ha ende mokati koixwekelwashela ei iheyali yoshingoldo, ota ti ngaha:
2 “ ‘Oilonga yoye ondi i shii noupyakadi woye nelididimiko loye, nomolwaashi uhe nombili novanawii, ndele wa yeleka ava tave liti ovo ovayapostoli, ndelenee havo, ndele we va nongonona nokutya, ovo ovanaipupulu; 3 ndele ove u nelididimiko, ndele wa humbata oudjuu omolwedina lange ndele ino loloka. 4 Ndelenee ondi na sha naave, eshi wa efa ohole yoye yotete. 5 Dimbulukwa hano oko wa wa ko, u lidilulule, ove u longe oilonga yoye yotete. Ndelenee ngeenge hasho, ohandi uya kwoove, ndele handi kandula po oshixwekelwashela shoye ponhele yasho, ngeenge ito lidilulula. 6 Ndelenee eshi u shi kwete osho, nokutya ho tondo oilonga ei yOvanikolaiti, naame yo ohandi i tondo.
7 “ ‘Ou e nokutwi, na ude eshi Omhepo tai shi lombwele omaongalo. Omufindani ohandi mu pe okulya komuti womwenyo u li moParadisa yaKalunga.’
Keongalo lokuSmirna
8 “Nomweengeli weongalo lokuSmirna mu shangela: ‘Ou omutete nomuxuuninwa, ou a li a fya ndele a ninga omunamwenyo, ota ti ngaha: 9 Oilonga yoye nokufininikwa kwoye noluhepo loye ondi lu shii ndelenee ove oshipuna, nomasheko aa venya tave liti ovo Ovajuda, nande havo, ndelenee vo ongudu yaSatana. 10 Ino tila oyo tai ke ku hepeka. Tala, ondiaboli otai idilile vamwe vomunye modolongo, mu yelekwe, ndele otamu ka monifwa oudjuu omafiku omulongo. Diinina fiyo okefyo, Ame nohandi ku pe oshishani shomwenyo.
11 “ ‘Ou e nokutwi, na ude ko eshi Omhepo tai lombwele omaongalo. Omufindani ke noshiponga shefyo etivali.’
Keongalo lokuPergamo
12 “Nomweengeli weongalo lokuPergamo mu shangela: ‘Ou e neongamukonda leememokuvali la twa, ota ti ngaha:
13 “ ‘Oilonga yoye ondi i shii nonhele apa ho kala nokutya, opo pe nolukalwapangelo laSatana, ndele ove wa dama medina lange, ove ino lidimbika eitavelo lange nopomafiku enya Antipas omuhepaululi wange, omudiinini, ou a dipaelwa punye, opo pe na onhele yaSatana. 14 Ndelenee ondi na sha shinini naave, shaashi ou na vamwe ava hava diinine elongo laBileam, ou a longa Balak a tele ovana vaIsrael omwiyo, va lye ombelela ya yambelwa oikalunga nokuliyandja moluhaelo. 15 Nongaashi u na yo ovanhu hava diinine melongo lOvanikolaiti panghedi ei. 16 Lidilulula hano, nongeenge hasho, ohandi ku faukile diva ndele handi va lwifa neongamukonda lokanya kange.
17 “ ‘Ou e nokutwi, na ude eshi Omhepo tai shi lombwele omaongalo. Omufindani ohandi mu pe a lye omanna a holekwa, ndele handi mu pe emanya litoka, nomemanya omo edina lipe la shangelwa mo, ndele itali shiivika nande okomunhu, kakele kaau aeke te li tambula.’
Keongalo lokuTiatira
18 “Nomweengeli weongalo lokuTiatira mu shangela: ‘Omona waKalunga, ou e nomesho a fa elaka lomundilo, neemhadi daye da fa oshivela shitwima sha hanya, Oye ta ti ngaha: 19 Oilonga yoye ondi i shii, nohole yoye neitavelo loye, neyakulo loye nelididimiko loye, nongaashi oilonga ei yoye yaxuuninwa oi dule inya yotete mouhapu. 20 Ndelenee ondi na sha naave, shaashi ino hanyena omukainhu ou Isabel te liti omuxunganeki ndele ta longo nokuhongaula ovapiya vange ve liyandje moluhaelo nova lye oiyambwa yoikalunga. 21 Ndele Ame onde mu pa efimbo lelidilululo, ndele ye ina hala okulidilulula, a efe oluhaelo laye. 22 Tala, ohandi mu undulile momutala waye ouvela, novahaeli vaye ohandi va undulile moudjuu munene, ngeenge itave lidilulula va efe oilonga yavo, 23 novana vaye ohandi va dipaa po sheke. Omaongalo aeshe notaa ka shiiva Aame ou, handi konakona eefiyo nomitima, ndele handi pe keshe umwe shi fike poilonga yaye.
24 “ ‘Ndelenee nye vamwe vomuTiatira ohandi mu lombwele, amushe ava muhe na elongo eli, ava inamu shiiva vati omaulembwili aSatana, ngaashi hava ti, itandi mu twike omutengi u lili; 25 osho ashike mu shi kwete, shi diinineni fiyo handi uya. 26 Ou ta findi ndele ta diinine oilonga yange fiyo okexulilo, ohandi mu pe eenghono dokupangela oiwana, 27 ndele ta kala noku va lifa nodibo yoshivela, ndele te va tataula ngaashi oitoo yedu, ngaashi naame yo nde shi pewa kuTate. 28 Ndele handi mu pe onyofi yongula. 29 Ou e nokutwi, na ude eshi Omhepo tai shi lombwele omaongalo.’
© Oshikwanyama Bible Revised © Bible Society of Namibia, 2008, 2012.
