EHOLOLO 18 - Oshikwanyama Bible (OKYB)

Okuteka po kwaBabilon

1 Konima yaashi onda mona omweengeli umwe a kuluka meulu, e nepangelonghono linene, edu ola yela koshinge shaye. 2 Ndele ye okwa ingida nondaka inene ta ti:

“Sha teka po, sha teka po, Babilon, oshilando shinene,

sha ninga onhele yokukala eendemoni,

neumbo leemhepo di lili nadi lili da nyata,

onhele yokwoongala eedila di lili nadi lili

da nyata noda tondwa,

3 osheshi momaviinyu ehandu lasho oiwana aishe oya nwa mo,

neehamba dedu da haela nasho,

novashingifi voipindi yokombada yedu

ova punapala keenghono douyadipuna washo.”

4 Naame nda uda ondaka imwe meulu, tai ti:

“Djeni mo musho, nye ovanhu vange,

muha kwatafane noulunde washo,

muha hangike komahepeko asho.

5 Osheshi oulunde washo owa fika meulu,

nouhenouyuki washo, Kalunga okwe u dimbulukwa.

6 Shi ningileni ngaashi sho she mu ningila yo,

nye mu shi wedele luvali shi fike poilonga yasho.

Meholo eli sha tila mo, shi tilileni mo luvali.

7 Ngaashi she lifimanekifa mokukala mouyadipuna,

osho tuu shi peni oudjuu noluhodi pashiyelekifo osho,

osheshi otashi lipopile momwenyo washo tashi ti:

‘Ame ondi li apa omutumba ndihambakainhu,

ndele nghi fi omufiyekadi noitandi ka hangika koluhodi;’

8 Onghee hano omahepeko asho

otae shi hange efiku limwe alike,

efyo neefya nondjala,

ndele tashi xwikwa momundilo,

osheshi Omwene Kalunga Oye

omunaenghono ou e shi tokola.”

9 Neehamba dopedu edi kwa li da haela nasho, ndele de liondola nasho, otadi shi lilile ndele tadi shi nyematele, eshi tadi mono omwifi wepeya lasho; 10 mokutila omahepeko asho otadi ke shi kalela ofika kokule tadi, ti:

“Woo, Woo, oshilando ove shinene,

Babilon, oshilando ove u neenghono,

etokolo loye ole ku hanga mokafimbo kamwe akeke.”

11 Novashingifi vopedu otava lili noku shi nyikila oluhodi, osheshi kape na vali ou ta lande oipindi yavo, 12 oshingoldo noshisiliveli nomamanya ondilo nouwe noshiyata sholiina nopurpuri noshofei naai itilyana nomiti adishe doidimba iwa, noilongwa i lili noi lili yomayoo eendjaba, noikwatelwa i lili noi lili yomiti diwa i nondilo noyoshikushu noyoivela noyomarmori, 13 nokaneli noinyepekifi noitwimifo nomaadi omirha, neka lokutwimifa nomaviinyu nomaadi olumono noufila womudiva noilya neengobe needi neenghambe nomatemba novapika neemwenyo dovanhu. 14 Noiimati oyo omwenyo woye we i hokwa ya ya: “Noinima aishe ya yela, oinima youpuna noyoufuuli ye ku kana noitai ka monika vali nande kwoove.” 15 Novashingifi voinima ei kwa li va punapalifwa koshilando eshi, otava ka kala ofika kokule molwoumbada womahepeko asho, mokulila nomokunyika oluhodi, 16 otava ti: “Woo, Woo, oshilando osho shinene, sha li she lidika oikutu yoliina nopurpuri naai itilyana, nosha li sha wapekwa noshingoldo nomamanya ondilo nouwe; 17 oupuna u fike opo, eshi wa hanaunwa po mokafimbo kamwe akeke.”

Novashingi veeskepa nongudu aishe yomeeskepa novalongi vomeeskepa naaveshe ava tava ende mefuta, ova kala ofika kokule, 18 ndele eshi va mona omwifi wepeya lasho, ova ingida, tava ti: “Shilipipo shinene shi fike poshilando eshi?” 19 Ndele ove lifundila edu momitwe davo ndele tava ingida pombada nokulila nokunyemata, tava ti: “Woo, Woo, oshilando ove shinene, omo aveshe ava va kala ve neeskepa mefuta, va likola moupuna washo, osheshi sha hanaunwa po mokafimbo kamwe akeke.

20 “Shi nyakukilweni, eulu novayapuki novayapostoli novaxunganeki, osheshi Kalunga okwe shi tokola noku shi kwatela onghone molweni.” 21 Nomweengeli omunaenghono okwa kufa emanya linene, ngaashi emanya linene loshini, okwe li ekela mefuta ndele ta ti: “Osho ngaha Babilon, oshilando eshi shinene, tashi ekelwashi mekupulo limwe, ndele itashi monika vali nande. 22 Ndele mwoove itamu udika vali eshiko lonyalilo nondaka yovaimbi noyovashiki veefilita novomanghuma, noitamu monika vali nande omunongo wakeshe tuu oshilonga shounongo, mwoove itamu udika nande vali omufindo wemanya loshini. 23 Nomutemo wolamba itau minikile vali mwoove, mwoove itamu udika vali ondaka yonghalu yomuhomboli noyomuhombolwa; osheshi ovashingifi voipindi yoye ova li ovakulunhu vedu, osheshi oiwana aishe ya hongaulwa koupule woye, 24 ndele musho omwa monikile ohonde yovaxunganeki, nohonde yovayapuki noyaava aveshe va dipawa kombada yedu.”