Ombwada ya londa koshilyani Odjona otai i findi
1 Ndele umwe womovaengeli venya vaheyali ava va li ve noiyaxa iheyali e uya ndele ta popifa nge, ta ti: “Ila oku, ndi ku ulikile etokolo lombwada inene, ei ya kala omutumba kombada yomeva mahapu, 2 eehamba dopedu da haela nayo ndele ovanhu ava va kala kombada yedu va kolwa komaviinyu oumbwada waye.” 3 Ndele ye okwa twala nge mombuwa ndi li momhepo. Ame onda mona omukainhu, a kala omutumba koshilyani shitilyana, shi yadi omadina omasheko, ndele shi na omitwe heyali neembinga omulongo. 4 Nomukainhu ou okwa li a djala oikutu itilyana youhamba naitwimonghwiyu nokwa wapekwa noshingoldo nomamanya mawa e nondilo nouwe, ndele meke laye okwa li e neholo loshingoldo li yadi oixuna neenyata doluhaelo laye. 5 Ndele moshipala shaye omwa li mwa shangwa edina eli, oshiholekwa: “Babilon shinene, ina yeembwada noyoixuna aishe yedu.” 6 Ndele onda mona omukainhu a kolwa kohonde yovayapuki noyeendobwedi daJesus, ndele nda kumwa nonghumwe inene, eshi nde mu mona.
7 Opo omweengeli okwa tya kwaame: “Owa kuminwa shike? Ame ohandi ku lombwele oshiholekwa shomukainhu noshoshilyani she mu humbata, eshi shi nomitwe heyali neembinga omulongo. 8 Oshilyani we shi mona, osha li po, ndele kashi po vali, ndele oshi nokudjuuka mo vali mombwili nokuya menyonauko, novakwambadayedu ava omadina avo inaa shangelwa membo lomwenyo nghee ounyuni wa shitwa, otava ka kumwa, ngeenge tava ka mona oshilyani sha li ko, ndele kashi ko vali, ndele tashi uya:
9 “Apa otapa pulwa omayele e neendunge. Omitwe edi heyali odo eemhunda heyali, oko omukainhu a kala ko omutumba, 10 ndele odo vali eehamba heyali, nhano domudo oda teka po, imwe opo i li, ikwao inai uya natango, ndele fiku tai uya, oi nokukala po ashike okafimbo kaxupi. 11 Noshilyani shinya eshi sha li ko shito ndele kashi ko vali, osho oshitihetatu, ndele sho vene osho ngaho shimwe shaainya iheyali ndele tashi i menyonauko. 12 Neembinga odo omulongo we di mona, odo eehamba omulongo, inadi nangala natango oilongo, ndele do otadi ka mona eenghono ngaashi eehamba, di kale efimbo limwe pamwe noshilyani. 13 Do odi nomhangela imwe, notadi yandje eenghono dado nepangelo lado koshilyani. 14 Do otadi kala nokulwifa Odjona, ndele Odjona pamwe novashikuli vayo, ovaifanwa novahoololwa novadiinini, otai di findi, osheshi oyo Omwene wo vene nOhamba yeehamba.”
15 Ndele ye okwa tya kwaame: “Omeva enya we a mona, ombwada ya kala omutumba kuwo, oo oiwana neengudu dovanhu, nomaludi nomalaka. 16 Neembinga odo omulongo we di mona, noshilyani, ovo tava ka tonda ombwada ndele tave i dula, tai kala hamunghele ndele tava li ombelela yayo, ndele tave i xwike momundilo. 17 Osheshi Kalunga okwe shi tula momitima davo, va wanife omhangela yaye nokutwa omukoo umwe naye nokuyandja ouhamba wavo koshilyani, fiyo eendjovo daKalunga tadi ka wanifwa. 18 Nomukainhu ou we mu mona oye oshilando shinene shi nepangelo kombada yeehamba adishe dopedu.”
© Oshikwanyama Bible Revised © Bible Society of Namibia, 2008, 2012.
