Odjona novadidilikwa komhunda yaSion
1 Ndele nda mona, ndele tala, Odjona ya kala ofika komhunda yaSion pamwe nomayovi efele nomayovi omilongo nhee naane ava va shangelwa edina layo nedina laXe moipala yavo. 2 Ndele nda uda ondaka ya dja meulu ya fa epopolo lomeva mahapu, nongaashi epopyo lengungumo linene, ondaka ei nda uda oya li ya fa eshiko lovashiki veenyalilo, hava shiki eenyalilo davo, 3 ndele tava imbi eimbilo lipe polukalwapangelo nomoipafi yoinamwenyo ei ine noyovakulunhu; ndele kapa li ou a shiiva okulilonga olwiimbo olo, ovo tuu aveke vomayovi efele nomayovi omilongo nhee naane, ava va kulilwa medu. 4 Ovo tuu ovo inave linyateka novakainhu osheshi ovo va yela ngaashi oukadona. Ovo ava hava shikula Odjona keshe apa tai i. Ovo va kulilwa movanhu, va ninga votete vaKalunga novOdjona, 5 mokanya kavo inamu udika nande oipupulu, osheshi vo vehe na nande oshipo.
Ovaengeli vatatu
6 Ndele nda mona omweengeli umwe a tuka pokati keulu ou e kwete evaengeli laalushe li nokuudifilwa kombada yedu novapaani aveshe nomapata aeshe nomalaka aeshe noiwana aishe. 7 Nokwa popya nondaka yomokule: “Tileni Kalunga, nye mu mu fimaneke, osheshi efimbo letokolo laye ole uya; linyongameneni ou a shita eulu nedu nefuta needjo domeva.”
8 Nomweengeli umwe omutivali okwe va shikula ndele ta ti: “Sha teka po, sha teka po, Babilon, oshilando eshi shinene, osheshi sha li sha nwefa oiwana aishe momaviinyu ehandu loluhaelo lasho.”
9 Nomweengeli umwe omutitatu e va shikula okwa popya nondaka inene, ta ti: “Ou te linyongamenene oshilyani noshiyelekela shasho, ndele ta tambula edidiliko lasho nande omoshipala shaye ile kombada yeke laye, 10 naye e nokunwa yo omaviinyu ekeshuko laKalunga, inaa lumbakanifwa nasha, a tilwa moshiyaxa shehandu laye, oku nokuhepekwa momundilo nomosulfuri moipafi yovaengeli vayapuki nomoipafi yOdjona. 11 Nomwifi womayehameko avo ohau yeluka pombada alushe fiyo alushe, ndele vehe netulumuko omutenya noufiku ava ve linyongamena oshilyani noshiyelekela shasho, nakeshe ou a tambula edidiliko ledina lasho.”
12 Apa otapa pulwa elididimiko lovayapuki, laava hava diinine oipango yaKalunga neitavelo laJesus.
13 Ndele nda uda ondaka ya dja meulu, tai ti: “Shanga: Ovanelao oonakufya ovo tava file mOmwene okudja nena fiyofiyo!” Heeno, Omhepo osho tai ti: “Ovo tava ka tulumukwa koudjuu wavo, osheshi oilonga yavo otai va shikula pamwe navo.”
14 Ndele nda mona, ndele tala, oshilemo shitoka, nokoshilemo okwa kala omutumba umwe a fa Omona wOmunhu, okwa li e noshikoloni shoshingoldo komutwe waye, nomeke laye okwa li e noshikashulifo sha twa. 15 Nomweengeli umwe okwa dja motembeli, okwa lalekida nondaka inene kwaau a kala omutumba koshilemo ta ti: “Tuma oshikashulifo shoye, ove u kashule, osheshi efimbo leteyo ola fika, osheshi oilya yedu oya pya filu.” 16 Ndele ou a kala omutumba koshilemo okwa ekela oshikashulifo shaye kombada yedu, ndele edu ola kashulwa po.
17 Nomweengeli umwe okwa dja motembeli yomeulu, naye yo okwa li e kwete oshikashulifo sha twa.
18 Nomweengeli umwe vali a dja koaltari okwa li e nepangelo okupangela omundilo, okwa popya nondaka inene kwaau a li e noshikashulifo sha twa, ta ti: “Tuma oshikashulifo shoye sha twa, ove u kashule po omashila omuviinyu wedu, osheshi eeviinyu dao oda pya.” 19 Nomweengeli winya okwa ekela oshikashulifo shaye kombada yedu nokwa ongela po omuviinyu wedu, ndele okwe u ekela moshikolelo shinene shehandu laKalunga. 20 Oshikolelo osha kolelwa pondje yoshilando, ndele moshikolelo omo mwa dja ohonde ya hanga fiyo okoitomo yeenghambe, eekilometa omafele atatu.
© Oshikwanyama Bible Revised © Bible Society of Namibia, 2008, 2012.
