Oilyani ivali
1 Ndele onda mona mefuta mwa djuuka oshilyani shi neembinga omulongo nomitwe heyali nokeembinga dasho oikoloni omulongo, nokomitwe dasho oku nomadina okusheka. 2 Noshilyani osho nde shi mona, osha li ngaashi ongwe, nomakasha asho okwa fa aa emwangha, nokanya kasho oka fa okanya konghoshi; ndele ongadu oye shi pa eenghono dayo nolukalwapangelo layo nepangelonghono linene. 3 Ndelenee onda mona omutwe washo umwe wa li wa fa wa dengwa oshipute shoku shi lya, ndele oshipute eshi shefyo osha veluka. Nedu alishe ola ka tala nokukuminwa oshilyani. 4 Vo ove linyongamena ongadu ei, osheshi oyo ya pa oshilyani eenghono ndele ve linyongamenena oshilyani, tava ti: “Olyelye ou e fike poshilyani, nolyelye ta dulu oku shi lwifa?”
5 Osho sha pewa okanya shi popye oinima inene nomasheko, osha pewa eenghono doku shi ninga eehani omilongo nhee nambali. 6 Nokanya kasho oka makukila omasheko okusheka Kalunga nedina laye neumbo laye naava ve li meulu, 7 osha pewa okulwifa ovayapuki noku va finda, ndele sha pewa eenghonopangelo kombada yoludi noyepata noyelaka noyoshiwana keshe. 8 Novakwambadayedu otave shi linyongamene, keshe tuu ou edina laye inali shangelwa membo lomwenyo lOdjona ya dipawa, kokudja keshito lounyuni. 9 Ou e nokutwi, na ude ko.
10 Ngeenge pe na ou ta kwata onghwate,
oye ta kwatwa yo onghwate,
naau ta dipaa neongamukonda,
oye ota dipawa yo neongamukonda.
Apa otapa pulwa elididimiko neitavelo lovayapuki.
11 Naame onda mona oshilyani shikwao, sha dja medu, sha li shi neembinga mbali ngaashi dOdjona, ndele osha popya ngaashi ongadu. 12 Neenghonopangelo adishe doshilyani shotete otashi di longifa moipafi yasho notashi linyongamenifa edu naaveshe va kala kombada yedu. Oshilyani shotete sha li shi noshipute shefyo sha veluka. 13 Ndele otashi ningi omadidiliko manene, opo tashi etifa omundilo tau di meulu tau uya kombada yedu moipafi yovanhu. 14 Ndele otashi pukifa ovakwambadayedu nomadidiliko asho she a pewa oku a ningila moipafi yoshilyani, ndele tashi lombwele ovakwambadayedu, va hongele oshilyani oshiyelekela, sha li shi noshiveta sheongamukonda ndele sha ninga vali omwenyo. 15 Osho osha pewa okutula omwenyo moshiyelekela shoshilyani nokutya, oshiyelekela osho shoshilyani shi popye, ndele shi ninge aveshe va dipawe, ava itave linyongamene oshiyelekela shoshilyani. 16 Ndele otashi itavelifa aveshe novanyasha novakulunhu, noipuna neehepele, novadalwa novapika, ve lididilikife edidiliko meke lavo lokolulyo ile moshipala shavo, 17 opo ngeenge pehe na umwe ehe na edidiliko ile edina loshilyani ile omuvalu wedina lasho, aha dule okulanda ile okulandifa. 18 Apa ounongo u li po: Ou e neendunge, na vale omuvalu woshilyani, osheshi omuvalu ou owomunhu. Onomola yasho oyo omafele ahamano nomilongo hamano nahamano.
© Oshikwanyama Bible Revised © Bible Society of Namibia, 2008, 2012.
