Efindano louyuki
1 Kalunga ho handukile, Omwene,
Kalunga omutokoli,
holoka mouyeleleshinge woye!
2 Omutokoli wedu, fikama,
Ove alulila ovalinenepeki oilonga yavo.
3 Fiyo onaini mbela, Omwene,
fiyo onaini ovadinikalunga tave litade?
4 Otava yadauka, otava popi omutyanai,
ovalongi vowii vo aveshe otave litumbile pombada.
5 Akutu Omwene, otava lyataulile po oshiwana shoye,
novafyuululifwa voye otave va fininike.
6 Ovafiyekadi novanailongo otave va pondo
neefiye otave di dipaa
7 ndele tava ti: “Omwene ite shi mono,
Kalunga kaJakob ke shi udite.”
8 Pukulukeni, nye ava tamu pwidauka mokati koiwana,
novashima nye, onaini tamu ningi eendunge hano?
9 Ou omutwiki womatwi, Ye ke udite ko mbela?
Nomushiti womesho ke wete ko hano?
10 Ou omutekuli woilongo, Ye iha denge hamba?
Oye tuu, ta longo ovanhu omayele.
11 Omwene oku shii nokuli omadiladilo ovanhu;
osheshi oo okaulapepo kongaho.
12 Omulumenhu omunelao
ou ta pukululwa kwoove, Omwene,
noto mu longo eendunge momhango yoye,
13 Ove u mu ningile etulumuko momafiku madjuu,
fiyo omunawii ta felwa ombila yaye.
14 Osheshi Omwene ita kanduka po oshiwana shaye,
Ye ita efa oshifyuululwa shaye.
15 Etokolo lopauyuki otali kala pauyuki:
aveshe ava ve hole ouwa, otava ame kulo.
16 Olyelye ta kwafa nge okukondjifa ovanawii?
Olyelye omupopili mokudenga oumbudi?
17 Omwene, ngeno haye ekwafo lange,
omwenyo wange ngeno wa mwena nale
moshilongo shovafi.
18 Alushe, eshi kwa li ndi shii,
omhadi yange tai hale okufenunguta,
ouwanghenda woye, Omwene,
owo wa paka nge ofika;
19 ngeenge ndi noshisho shoudjuu meni lange,
omahekeleko oye oo a hekeleka omwenyo wange.
20 Oshipundi shetokolo lomupya
osha kwatafana tuu mbela naave,
eshi tashi eta oixuna mokupengifa omhango?
21 Ove lipaka kumwe okunangela omwenyo womuyuki,
nohonde ei ihe netimba, otave i tokolele okufya.
22 Ndelenee Omwene, Oye a ninga ohote yange ya pama,
Kalunga kange, Oye emanya lange lokuhondama;
23 owii wavo ote u alulile kuvo vene,
ndele te va hanaunifa po oumbudi wavo;
heeno, Omwene, Kalunga ketu,
ote ya oku va hanauna po.
© Oshikwanyama Bible Revised © Bible Society of Namibia, 2008, 2012.
