Elondweloimbilo
Epsalome laAsaf. Eimbilo la pewa enyakwa lolwiimbo, pokaxumbafeta Gittit.
1 Imbileni Kalunga, Oye eenghono detu,
hambeleleni nokutanga Kalunga kaJakob.
2 Imbeni ehambelelo, nye shikeni oungoma
nokaxumbafeta kawa nonyalilo.
3 Kokamwedjona, shikeni omanghuma,
nomohani i li momutootoo okefiku loshivilo shetu.
4 Osheshi oyo onghedi yomuIsrael,
oshipango shaKalunga kaJakob.
5 Okwa li e shi dikila Josef edimbulukifo,
eshi a dja a lwife Egipiti.
Oyo ondaka inandi i uda shito,
ondi i udite paife tai ti:
6 “Onda kufa oudjuu komapepe aye,
omaoko aye ihaa humbata vali omutengi.
7 Eshi wa ifana nge moudjuu, onde ku kulila mo,
onde ku itavela moilemo yengungumo,
nde ku yeleka pomeva aMeriba. Sela
8 Oshiwana shange, pwilikine nge:
onda hala ndi ku londwele, Israel,
ngeno u ude nge!
9 Mokati keni ngeno inamu kala nande
kalunga kokoilongo,
ove uhe linyongamene nande
kukalunga kokoilongo.
10 Aame Omwene Kalunga koye,
ou nde ku tembula muEgipiti;
akama unene okanya koye,
Ame ndi ka yade.
11 Ndelenee oshiwana shange
inashi pwilikina ondaka yange,
naIsrael ina itavela ehalo lange.
12 Opo nee nde va efela
moukukutu womitima davo,
va lambalale eemhangela davo vene.
13 Akutu oshiwana shange, ngeno u ude nge,
naIsrael, ngeno na alukile meendjila dange.
14 Opo ngeno ohandi ninipike diva ovatondi vavo,
neke lange ohandi li aneke kovataataai vavo.
15 Ava hava tondo Omwene,
ngeno nava linyongamene kuye,
noshihangwa shavo nashi kale po alushe.
16 Ndelenee ngeno ohandi mu palula noilya
nohandi mu kutifa nomaadi owishi taa di memanya.”
© Oshikwanyama Bible Revised © Bible Society of Namibia, 2008, 2012.
